Ձեր վստահելի աղբյուրը

Սահմանադրական կարգը տապելելու համար հինգ անձի է մեղադրանք առաջադրված, սակայն միայն ՀՀ երկրորդ նախագահ Ռոբերտ Քոչարյանն է անազատության մեջ: Երևանի ընդհանուր իրավասության դատարանում Ռոբերտ Քոչարյանի և մյուսների գործով  նիստում հայտարարեց Ռ. Քոչարյանի պաշտպաններից  Ռուբեն Սահակյանը՝ ներկայացնելով ՀՀ երկրորդ նախագահի նկատմամբ որպես խափանման միջոց գրավը կիրառելու միջնորդությունը:

«Ես այս բանը հանգիստ եմ ասում, քանի որ նախորդ դատական նիստում գործընկերս՝ Միհրան Պողոսյանն, այդ մասին բարձրաձայնեց ու ասաց, որ անահավասարություն է ստացվում, որ մյուս մեղադրյալների մասով նույն պարագայում, նույն մեղադրանքի պայմաններում կիրառվում է խափանման միջոց, որը կապված չէ ազատազրկման հետ, բայց պարոն Քոչարյանի նկատմամբ այդ խափանման միջոցն ազատազրկումն է։ Մեզ մոտ ակամայից հարց է առաջացել ու մինչև օրս բարձրաձայնել ենք, որ միայն  այս հանգամանքն արդեն թույլ է տալիս մեզ ասելու, որ սա քաղաքական հետապնդման հետևանք է», - նշեց նա։

Այնուհետև Ռ. Սահակյանը  հարց բարձրացրեց, թե Ռ. Քոչարյանն ազատության մեջ լինելով ո՞ր գործողությանը կարող է խոչընդոտել:

«Արդյոք Ռոբերտ Քոչարյանը  կարող է խոչընդոտել ինքն իրեն և ասել՝ ցանկացել եմ կամ որոշել եմ կամ ես իմ ինչ եմ արել: Ես մեղադրանքի այդ մասը ո՞նց կարող եմ խոչընդոտել: Մեղադրանքի կողմը խոսեց պարկուճները փոխելու մասին: Մեղադրանքի մեջ կամ ամբողջ գործում որևէ տեղ կա՞ գրված՝ Քոչարյանը փորձել է, կատարել է, հանձնարարել է այդ գործողությունը կատարել։ Հետևաբար ինչպե՞ս կարող է նա խոչընդոտել:

Սահմանադրական դատարանի անդամների վրա ճնշում գործադրելը... եթե այդ անձիք չեն հարցաքննվել, սա խայտառակություն է, որ մեղադրանքը կա, բայց Սահմանադրական դատարանի  անդամները հարցաքննված չեն, դրա փոխարեն հարցաքննված են Սահմանադրական դատարանի  հավաքարարները:

Մեղադրանքի բովանդակությունում բազմաթիվ նման հանգամանքներ կան», - ասաց Ռ. Սահակյանը:

Հիշեցնենք, որ Երևանի ընդհանուր իրավասության դատարանը (Շենգավիթի նստավայր)՝ դատավոր Աննա Դանիբեկյանի նախագահությամբ, հեռացել է խորհրդակցական սենյակ ՀՀ երկրորդ նախագահ Ռոբերտ Քոչարյանի պաշտպանների ներկայացրած գրավի միջնորդության վերաբերյալ  դատական ակտ կայացնելու, որը  կհրապարակվի նոյեմբերի 7-ին, ժամը 12:00-ին։