Ձեր վստահելի աղբյուրը

«Գրիգոր Լուսավորիչ» բժշկական կենտրոնում բարեհաջող ելքով ամենահազվագյուտ պոլիռադիկուլոնեյրոպաթիայի կլինիկական դեպք է արձանագրվել՝ AMSAN։ ԲԿ-ի մամուլի ծառայությունից ներկայացնում են դեպքի մանրամասները՝ նշելով, որ հիվանդությունը հանդիպում է տարեկան 3 մլն պոպուլյացիայում մեկ մարդու մոտ։

«Պացիենտը՝ 47 տարեկան կին, սեպտեմբերի 25-26 -ին սկսել է գանգատվել ոտքերի  ուժեղ ցավերից: Գանգատների սկզբից մոտ մեկ ամիս առաջ կրել է սուր շնչական վարակ: Ցավերի սկզբից երկու օր անց գանգատներին միացել է ոտքերում թմրածության զգացումը, որը սկսել է ոտնաթաթից և աստիճանաբար տարածվել մինչև պորտի մակարդակ: Թմրածության հետ միաժամանակ ոտքերում դիտվել է թուլություն, որը աստիճանաբար խորացել է: 01.10.2019թ. դիմել են մեկ այլ բժշկական հաստատություն, հոսպիտազիցավել են արտահայտված ցավերի, քայլքի անկարողության և միզակապության ախտանիշերով: Կատարվել են լաբորատոր և գործիքային հետազոտություններ (համապատասխան բիոքիմիական տվյալներ, ԷՆՄԳ, գոտկային պունկցիա՝ ուղեղողնուղեղային հեղուկի հետազոտությամբ, ողնաշարի կրծքագոտկային հատվածի ՄՌՏ հետազոտություն), կասկածվել է սուր պոլիռադիկուլոնեյրոպաթիա, սակայն համապատասխան բուժում չի տարվել: Պացիենտի հարազատները 07.10.2019թ. դիմել են Սուրբ Գրիգոր Լուսավորիչ ԲԿ  նյարդաբանության բաժանմունք՝ ներկայացնելով առկա տվյալները, ախտորոշման և բուժման երկրորդ կարծիքի նպատակով:

Ըստ ներկայացված տվյալների պացիենտի մոտ առկա էր սուր մոտոր, սենսոր աքսոնալ պոլիռադիկուլոնեյրոպաթիա, պացիենտի հարազատներին բացատրվել էր հիվանդության բուժման հրատապությունը: 11.10.2019թ. պացիենտի և հարազատների ցանկությամբ պացիենտը տեղափոխվել է մեր կենտորն և հոսպիտալիզացվել է ընդհանուր նյարդաբանության բաժանմունք: Ընդունման պահին պահպանվում էր արտահայտված ցավային համախտանիշը, զգացողության խանգարումները և ոտքերի թուլությունը՝ պացիենտը անկարող էր քայլել: Զննման և լրացուցիչ հետազոտությունների  արդյունքում վերահաստատվել է նախնական ախտորոշումը՝ պացիենտի մոտ առկա էր սուր մոտոր, սենսոր աքսոնալ պոլիռադիկուլոնեյրոպաթիա (AMSAN), որը հանդիսանում է Գիյան Բարեի համախտանիշի ամենահազվադեպ և ամենածանր կլինիկական ընթացքով տարբերակը, որի ժամանակ ախտահարվում են ծայրամասային նյարդերը՝ արտահայտվելով զգացողական խանգարումներով և պարեզներով, որոնք կարող են ընդգրկել բոլոր կմախքային մկանները, այդ թվում շնչական մկանները և պացիենտը հաճախ միացվում է թոքերի արհեստական օդափոխության սարքին:

Հիվանդությունը հանդիպում է տարեկան 3 մլն պոպուլյացիայում մեկ մարդու մոտ: Խնդրի դեպքում բուժումը պետք է սկսել առաջին օրերին, քանի որ վերականգնաման հնարավորությունը ավելի ուշ սկսված բուժման դեպքում կտրուկ նվազում է: Հրատապ որոշվել է բուժման պլանը և քանի որ արդեն իսկ բավականին շատ ժամանակ էր կորսված, սկսվել է ագրեսիվ բազմակոմպոնենտ բուժումը՝ պլազմոֆերեզ և պուլս թերապիա մեթիլպրեդնիզոլոնով: Չնայած վերականգանման փոքր հնարավորությանը, բուժման 3րդ օրը պացիենտի զգացողական խանգարումները նահանջել են, իսկ 4րդ օրը արդեն սկսել է քայլել: Կապ է հաստատվել Ֆրանսիայի Լիմոժ քաղաքի համալսարանական հիվանդանոցի նյարդամկանային հիվանդությունների և նեյրոպաթիաների ազգային կենտրոնի հետ, մեր գործընկերները՝  աշխարհահռչակ նյարդաբան պրոֆեսոր Ժան Միշել Վալլատի գլխավորությամբ պատրաստակամություն են հայտնել անվճար իրականացնել մի շարք դժվարամատչելի լաբորատոր քննություններ, ինչպիսին են Ռանվեյի սեղմվածքների սպիտակուցների դեմ հակամարմինները,  NF155, contactine, caspr1, NF186 և այլն: Նշենք որ վերոնշյալ հետազոտությունները խսիտ կարևոր են վերջնական ախտորոշման և բուժման հետագա պլանի համար:

Նշված տեստերը իրականացվում են եվրոպական քիչ քաղաքներում և ընդհանուր արժեքը գերազանցում է 2000 եվրոն: Պացիենտից վերցվել է արյուն և ուղարկվել Ֆրանսիայի մեր գործընկերներին : 25.10.2019թ. պացիենտը դուրս է գրվել ոտքերի մինիմալ թուլությամբ, քայլքը՝ ինքնուրույն, քիչ կողմնակի աջակցությամբ: Ուղեգրվել է վերականգնողական կենտրոն՝ ակտիվ ռեաբիլիտացիայի նպատակով: Պացիենտը հսկվելու է մոտակա ամիսներին մեր կողմից»։