Ձեր վստահելի աղբյուրը

Այսօր Ստրասբուրգում մեկնարկած Եվրոպայի խորհրդի խորհրդարանական վեհաժողովի նիստում քննարկվում է բելգիացի պատգամավոր Պետրա Դե Սուտերի զեկույցի նախագիծը՝ Խորհրդարանական վեհաժողովում որոշումների կայացման գործընթացի ամրապնդումը՝ կապված հավատարմագրերի ու քվեարկության հետ։ Այս բանաձևի նախագիծը կաևոր է Ռուսաստանի Դաշնության պատվիրակությանը ԵԽԽՎ վերադարձնելու համար, որի աշխատանքներին նրանք չեն մասնակցում 2014թ․-ից, երբ ԵԽԽՎ-ն  Ղրիմի «անեքսիայի» պատճառով զրկեցին նրանց ձայնի, քվեարկության ու մի շարք իրավունքներից։

Բանաձևի նախագծում նշվում է, որ  «գոյություն ունեցող ընթացակարգերից բացի, սահմանել համատեղ արձագանքման ընթացակարգ, երբ անդամ պետությունները խախտեն իրենց կանոնադրական պարտավորությունները կամ չհարգեն ԵԽ-ի ստանդարտները, հիմնարար սկզբունքներն ու արժեքները»։ Բանաձևի նախագծով առաջարկում է շեղում ԵԽԽՎ կանոնակարգերից, որպեսզի այն կարողանա հրավիրել անդամ պետությունների խորհրդարաններին, որոնք Վեհաժողովում ներկայացված չեն պատվիրակությամբ։

Բանաձևի քննարկումն անցնում է բավական թեժ ու հուզական մթնոլորտում։ Ռուսաստանի պատվիրակությանը ԵԽ վերադարձնելու մեջ մի շարք պատգամավորներ «մեղադրեցին» ԵԽ գլխավոր քարտուղարին, ԵԽԽՎ նախագահին։

Պատգամավորները բաժանվել են 2 խմբի, միասնական կարծիք չկա քաղաքական խմբերում ու անգամ երկրների պատվիրակությունների ներսում, թե ինչպես քվեարկել։ Բանաձևի նախագիծը խիստ քննադատության են ենթարկում, բնականաբար, Ուկրաինայի պատգամավորները, Վրաստանը։

Պատգամավորների մի մասը գտնում է, որ չի կարելի տրվել ՌԴ-ի ֆինանսական շանտաժին ու չտրվել ամեն գնով Ռուսաստանին ԵԽԽՎ բերելուն, մյուս մասը գտնում է, որ սա մարդու իրավունքների, օրենքի գերկայության կառույց է ու Ռուսաստանը պետք է շարունակի լինել կառույցում ու անհրաժեշտ է երկխոսել նրա հետ։

Սերբիայի պատգամավորներից մեկը, կողմ արտահայտվելով բանաձևին, ասաց, որ Ղրիմի ժողովուրդը չցանկացավ ճնշված լինել Ուկրաինայում ու կատարեց իր ընտրությունը։ Այս խոսքերն ուղղակի հունից հանեցին Ուկրաինայի պատվիրակներին ու պատգամավոր Գոնչարենկոն սկսեց բղավել տեղից։

Գոնչարենկոն իր ելույթի ժամանակ տեղի ունեցողն անվանեց Ստրասբուրգի դավաճանություն ու «Լավրով-Պասկիյե-Յագլանդ պակտ»։ Ընդդեմ Ռուսաստանի այս ողջ ժամանակահատվածում ընդունվել է 7 բանաձև, ասաց Գոնչարենկոն, որից ոչ մեկը Ռուսաստանը չի կատարել ու հիմա ԵԽԽՎ-ն փոխում է իր կանոնները, որ Ռուսաստանը վերադառնա ու նստի այստեղ։

«Մի մասնակցեք մեր կազմակերպության սպանության այս զազրելի փորձին»,-ասաց Գոնչարենկոն։

Քննարկումն այնքան լարված է, որ պատգամավորները միմյանց կոչ են անում հարգել միմյանց կարծիքները, եթե անգամ դրանք միմյանցից շատ են տարբերվում ու ժողովրդավարությունից խոսելուց առաջ՝ վարվել ժողովրդավար ձևով։

Շվեդ պատգամավորը հայտարարեց, որ եթե ՌԴ-ին դուրս թողնեն ԵԽ-ից, ապա իրենք չեն կարող ՌԴ կոլեգաներին հարցնել, թե ինչու են իրենք այդպես վարվում և ժողովրդավարությունը միմյանց հետ խոսելն է ու ընդհանուր հիմքեր գտնելը։

«Եվ անկեղծ, այնպես չէ, որ մենք այստեղ չունենք երկիրներ, որոնք ռմբակոծում են սուվերեն ազգերին՝ ընդդեմ ՄԱԿ-ի բանաձևերին։ Այդ երկրները կոտորում են քրդերին, բայց մենք խոսում ենք այս երկրների հետ, ասում ենք նրանց, որ ինչ անում են, սխալ է։ Եվ ինձ համար Եվրոպայի խորհուրդը հենց սրա համար է»,-ասաց պատգամավորը։

Ադրբեջանցի պատգամավոր Սամադ Սեիդովը ԵԽԽՎ-ին մեղարդեց երկակի ստանդարտներ կիրառելու մեջ։

Նշենք, որ զեկույցի նախագծին ներկայացվել է 200-ից ավել փոփոխություններ, ինչն աննախադեպ է, որի պատճառով էլ վեհաժողովի աշխատանքները կտևեն Ֆրանսիայի ժամանակով մինչև կեսգիշեր՝ մինչ բանաձևի նախագծի քվեարկությունը։