Ձեր վստահելի աղբյուրը

Երևանի ավագանու արտահերթ նիստ է հրավիրվել։ Նիստին  մասնակցում է 41 անդամ, օրակարգում երեք հարց է։

«Իմ քայլը» խմբակցությունից Հասմիկ Խաչունցը ներկայացրեց առաջին հարցը։ Նախատեսվում է քանդման ենթակա 4-րդ կարգի վթարային Արցախի պողոտա 4 նրբանցքի հ.10 շենքի հ.5 ուսումնարանի սպորտային դահլիճի մասնաշենքի նախկին թիվ 120 բնակարանի բնակիչներ` Արմեն Ավետիսյանին, Հայկ Ավետիսյանին, Մարիամ Ավետիսյանին, Վարդուհի Ավետիսյանին և Ռուզաննա Խաչատրյանին վերաբնակեցնելու նպատակով անհատույց օտարել (նվիրել) Սիսակյան փողոցի հ.16 շենքի թիվ 98 հասցեում գտնվող 62.3 քմ մակերեսով երկու սենյականոց բնակարանը։

Ավագանու անդամն ասեց, 2012-ին տրված որոշման համաձայն, շենքը եղել է 4-րդ կարգի վթարային, հետո՝ 2015-ին այն հռչակվել է որպես 2-րդ կարգի վթարային, 2018-ին նորից այն դարձել է 4-րդ կարգի վթարային։

«Ես չեմ կարող գնահատական տալ սրան, բայց կխնդրեմ, որ համապատասխան մարմինները զբաղվեն այս հարցով»,-ասաց նա։

«Բարգավաճ Հայաստան» խմբակցության անդամ Միքայել Մանրիկյանը  հայտարարեց, որ Երևանում վթարային շենքերի բնակիչները չեն վստահում 2015-ին կատարված ուսումնասիրության արդյունքներին։

«Օգտվելով առիթից ուզում եմ կոչ անել, հնարավորության դեպքում վթարային շենքերի երկրորդային հետազոտություն կատարվի, վստահ եմ, որ կունենանք բազմաթիվ բացահայտումներ կլինեն»,-ասաց ավագանու անդամը։

Նիստը վարող քաղաքապետի տեղակալ Հրաչ Սարգսյանն ասաց, բյուջեով կա նախատեսված գումար։ Եթե մնացած միջոցները բավականացնեն, ապա ավագանու անդամների մատնանշած շենքերի սեյսմակայունությունը կստուգվի, իսկ մասնագիտական եզրակացությունները տրվում են լիցենզավորված կազմակերպությունների կողմից։

«Առաջարկում եմ այդ հարցը քննարկել հետո»,-ասաց փոխքաղաքապետը։

Նախագիծն ընդունվեց, բնակարանը կնվիրվի։