Ձեր վստահելի աղբյուրը

Ազգային անվտանգության ծառայությունը պետականության տեսանկյունից մեծ հարգանքի է արժանի, այդտեղ աշխատող մարդիկ կարևոր գործառույթ են իրականացնում պետության համար: ԱԱԾ շենքի դիմաց լրագրողների հետ զրույցում ասաց «Իրավական ուղի» ՀԿ համահիմնադիր, արդարադատության նախկին փոխնախարար, Արցախի նախկին ՄԻՊ Ռուբեն Մելիքյանը:

«Ցավոք սրտի այսօր այստեղ ենք, որովհետև երեկ եղավ մի փաստ, որն, իմ պատկերացմամբ,  ոչ միայն իրավական, նաև բարոյական  կարմիր գծերի տրորում էր: Չէի ուզի, որ ինչ-ինչ պատճառներով որևէ սխալ գործողությունների համար հենց ԱԱԾ-ի՝ որպես կառուցի հեղինակությունը նվազեր: Պետական ինստիտուտ  է, պետք է հարգենք մեր պետական ինստիտուտներն անկախ քաղաքական և այլ հայացքներից»,- ասաց նա:
 
Հիշեցնենք, որ այսօր ԱԱԾ հարցաքննության են կանչվել ՍԴ նախագահ Հրայր Թովմասյանի հայրն ու դուստրերը:

ԱԱԾ շենքի դիմաց է նաև ՀՅԴ-ական գործիչ Լիլիթ Գալստյանը: Նրա խոսքով, այս ամբողջ գործընթացն, ինչի մեջ հայտնվել է Սահմանադրական դատարանն ու հատկապես ՍԴ նախագահ Հրայր Թովմասյանի և նրա ընտանիքի դեմ, հիշեցնում է 1937 թվականը, որովհետև սա 1937 թվականի գործիքակազմից օգտված մեթոդաբանություն է:

«Սա պարզապես քաղաքական ճնշում է, այլևս վերածվել է մարդկային ճնշումի: Ուղղակի աներևակայելի է, թե ինչ կարմիր գծեր են հատվում: Հրայր Թովմասյանից ՍԴ նախագահի  պաշտոնը կորզելու ճանապարհին որևէ կարմիր գիծ  հատելու բարոյական զսպանակները  չունեն: Պարզապես մարդկային չէ մտնել ընտանիքի դաշտ, մարդկային, բարոյական որևէ գնահատականի չի դիմանում: Չի կարելի ընտանիքի անդամներին ճնշումների ճանապարհով պատանդ դարձնել՝ ճնշելու հորը՝ Սահմանադրական դատարանը ներկայացնող նախագահին: Պարզպաես անընդունելի է: Մենք մտնում ենք մի քաղաքական մշակույթի մեջ, որը խստորեն վտանգում է Հայաստանի ապագան և ժողովրդավարական պետության հետ որևէ առնչություն չունի։ Սա կապ չունի սիրո, թավիշի, հանդուրժողականության լոզունգների հետ»,- ասաց Լ. Գալստյանը:

Նրա կարծիքով, իշխանությունը սեփական վարկանիշի, բարոյականության մասին մտածելով, պետք է զերծ մնա այդ քայլերից: ՀՅԴ-ական գործչի խոսքով, դատարանների նկատմամբ ճնշումները բնական են դարձել, ցանկալի վճիռներ կորզելու գործիքներ են:

«Սահմանադրական դատարանի և դատական իշխանության նկատմամբ ճնշումները պարզապես  ակնհայտ են և դրանք ուղղված են քաղաքական մենատիրության»,- ընդգծեց Լիլիթ Գալստյանը: