Իր դռներն է բացել Հայաստանի ամենամեծ մոլը՝ «Մեգամոլ Արմենիա»-ն
Հայաստանի ամենամեծ մոլը՝ «Մեգամոլ Արմենիան», իր դռները բացեց այցելուների համար։ Այն ընդարձակ ու լուսավոր առևտրի կենտրոն է, որտեղ ավանդական հայկական ճարտարապետական էլեմենտները համակցված են ժամանակակից աշխարհի արդի և կրեատիվ լուծումներին: Ավելի քան 98 հազար քմ տարածք զբաղեցնող մոլը բաղկացած է 6 հարկից, որոնցից 3-ը ստորգետնյա են:
«Մեգամոլ Արմենիա»-ի գործադիր տնօրեն Դավիթ Մարտիրոսյանը բացման հանդիսավոր արարողության ժամանակ լրագրողների հետ զրույցում շեշտեց, որ յուրաքանչյուր մանրունք նախագծելիս առավելապես ուշադրություն է դարձվել դրա արմատներին ու նշանակությանը:
«Առևտրի կենտրոնը համապատասխանում է մոլի միջազգային չափանիշներին և առավելապես ծառայելու է այցելուների հարմարավետությանը: Կա 100-ից ավելի բրենդային խանութ, որոնք բացվել են նոր և ամենամեծ կոնցեպտներով, ինչի արդյունքում էլ ստեղծվել են բազմաթիվ աշխատատեղեր: Բացի արդեն ծանոթ բրենդներից՝ մեզ մոտ առկա են նաև մի շարք բոլորովին նոր բրենդներ։ Այցելուները կկարողանան գտնել ցանկացած տարիքի և հետաքրքրություններին համապատասխանող խանութ-սրահներ»,- նշեց Մարտիրոսյանը։
Այնտեղ գործելու է նաև Անդրկովկասի ամենամեծ խաղահրապարակը, կինոթատրոն, ռեստորան-սրճարաններ, ֆուդկորտ: Խաղահրապարակում կա Formula 1 կարտինգ, որի մրցուղու երկարությունը շուրջ 1.2 կմ է, որտեղ հնարավոր կլինի վարել մինչև 65 կմ/ժամ արագությամբ մեքենաներով: Կա մագլցման պատ, ինչպես նաև երեք հարկանի պարանների քաղաք: Իսկ ինը հարկանի լաբիրինթի ներսում նույնիսկ սանհանգույցներ կան երեխաների համար:
«Մեգամոլ Արմենիա»-ում կգործի Սինեմա սթար կինոթատրոն՝ 4 դահլիճներով, 750 մարդու համար նախատեսված ֆուդկորտ, որը կներկայացնի ամբողջ աշխարհի գրեթե բոլոր համերը, ինչպես նաև ամենամեծ «Երևան սիթի» սուպերմարկետը, որն ունի ավելի քան 8 հազար քմ տարածք: Այնտեղ տեղում կբովվի սուրճ, կպատրաստվեն կոնֆետներ, գարեջուր, պանրի մի քանի տեսակ, կաթնաշոռ:
Առևտրի կենտրոնն ունի մեգա կայանատեղի, ինչպես նաև անվճար տաքսի ծառայություն, որը հաճախորդին խանութներից կտեղափոխի մուտքի մոտ:
«Մոլի -1, -2, -3 հարկերում գործում է շուրջ 1800 մեքենայի համար նախատեսված կայանատեղի: Այնտեղ ներդրված է smart համակարգ, որն այցելուներին հնարավորություն կտա լուսացույցի կարմիր և կանաչ գույների օգնությամբ հեշտությամբ կողմնորոշվել տարածքում: Կայանատեղիի բոլոր կողմերում կան վերելակներ, իսկ մեջտեղի հատվածում՝ նաև շարժասանդուղք: Այժմ ավելացվում է ևս մեկ հարկ, որը նախատեսված է եղել միայն աշխատակիցների համար, սակայն այն նույնպես կմիացվի մոլին, որպեսզի կարողանանք լիարժեք սպասարկել մեր հաճախորդներին: Կունենանք նաև մոտ 2000 մեքենայի համար նախատեսված դրսի ավտոկայանատեղի»,- ներկայացրեց Մարտիրոսյանը։
Ինչ վերաբերում է անվտանգության կանոններին՝ գործադիր տնօրենը հայտնեց, որ շենքը հագեցած է հակահրդեհային և ծխահեռացման համակարգի ամենավերջին տեխնոլոգիաներով. «Տարածքի բոլոր համակարգերը միացված են համակարգիչներին և անվտանգության աշխատակիցները պարտադիր վերահսկելու են այդ ամենը: Մոլի բոլոր հարկերում, ինչպես նաև խաղահրապարակում առկա են տարհանման ելքեր»։
Մոլում է տեղակայված նաև Գինեսի ռեկորդների գրքում գրանցված շատրվանը, որը ևս միակն է տարածաշրջանում:
«Համակարգչային շատրվանը ջրի միջոցով արտապատկերում է նկարներ, լոգոներ, նախադասություններ և բառեր: «Մեգամոլ Արմենիա»-ում է գտնվում նաև Մինաս Ավետիսյանի «Գիշեր» որմնանկարը (1973 թ.): Այն վերականգնվել է իտալացի մասնագետների կողմից՝ Ֆաբրիցիո Իակոբինիի գլխավորությամբ: Այն համարվում է պատմամշակութային հուշարձան և ՀՀ սեփականությունն է»,- տեղեկացրեց գործադիր տնօրենը։
Տարածքում կան կամուրջներ, որոնք ունեն իրենց անվանումները՝ Սփյուռքի, Ծաղիկների, Սիրահարների, Երազանքների և Երաժշտության, որտեղ մշտապես կհնչեն հայ երգիչների և կոմպոզիտորների ստեղծագործություններ: Այստեղ վաճառվելու են համերգի, օպերայի և բալետի, թատերական ներկայացումների տոմսեր։
Դավիթ Մարտիրոսյանը հավելեց, որ կամուրջներն առաջին հերթին կօգնեն այցելուներին հեշտ կողմնորոշվել մեգա տարածքում:
Նշենք, որ «Մեգամոլ Արմենիա»-ի կառուցումը տևել է 5 տարի:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը