Ձեր վստահելի աղբյուրը

«Այն, ինչ տեղի ունեցավ Հայաստանում, հեղափոխության հետ որևէ կապ չունի։ Հեղափոխությունը քաղաքագիտական լուրջ հասկացողություն է, ունի որոշակի կոմպոնենտներ»,- «Ադեկվադ» ՀԿ նախաձեռնած «Ադեկվադ դիսկուրս» կոնֆերանսին ասաց Գերագույն խորհրդի, ԱԺ նախկին պատգամավոր, քաղաքական վերլուծությունների «Ակունք» կենտրոնի տնօրեն Ռուբեն Հակոբյանը։

Նրա խոսքով, երեք տարբերակ կա՝ ներիշխանական դավադրություն, արտերկրում ծրագրված սցենար և իսկապես  օրվա իշխանությունը  բացարձակ կապ չուներ ստեղծված իրավիճակի հետ, չէր պատկերացնում ինչ է կատարվում Հայաստանում, տեղի ունեցավ այն, ինչ տեղի ունեցավ։
Նրա համոզմամբ, Հայաստանում իշխանության և ոչ իշխանական ուժերի միջև չկա քաղաքական բանավեճ։ 

«Եթե կա քաղաքական դիսկուրս, ապա կա իշխանությունից դուրս։ Իշխանության ներսում միակ  քաղաքական  բանավեճը՝ Նիկոլ Փաշինյան ընդդիմադիր -Նիկոլ Փաշինյան վարչապետ։ Այլ բանավեճ չկա։ Նիկոլ Փաշինյան  վարչապետը շատ դաժանորեն պատժում է Նիկոլ Փաշինյան ընդդիմադրին, շատ անխնա է պատժում։ Մենք  գալիս ու կանգնում ենք մի տեղ, որ նոր իշխանությունը եկել է ջախջախելու այն բոլոր մոտեցումները, որոնք նախկինում ընդդիմադիր Նիկոլ Փաշինյանը տվել է գործող իշխանություններին։ Ընդդիմադիր Նիկոլ Փաշինյանը  բավականին ճիշտ գնահատականներ էր տալիս գործող իշխանություններին, ողջ համակարգին։ Ստացվում է  մի պարադոքս իրավիճակ, նաև մենք այս քննարկումներով փրկենք Նիկոլ Փաշինյան ընդդիմադրին Նիկոլ Փաշինյան վարչապետից։  Կարծում եմ՝ Նիկոլ Փաշինյան ընդդիմադիրն ավելի տարածական կերպար է դառնալու, այսպես թե այնպես որպես խորհրդանշող  կերպար վաղ թե ուշ ավելի լուրջ քաղաքական ուժ է դառնալու»,- ասաց Ռ. Հակոբյանը։

Նրա խոսքով, այսօր ԱՄՆ-ում ՀՀ-ի և Ադրբեջանի ԱԳ նախարարների հանդիպումը ինչ որ բանի սկիզբ է լինելու։

«Կան գործոններ, որոնք մեզանից դուրս են, մենք քիչ ազդեցության լծակներ ունենք այդ դաշտում։ Մենք ի վերջո պետք է կարողանանք  ճիշտ օրակարգի շուրջ համախմբվել, ազգային մի միավոր  ձևավորել, որովհետև դա կարող է ընդդիմանալ այն արհավիրքին, որը կա այսօր Հայաստանում, որը տարածվելու  մեծ պոտենցիալ ունի։ Իսկապես դրությունը շատ ավելի լուրջ է, քան կարող ենք ասել, մենք իսկապե շատ վտանգավոր գոտում ենք։

Միակ ելքը տեսնում եմ համախմբելը։ Այս պահին թիվ մեկ օրակարգն Արցախի և Հայաստանի անվտանգությունն է,  մի կողմ դնել այս պահին քաղաքական որոշակի մոտեցումների տարբերությունը, համախմբվել այս օրակարգի շուրջ, կարողանալ դիմակայել այն մարտահրավերներին, հարվածներին, որոնք այսօր ունենք»,- ասաց Ռ. Հակոբյանը։ 

Նրա խոսքով, այսօր իշխանությանը ցնցումների են բերում ոչ թե օլիգարխներն ու փողատերերը, որովհետև նրանք զգույշ են, վախկոտ են, գտնում են տիրոջը, այլ նրանք, ովքեր երկար ժամանակ եղել են քաղաքական դաշտում, բայց կարողացել են մնալ  քաղաքական դաշտում և մաքուր լինել, նաև նրանք, ովքեր նոր են մտնում քաղաքականություն՝ մաքուր կենսագրությամբ։

Բանավեճին ներկա «Քառյակ մեդիա» ՓԲԸ համահիմնադիր, ԱԺ նախկին պատգամավորներ Միհրան Հակոբյանն ասաց, որ համաշխարհային փորձը ցույց է տալիս, որ այն հասարակություններն են  կարողանում հաջողել, որոնք միասնություն են ապահովում, գոնե հասարակության անդամների զգալի մասը  հավատում է մի գաղափարի՝ պետության, ազգային արժեքների, համամարդկային արժեքների գաղափարի։

«Մեր գլխավոր խնդիրը, որ այսօր կա, այն է, որ մենք ունենք երկփեղկված հասարակություն, ամենամեծ պրոբլեմը, որ իրոք  փորձանքի է վերածվել, այն է, որ իշխանությունն ամենաբարձր մակարդակով մարդկանց բաժնում են  սևերի ու սպիտակների, լավի ու վատի։ Մենք մի փոքր սխալ գործեցինք, մեզ չի ներելու ոչ մարդկությունը, ոչ էլ այն սերունդները, որոնք գալու են»,- նշեց նա։

Մ. Հակոբյանի խոսքով, ներկա իշխանությունն ունի պատժիչ գործառույթ, «մեզանից առաջ ոչ մի լավ բան չի եղել»։

«Մենք մեր մոդելը պետք է գտնենք՝ մեր իրողությունների, ռեսուրսներին համահունչ, ու դա պետք է լինի փաստարկված, թվային տվյալներով»,- ասաց նա։