Ձեր վստահելի աղբյուրը

«Եթե Նախշուն Տավարացյանը Բարձրագույն դատական խորհրդի անդամ է ընտրվել 2018 թվականի նոյեմբերի 8-ին, ստանձնել է իր պարտականություններն այդ ժամանակ, այդ դեպքում ինչո՞ւ մինչև հիմա որևէ անգամ ներկա չի եղել  ԲԴԽ նիստերին»,- ԲԴԽ նիստում նման հարցադրում արեց ԲԴԽ անդամ Գրիգոր Բեքմեզյանը։ Նշենք, որ նրա և ևս երկու անդամի՝ Հայկ Հովհաննիսյանի և Լիպարիտ Մելիքջանյանի ջանքերով է  հրավիրվել  այսօրվա նիստը, որի  օրակարգում հենց Նախշուն Տավարացյանի լիազորությունների դադարեցման հարցն է։

Գրիգոր Բեքմեզյանը ներկայացրեց այսօրվա նիստ հրավիրելու և նման հարց բարձրացնելու հիմքերը։ Նա նշեց, որ Ն. Տավարացյանը ԲԴխ անդամ է ընտրվել 2018 թ. նոյեմբերի 8-ին կայացած Դատավորների ընդհանուր ժողովում, սակայն նիստի  վերջում  հրաժարվել է երդում տալ որպես ԲԴԽ անդամ, ներկայացրել է հրաժարականի դիմում։

«Դրանից հետո Տավարացյանը դիմել է  ԲԴԽ-ին իր հրաժարականն  ընդունելու  պահանջով։ ԲԴԽ-ի համար, ենթադրում եմ, անհասականալի է եղել նման պահանջի ներկայացումը, քանի որ արդեն հրաժարվել է երդվելու իր իարվունքից։ Խորհրդի նախագահն ընդամենը գրությամբ հայտվել է՝ քանի որ Տավարացյանը չի երդվել, ԲԴԽ-ն  ոչինչ անել չի կարող»,- նշեց նա։

ԲԴԽ անդամի խոսքով, դրանից հետո ԲԴԽ-ն շարունակել է ճգնաժամային պայմաններում, տարբեր մարդկանց կողմից քարկոծվելու պայմաններում գործել, մինչև այս տարվա հուլիսի 11-ին կայացել է Դատավորների ընդհանուր ժողով, որի ժամանակ որոշվել է, որ Տավարացյանը պետք է երդվի, քանի որ նա ընտրված անդամ է, լիազորությունները ստանձնել է դեռ 2018 թ. նոյեմբերի 8-ին։

«Ընդ որում ԲԴԽ-ն որևէ կերպ չի միջամտել, ԲԴԽ-ն չի քննարկում և չի վերլուծում իրավաչափությունը Դատավորների ընդհանուր ժողովի, որովհետև Դատավորների ընդհանուր ժողովի որոշումը մեզ համար ընդունելի է»,- ասաց նա։

Գրիգոր Բեքմեզյանն ասաց, որ այդ ժամանակվանից Ն. Տավարացյանը որևէ նիստի չի մասնակցել  որպես ընտրված անդամ, չի ներկայացրել որևէ հարգալից պատճառ՝ իր մասնակցությունը բացառող որևէ հանգամանք։

«Այսինքն՝ խախտվել է օրենք։ Հարց է առաջանում՝  արդյո՞ք ԲԴԽ-ն պետք է անդրադառնա այս հարցին, թե ոչ, արդյո՞ք պետք է աչք փակի այս ամենին՝  ասելով,  որ եթե Նախշուն Տավարացյանը դատավոր անդամ է, ապա դատավոր անդամ է,  բա՞ իրավական հետևանքները։ Օրենքը սահմանում է, որ եթե ԲԴԽ անդամն առանց հիմքի չի մասնակցում ԲԴԽ նսիտերին և չի ներկայացնում որևէ պատճառաբանություն, ապա նրա լիազորությունները պետք է դադարեցվեն։ Օրենքի պահանջն է, քանի որ նման անդամը ԲԴԽ-ում չի կարող գործել, նման գործելաոճը խախտում է ԲԴԽ նիստերի կազմակերպման ու  անցկացման իրավական հիմքերը»,- ասաց ԲԴԽ անդամը։

ԲԴԽ անդամ Հայկ Հովհաննիսյանն ասաց, որ այս նիստում իրենց կողմից քննարկվում է  բացառապես իրավունքի և դրա կիրառման հարցը։

«Կոչ եմ անում որևէ մեկը  չփորձի անձնավորել այս խնդիրը։ Տիկին Տավարացյանի փոխարեն կարող էր լինել մեզանից յուրաքանչյուրը։  Խնդիրը Տավարացյան անձը չէ,  դատավորը չէ, այստեղ խնդիրը Դատավորների ընդհանուր ժողովի կողմից ընտրված դատավոր անդամն է   և դրա հետ կապված իրավակարգավորմները։ Մեր այս քննարկումը միտված է միայն այդ խնդրի թիրախավորմանը։ Այստեղ տեղի է ունենում բարձր մասնագիտական քննարկում»,- ասաց Հ. Հովհաննիսյանը։