Ձեր վստահելի աղբյուրը

«Մինչև օրս հստակ տեղեկություն չունենք, թե որն է եղել Արարատի մարզի Հովտաշեն համայնքում  արագիլների աղտոտման առաջացման աղբյուրը։ Դեռ 2016 թվականին ենք ահազանգել նույն տարածքի հետ կապված, փորձել ենք հասկանալ աղտոտման աղբյուրը։ Տեսչական մարմինն ոչինչ չարեց այն ժամանակ, հիմա էլ չի անում»,- Panorama.am-ի հետ զրույցում ասաց «Թռչնասերների կենտրոն» հասարակական կազմակերպության ղեկավար, բնապահպան Սիլվա Ադամյանը:

Բնապահպանության և ընդերքի տեսչական մարմնից հայտնել էին, որ արագիլների աղտոտվածության պատճառը Հովտաշեն համայնքի շրջակայքի ջրային տարածքներում առկա յուղային շերտի առկայությունն է, սակայն Ս. Ադամյանի խոսքով, որևէ հստակ տվյալ չկա, միայն ենթադրություններ են։ 

«Չեմ ժխտում, որ կարող է նման բան լինել, բայց խնդիրը հետևյալն է. որևէ մեկը դրանով չի զբաղվել, ոչ պատասխանատվության է բերվել, եթե գիտենք, թե իրական աղտոտման աղբյուրը որտեղից է։ Մինչև այսօր չգիտենք, թե ինչ է քննիչի մոտ։ Հետաքննությունը սկսվել է, բայց դրա վերջը ոնց որ թե չի երևում։ Օրերս ԳԱԱ կենդանաբանության ինստիտուտի գիտնականները ելույթ էին ունեցել, շեշտը դրել էին նրա վրա, որ հստակ տեղեկություն չունեն, թե որտեղից էր աղտոտումը գալիս»,- ասաց բնապահպանը։

Նրա խոսքով, այս պահին աղտոտումը դադարեցված է, պրոցեսը կանգնած է, սակայն հետո ինչ կլինի, չեն կարող ասել. «Ինչքա՞ն պետք է մեր  կենդանաբանները, բնապահանները մեկնեն տարածքներ, մաքրեն թռչուններին։ Կարող է անընդհատ պրոցես լինի, անընդհատ կրկնվի այդ իրավիճակը»։

Խոսելով աղտոտված ու մարքված արագիլների մասին, Ս. Ադամյանը հույս հայտնեց, որ լավ վիճակում կլինեն, որովհետև մասնագետների կողմից են մաքրվել։

«Կարող է խնդիրներ լինի այն մասի հետ, որոնք լավ չեն մաքրվել կամ ուղղակի մեր կամավորները, մասնագետները չեն հայտնաբերել ու մաքրել։ Կենդանաբանները շարունակում են ուսումնասիրել, հետազոտել մաքրված թռչուններին, հետևում են ձագուկներին։ Մաքրված արագիլները կարողանում են թռչել, կերակրվել, իսկ եթե կարողանում են թռչել, կարծում եմ, վտանգ չի սպառնում։ Իհարկե, կարող են լինել առանձնյակներ, որոնք վնասված լինեն, սակայն մասսայական խոսել այն մասին, որ մաքրված կենդանիները վտանգ է սպառնում, չեմ կարծում»։

Նա նշեց, որ երբ տեղի բնակիչներն ահազանգել են խնդրի մասին, արդեն նկատել էին 4-5 սատկած առանձյակ հենց աղտոտվածության պատճառով, բներում ձագերի սատկելու դեպքեր նույնպես արձանագրվել են։

«Կենդանաբանները բարձրաձայնում են, որ մոտավոր 60 ձագից 30-ն է մնացել։ Չէին կարող ձագերի հետ խնդիրներ չլիներ»,- ասաց նա։

Սիլվա Ադամյանն իր խոսքում ընդգծեց, որ այն, ինչ տեղի ունեցավ, բնապահպանական լուրջ աղետ է։

«Ուրախ եմ, որ այդքան լավ բնապահպաններ, կենդանասերներ ունենք, մարդիկ ոչ մի շահ չունենալով մեկնել էին թռչուններին օգնելու։ Եթե կամավորական շարժումը չլիներ, մինչև պատկան մարմինները տեղից շարժվեին, ոչինչ չէր մնալու, մեծ կորուստներ կունենայինք։ Բայց այս պրոցեսը կարող է կրկնվել, վտանգը կա»,- ասաց նա։