Ձեր վստահելի աղբյուրը

Սեպտեմբերի 29-ին Թեոդոսիայի պատկերասրահում կայանալիք պարահանդեսին ելույթ կունենա հայազգի հայտնի ծովանկարիչ Հովհաննես Այվազովսկու ժառանգը՝ պրոֆեսիոնալ երաժիշտ Ջորջիա Լոուն Ավստրալիայից: kulturomania.ru-ի հաղորդմամբ, պատկերասրահի տնօրեն Տատյանա Գայդուկի խոսքով, Լոուն մենահամերգ կտա:

«Այվազովսկու ժառանգներից մեկը՝ Ջորջիա Լոուն, նվագում է տավիղ և հանդես  է գալիս Սիդնեյի սիմֆոնիկ նվագախմբի հետ»,- ասել է Գայդուկը:

Ծրագրում Չայկովսկու, Գլինկայի, Խաչատրյանի, Գլիերի ստեղծագործություններն են: Բացի Լոուից Ավստրալիայից Թեոդոսիա կգան նաև Այվազովսկի ընտանիքի ևս երեք ներկայացուցիչ:

Հովհաննես Այվազովսկին ծնվել է 1817 թվականին  Ղրիմում՝ Թեոդոսիա քաղաքում, աղքատ հայ ընտանիքում։ Իր ընտանիքի ազգանունն Այվազյան էր։ Թեոդոսիայի հայկական եկեղեցու ծննդյան և մկրտության մատյանում Այվազովսկու ծնունդը գրանցված է՝ Գևորգ Այվազյանի որդի Հովհաննես: Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ Նրա՝ որպես նկարչի տաղանդը, իր համար ճանապարհ է բացել դեպի Սիմֆերոպոլ քաղաքի գիմնազիա, իսկ հետագայում՝ դեպի Սանկտ Պետերբուրգի գեղարվեստի ակադեմիա, որը Հովհաննես Այվազովսկին ավարտեց ոսկե մեդալով։ Ստեղծել է 6000-ից ավելի կտավ, հիմնականում ծովանկարներ: Նա չի անտեսել նաև հայրենի բնաշխարհը, հայկական թեմատիկան: Աշխատել է շատ արագ, տեսողական վիթխարի հիշողությամբ։ Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։ Հ.Այվազովսկին վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացու խոսքերը. «Մահկանացու ծնեալ անմահ զիւրն ։