Ձեր վստահելի աղբյուրը

Ազգային ժողովում 2018 թվականի բյուջեի կատարողականի քննարկումները «Լուսավոր Հայաստան» խմբակցության ղեկավար Էդմոն Մարուքյանը որակեց էքստրաօրդինար:

«Պետք է ասել, որ էքստրաօրդինար քննարկում է, քանի որ մի կողմից գիտենք՝ կարևոր փաստաթղթի մասին է խոսքը, որտեղ ընդդիմությունը պետք է իր ասելիքն ունենա, մյուս կողմից քննարկում ենք մի բյուջեի կատարման հաշվետվություն, որին  դեմ է քվեարկել հենց ինքը վարչապետը: Սա խոսում է նրա մասին, որ ոչ սովորական պայմաններում իրականացված բյուջեի կատարողականն ենք քննարկում և մենք կանգնած ենք մի հետաքրքիր մարտահրավերի առաջ: Այն, որ մինչև նոյեմբեր ամիսը մենք ամեն կերպ աջակցել ենք այս բյուջեի կատարմանը, հետևաբար, չենք կարող դեմ լինել դրա հաշվետվությանը: Բայց մյուս կողմից մենք դեմ ենք քվեարկել այդ բյուջեի ընդունմանը»,- ասաց Էդմոն Մարուքյանը:

Նրա խոսքով՝ այսօր չեն կարող չխոսել խնդիրներից, որոնց լուծման ուղղությամբ պետք է քայլեր ձեռնարկվեն, որպեսզի դրանք նորից չկրկնվեն:

Էդմոն Մարուքյանը նշեց, որ առանձնացրել են երեք խնդիր: Առաջինը վերաբերում է գործող  կառավարության կադրային քաղաքականությանը. «Մենք գտնում ենք, որ կադրային քաղաքականությունը շատ վատն է, եթե այդպես շարունակվի, մենք շարունակելու ենք քննադատել կառավարությանը»:

Երկրորդ խնդիրը, ըստ նրա,  խոստումներն են, որոնք դրժվել են. «Ասել ենք, ասում ենք, շարունակելու ենք պնդել՝ եղել են միասնական ընդդիմության խոստումները, վարչապետ Նիկոլ Փաշինյանի խոստումները, որոնք չեն կատարվել։ Կան բաներ, որ ասում են՝ հա, մենք ասել ենք, բայց ուրիշ ձև ենք անելու»:

Երրորդ խնդիրը «սևուսպիտակի» բաժանելն է. «Պետք է փորձ անել վեր կանգնել ամեն ինչից և ներառական մոտեցումներով հանդես գալ, այսինքն՝ լինել բոլորի վարչապետը, լինել բոլորի կառավարությունը: Մենք ամենախիստ ձևով քննադատել ենք հայտնի սևերի-սպիտակների քաղաքականությունը, որի մասին օրերս Երևանի քաղաքապետը կրկնեց։ Այսինքն՝ բաներ կան, որ դասեր չեն քաղում»:

Էդմոն Մարուքյանի խոսքով՝ միանշանակ կարող էր ավելի լավ արդյունքներ լիներ:

«Կարո՞ղ էր ավելի լավը լինել, միանշանակ` այո, կարող էին արդյունքները շատ լավը լինեին, միանշանակ կարող էին, եթե կառավարությունը լիներ մի քիչ ավելի լսող, ավելի համագործակցային, մի քիչ ավելի ներառական մոտեցումներ ցուցաբերող, եթե այդ վեհ գաղափարները որոշ մարդկանց ուղղակի չկտրեին մայր հողից։ Երբ բան ենք ասում, մեզ ասում են՝ դուք խոսում եք ժողովրդի կառավարության ներկայացուցչի հետ,  կամ ասում են՝ ժողովրդի պատգամավորի հետ ո՞նց եք խոսում։ Տպավորություն է, որ ընդդիմությանը այլ ժողովուրդ է ընտրել: Այսինքն՝ այս բաներից վեր կանգնել էր պետք», - հայտարարեց Մարուքյանը։

Անդրադառնալով տարածքային համաչափ զարգացմանը՝ պատգամավոր նշեց, որ լավ է վերաբերվում Սուրեն Պապիկյանին, նաև որպես նախարար, բայց նա նախկին իներցիան շարունակում է. «Այսինքն՝ բեկումնային մի բան պետք է անեք, բայց այդ բանը դեռ չի արվել»:

Իսկ թե ինչ է արվել մեկ տարվա ընթացքում, Էդմոն Մարուքյանն նշեց, որ չի կարող որևէ  ֆունդամենտալ բան ասել: Ըստ նրա՝ այնտեղ, որտեղ նոր իշխանությանը պետք էր նոր ընտրություններ անցկացնել, արագ արվեցին, հորդորվեց հրաժարական տալ,  որտեղ պետք չէր, ասեցին պատրաստվում ենք 2021 թ-ի ընտրություններին․ «Սա երկակի ստանդարտ է, և ես կարծում եմ՝ պետք  է Վանաձորում և  Գյումրիում էլ ընտրություններ անցկացվեին»:

Պատգամավորը նաև նշեց, որ Գյումրիում երեկ ջրեհեղեղ էր, մարդիկ գոնդոլաներով պտտվում էին, Վենետիկն էր դարձել. «Ո՞վ պետք է դրա մասին մտածի, թե՞ պետք է մինչև 2021 թ-ը սպասեք կամ տուրիզմի կենտրոն դարձնեք, գոնդոլաներ դնենք, սիրահար զույգերն էլ գան անձևրների ժամանակ պտտվեն: Սրանց դեմ պետք է պայքարել»:

Միաժամանակ Էդմոն Մարուքյանն ասաց, որ իրենք պատրաստ են ամեն լավ նախաձեռնության մինչև վերջ աջակցել։

«Մեր մտավոր, կադրային ներուժը բավարարում է գեներացնել մոտեցումներ, որոնք կարող են ռեալ փոփոխություններ բերել: Մնում է մի քիչ լինել համագործակցային, ներառական մարդկանց խմբերի չբաժանվել և լինել բոլորի ներկայացուցիչը, որևէ կերպ չտարանջատվել մյուսներից»,- ասաց պատգամավորը՝ հավելելով, որ պետք է արագացնել բոլոր կարևոր ռեֆորմները:

«Լուսավոր Հայաստան» խմբակցության ղեկավարը նաև հայտարարեց, որ շուտով կհրապարակեն ԼՎԿ-ի կողմից պատարստված վեթթինգի իրականացման սկզբունքները:

Վերջում Էդմոն Մարուքյանն ասաց, որ Էքստրաօրդինար հանգամանքներից ելնելով՝ ԼՀԿ-ն այս անգամ կողմ կքվեարկի բյուջեի կատարողականին։