Ձեր վստահելի աղբյուրը

«Եկեք լուրջ դեմքերով ձև չանենք, թե մենք պետական կառավարման համակարգում ունենք ՝ ռազմավարություններ մշակելու պոտենցիալ»,- կառավարության այսօրվա նիստում Պետական եկամուտների կոմիտեի 2020-2024 թվականների զարգացման և վարչարարության բարելավման ռազմավարական ծրագիրը հաստատելու մասին հարցի քննարկման ժամանակ ասաց վարչապետ Նիկոլ Փաշինյանը:

Նրա խոսքով՝ մեկ-մեկ նախարարություններից թղթեր են գալիս, որ կարդալուց հետո ուզում է ասել՝ ո՞ր դասարանի երեխա է գրել:

Նիկոլ Փաշինյանը նշեց՝  եթե այսօր հայտարարեն, որ պետական համակարգում թափուր աշխատատեղեր կան, աշխատանքի հրավերի դեպքում քիչ թվով մարդիկ կարձագանքեն, իսկ նրանց մի մասն էլ չի ունենա համապատասխան գիտելիքներ և հմտություններ:

«Չեն ունենա, որովհետև մեր դպրոցներում սովորեցնում են բոլորովին ուրիշ բաներ: Երեխային կանգնեցնում են տաբուրետկայի վրա, ասում են՝ արտասանի, հետո՝ մի հատ էլ արտասանի, շատ ավելի հայրենասիրական արտասանի, շա՜տ ավելի հայրենասիրական, որ ՀՀ նախագահը, վարչապետը գան, իրենց մասին բանաստեղծություն արտասանես»,- ասաց վարչապետը։

Նրա խոսքով՝ այդ համակարգը ստեղծողներն են, որ հիմա ասում են՝ բուհական համակարգում կիբերնետիկայի ֆակուլտետից ինչպես են ուզում հանել հայոց լեզվի և գրականության, պատմության առարկաների պարտադիր դասավանդումը։

Մինչդեռ, ըստ նրա, ոչ մեկ չի ասում, որ այդ առարկաներից անհրաժեշտ գիտելիքներ պետք է դպրոցում ստանալ։

«Եկեք թեստ անենք մեր պետական կառավարման համակարգում, ինչ գիտնականի մի տեղ դնում ես, պարզվում է՝ դիսերտացիայի կեսը կեղծ է։ Վերջում էլ դու ես մեղավոր դուրս գալիս, ասում է՝ բոլորինը կեղծ է, իմն էլ է կեղծ, ինչո՞ւ եք միայն ինձ վրա կենտրոնացել։ Ճիշտ է ասում մարդը։ Այս կեղծիքի միջավայրում մենք ինչքան ենք կարողանալու ապրել, անընդհատ կանգնել, ասել՝ տոներն անցնեն հետո կանենք, չի լինի այսպես»,- ասաց Նիկոլ Փաշինյանը։

Նրա խոսքով՝ տնտեսական բոլոր ցուցանիշները, հաջողություններն՝ արվել են ի հեճուկս պետական կառավարման համակարգի, ի հեճուկս նախարարությունների։

«Վարչապետի կաբինետում գիտե՞ք ինչ խոսակցություններ են տեղի ունեցել, ասում են՝ այդ ատկատները որ փակում եք, դրա արդյունքում այս տարի տնտեսական կոլապս ենք ունենալու, որովհետև ավելի լավ է կապիտալ ծախսերն ինչ-որ տեղ գնա, որ փողը պտտվի, բայց գոնե արդյունք կունենանք։ Ես կրկին ասում եմ, որ այս ամենն ի հեճուկս պետական կառավարման համակարգի է, ի հեճուկս նախարարությունների է, հերիք է այս կեղծիքի մեջ գանք ինչ-որ բան անենք»,- ընդգծեց նա։

Վարչապետի խոսքով՝ Հայաստանում կոռուպցիայի դեմ պայքարը նորից տեղի է ունենում ի հեճուկս պետական կառավարման համակարգի, որովհետև ամբողջ իրավապահ համակարգին պետք է ժամանակ առ  ժամանակ ասել՝ իսկ ի՞նչ եղավ։

«Ու պատճառ միշտ էլ կգտնվի։ Այն օրն ասացի՝ իսկ ինչո՞ւ նրանք սպանեցին արքայազն Համլետին: Որ ուրիշ պատճառ չլինի, այս պատճառը միշտ էլ կա: Միշտ պատճառ կա՝ փորձաքննություն է, այն մեկը փախավ, այն մեկը ուզում է փախչի, մյուսը ցուցմունք չի տալիս։ Եվ եկեք արձանագրենք, որ ամբողջ պետական համակարգը, այո՛, հեղափոխությանը դիմադրում է։ Եվ այդ դիմադրությունը ես ջարդելու եմ, չկա ուրիշ տարբերակ, քանի որ ՀՀ ժողովուրդն անձամբ ինձ ու իմ քաղաքական թիմին ձայն է տվել, որ այս երկրում փոփոխություն տեղի ունենա, ոչ թե տարբեր առիթներով անընդհատ պտտվենք, պտտվենք, պտտվենք։ Հերիք է այս կեղծիքի մեջ մենք անընդհատ ապրենք»,- նշեց վարչապետը։