Օրենքն ընդունվելու է և կոռումպացված փողերը մինչև վերջին կոպեկը հետ են բերվելու. Փաշինյան
Հնարավոր չէ, որ Կառավարությունը հետ կանգնի «Բանկային գաղտնիքի մասին» օրենքում փոփոխություններ կատարելու նախագծից և այն ԱԺ չուղարկի: Այս մասին այսօրվա մամուլի ասուլիսում հայտարարեց վարչապետ Նիկոլ Փաշինյանը:
«Բոլոր նրանք, որոնք այս որոշման հետ կապված ուղղակի աղմուկ են բարձրացնում, այդ աղմուկը բարձրացնելու հիմքեր չունեն: Ես մի առիթով ասել եմ, որ կոռուպցիայի դեմ պայքարի ինտիտուցիոնալ մակարդակով մենք պետք է սկանդինավյան երկրների մակարդակ ունենանք։ Որևէ մեկը կարո՞ղ է բացատրել՝ երբ այդ համակարգը գործում է սկանդինավյան երկրներում, եվրոպական երկրներում, ապա տնտեսությունն ինչի՞ չի փլուզվում»,- ասաց վարչապետը։
Նրա խոսքով՝ Կառավարության նիստին էլ ասել է, որ կոռուպցիայի դեմ կիսապայքար չպետք է լինի, այլ պետք է լինի լիարժեք պայքար։
«Մյուս կողմից էլ հանրությունն ասում է՝ թալանածը ինչի հետ չեք բերում: Ճիշտ են ասում, հետ բերում ենք, բայց բավարար տեմպերով հետ չենք բերում, քանի որ այդ կոռուպցիոն համակարգը, որ ստեղծվել է, ինքը իր համար օրենքներ ու սահմանափակումներ է ընդունել, որ դուք՝ որպես լրագրող, մենք բոլորս չկարողանանք հասանելիություն ունենանք և ամբողջական պատկերը տեսնենք: Ասում են՝ բա Սաշիկի փողերն ուր է, որի մասին ասում էին։ Չնայած վերջերս իրադարձություններ են ի հայտ գալիս, որ ես գալիս եմ եզրակացության՝ Սաշիկն այդ ընտանիքի ամենաանմեղ դեմքն ա»,-ասաց Նիկոլ Փաշինյանը:
Նրա խոսքով՝ օրենքի հետ կապված պետք չէ աղմուկ բարձրացնել, այդ օրենքն ընդունվելու է և կոռումպացված փողերը մինչև վերջին կոպեկը հետ են բերվելու ՀՀ պետական բյուջե, ծառայելու են բանակին և ՀՀ անվտանգությանը:
Վարչապետը նշեց, որ խոստացել են Արցախում մինչև 2020 թվականը պաշտպանության բանակի բոլոր զինծառայողների բնակարանային խնդիրները լուծել, այսինքն՝ տասնյակ տարիներով բնակարանի համար հերթագրված զինծառայողները բնակարան կունենան։ «Ու դա մեծ խնդիր չէ, մեր հաշվարկներով մոտավորապես 25 միլիարդ դրամի պատմություն է»,- ընդգծեց նա։
Փաշինյանը նաև ասաց, որ օրենքի ընդունումը չի նշանակում վերահսկել բոլորի բանկային գաղտնիքը։
Հիշեցնենք, որ կառավարության սեպտեմբերի 12-ի նիստում հաստատվել է «ՀՀ քրեական դատավարության օրենսգրքում լրացում կատարելու մասին» և «Բանկային գաղտնիքի մասին» օրենքների փոփոխությունների փաթեթը։ Այսպիսով, առաջարկվում է առանձին դեպքերում հնարավորություն ստեղծել ստանալ բանկային գաղտնիք կազմող տեղեկություններ առանց սուբեկտային սահմանափակման:
Միաժամանակ առաջարկվում է հանցագործությունների ցանկ, որոնցով հարուցված գործերով կարող է ներկայացվել նման միջնորդություն: Բացի այդ, քննիչը բանկային գաղտնիք կազմող տեղեկություններ ստանալու միջնորդություն կարող է ներկայացնել բացառապես դատախազի համաձայնությամբ և գլխավոր դատախազի կամ նրա տեղակալի հաստատմամբ։
Հարակից հրապարակումներ`
- Փորձում են ընթացիկ խնդիրների լուծման համար կոպիտ, բիրտ գործիքներ օգտագործել. Սուրեն Պարսյան
- Բանկային գաղտնիք. «Երբ այս օրինագիծը նման ձևակերպումներով ընդունվի, շատերը խնդիրներ են ունենալու»
- Կենտրոնական բանկ. Բանկային գաղտնիքի ինստիտուտը եղել և մնում է ֆինանսական կայունության հենասյուներից մեկը
- Երվանդ Վարոսյան. Հերթական չմտածված քայլը բնաջնջելու է Հայաստանի բանկային համակարգը
- Կամ պետք է ապօրինի միջամտություններ անեինք, կամ լուռ հետևեինք, թե ոնց են թալանվածը թաքցնում. վարչապետ
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ