Ձեր վստահելի աղբյուրը

Քաղաքապետարանը «գտել է» մայրաքաղաքի կենտրոնական փողոցների բեռնաթափման ուղին՝ այն է՝ արգելել ավտոմեքենաների կայանումը և բարձրացնել կայանատեղերի վճարը։ Վերջինից հետևում է, որ հնամաշ մեքենաները ընդամենը կփոխարինվեն թանկարժեք մեքենաներով։ Կլուծի՞ քաղաքացիների համար այս քայլը հիմնական խնդիրները՝ մեծ հարցական է։ 

Երևանի քաղաքակապետ Հայ Մարությանի անունը հաճախ է կապվում Չեխայի հետ։ Շրջանցենք դրանք, անդրադառնանք 2019 թվականին քաղաքապետարանի պատվիրակության՝ Պրահա և Չեխիայի այլ քաղաքներ գործուղման հնարավոր արդյունքներին։

Պրահայում, օրինակ, քաղաքի կենտրոնում չեք տեսնի ոչ մայթերը սեղմող մեքենաներ, ոչ փողոցները խցանող կայանատեղիներ։ Բայց և քաղաքացիներն ու զբոսաշրջիկներն էլ չեն բողոքում։ Ոչ որովհետև հետաքրքիր է քայլել քաղաքի կենտրոնով, այլ որ՝ կա արագ ու դրա համար՝ աննկատ աշխատող տրանսպորտ։ Հիմանականում՝ տրամվայ։ Քաղաքային ճիշտ քաղաքականության շնորհիվ քաղաքի կենտրոնում չեք տեսնում ոչ խռնված մեքենաներ, ոչ մարդիկ։

Այնպես որ՝ առանց տրանսպորտ ապահովելու Երևանում ուղղակի կայանատեղիները արգելել ու թանկացնել, նշանակում է մարդկանց քայլել տալ։

Առողջարար է, բայց դա չէ քաղաքապետարանի գործառույթը։

Որքանով է նպատակահարմար  քաղաքապետարանի նշյալ ծրագիրն իրականացնելը, և կոնկրետ որ երկրի կամ երկրների փորձն է կիրառելու այն՝  Panorama.am-ը խոսեց Երևանի քաղաքապետարանի մամուլի խոսնակ Հակոբ Կարապետյանի հետ։

«Ուզում եմ շատ հստակ շեշտել, որ այս պահին քաղաքապետարանում ավտոկայանման կարգի փոփոխության մասին որևէ քննարկում չկա, որևէ որոշում առավել ևս չկա»,- մեզ հետ զրույցում ասաց  Հակոբ Կարապետյանը։

Հակոբ Կարապետյանի խոսքով, մամուլում հրապարակումների հիմնական պատճառը Տիգրան Ավինյանի խորհրդական Ավետիք էլոյանի հայտարարությունն էր, ըստ որի՝ քաղաքապետարանի հետ զուգահեռ կառավարությունը մշակում է խոշորածավալ 150 մլն դոլարանոց փաթեթ, որը պետք է բարելավի ամբողջ տրանսպորտային համակարգը:

Մեր հարցին, թե արդյոք ավտոկայանման կարգի փոփոխությունը և կայանատեղիների գնի բարձրացումը քաղաքի կենտրոնը բեռնաթափելու լավագույն տարբերակն է, Հակոբ Կարապետյանը պատասխանեց՝  կայանատեղերի կազմակերպման հարցում որևէ փոփոխություն հնարավոր է միայն տրանսպորտային ռեֆորմի ընթացքում կամ ռեֆորմից հետո։

«Ցանկացած որոշում՝ դա կլինի թանկացում, էժանացում, բնականաբար հանրային քննարկումների փուլով կանցնի»,- նշեց Կարապետյանը։

Պրահայի տրանսպորտային օրինակի մեր մեջբերմանը Հակոբ Կարապետյանը արձագանքեց. «Մենք  ուսումնասիրում ենք մի շարք եվրոպական երկրների, այդ թվում Երևանի հետ կենսամակարդակով, չափսերով և բնակչության քանակով համեմատելի քաղաքների փորձը»։

Հիշեցնենք, որ «Հայկական ժամանակի» հետ զրույցում Հակոբ Կարապետյանը նշել էր՝  որոշ փողոցներում կլինի կայանման արգելք, որոշներում՝ կայանման վճարի գոտիավորման կիրառում, որոշ տեղերում (հիմնականում կենտրոնի մի շարք հատվածներում) կայանումն ավելի թանկ կլինի, որոշներում՝ էժան, որոշ տեղեր դարձյալ անվճար կմնան:

«Երեւանում հիմա էլ է այդպես, բայց կարծում ենք՝ վերանայման կարիք կա»,- ասել էր Հակոբ Կարապետյանը։

Իսկ թե ինչով էր պայմանավորված Ավետիք Էլոյանի նման հայտարարությունը, Հակոբ Կարապետյանը չմեկնաբանեց։