«Լուսավոր Հայաստանի» կարճաժամկետ և երկարաժամկետ նպատակները
«Ներկայումս մենք գտվում ենք շատ դժվարին ժամանակներում: Հայաստանի և նրա հետ միասին ողջ քաղաքական համակարգը գտնվում է անցումային շրջափուլում, ինչը լրջագույն մարտահրավեր է յուրաքանչյուր պետության համար»,- «Լուսավոր Հայաստան» կուսակցության հիմնադրման 4-ամյակին նվիրված միջոցառմանն ասաց կուսակցության նախագահ Էդմոն Մարուքյանը:
Նրա խոսքով, իրենց համոզմամբ, ինչպես այս, այնպես էլ ցանկացած մարտահրավերի կանխարգելման միջոցները պայմանավորված են քաղաքական համակարգի որակով և կենսունակությամբ:
«Եթե մենք կարողանանք իսկապես կենսունակ և արդյունավետ քաղաքական միջավայր ձևավորել, ապա կկարողանանք նաև կայուն, զարգացող, ինքնիշխան, ժողովրդավարական, սոցիալական Հայաստան ունենալ»,- ասաց Է.Մարուքյանը:
Է. Մարուքյանի խոսքով, այս 4 տարիների ընթացում կուսակցությունն ունեցել են և նվաճումներ, և կորուստներ, վերելքներ ու ճգնաժամներ, միաժամանակ կարողացել են հաղթահարել բոլոր խոչընդոտներն ու դժվարությունները, որովհետև հավատարիմ են մնացել իրենց առաքելությանը, սկզբունքներին, այն գաղափարներին, որոնց կրողն ու ջատագովն են իրենք որպես անհատներ:
«Հեղափոխությունից հետո շատ ուժեր չկարողացան դիմակայել այդ մեծ փոփոխությանը, իսկ մենք կանք, ամուր ենք, վճռական խոսքը դեռևս, ըստ էության, առջևում է: Շատերը կանխատեսում էին «Լուսավոր Հայաստանի» անհետացումն ու կործանումը, բայց մենք ոչ միայն չկործանվեցինք, ընդհակառակը՝ արձանագրված փոփոխությունների եռապատկումից, քառապատկումից մեր գոյության իմաստն ավելի իմաստավորվեց»,-նշեց կուսակցության ղեկավարը:
Նա ասաց, որ իրենց կարճաժամկետ նպատակն է հանդես հալ հզոր, կենսունակ ընդդիմություն, իսկ ընդդիմադիր լինելը ինքնանպատակ չէ. «Մենք կառավարությանը երբևէ չենք քննադատել անիմաստ քննադատելու համար, մեր առաքելությունը եղել է և կա լինել իշխանության ամենահավանական, ամենահնարավոր մրցակիցն ու փոխարինողը»:
Նա նշեց, որ քաղաքականությունն ու աշխարհը չի կարող լինել սև ու սպիտակ, բազմագույն է, բազմաբևեռ, ինչն էլ հարստացնում է քաղաքական համակարգը, կյանքը, պրոցեսներին տալիս միս ու արյուն:
«Մենք ասում ենք, որ քաղաքականությունը հեղափոխական սրբերի, հերոսների և քաղաքական հանցագործների դիմակայություն չէ: Պետք է դուրս գանք այս քայքայիչ արհեստական շրջապտույտից և զբաղվենք իրական քաղաքական աշխատանքով: Այս շրջապտույտը տանում է բոլորիս էներգիան, ժամանակը, հանրային ուշադրությունը, սրա արդյունքում որևէ բան տեղից առաջ չի շարժվում:
Պետք է աշխատել, որը պետք է վերաբերի հանրության իրական խնդիրներին և հոգսերին, առանց որակյալ ընդդիմության Հայաստանի ապագան անորոշ է և առկախված:
Այս տեսանկյունից որպես հասուն հանրույթ պետք է դուրս գանք հեղափոխական հռետորաբանությունից, լծվել պետականաշինության գործին: Եթե այսօր իրական ընդդիմությունն իր առաքելությունը ձախողի, վստաբար ասում եմ՝ կձախողի նաև հեղափոխությունը, քանի որ քաղաքական համակարգը կմոնոպոլիզացվի, օրվա իշխանությունը կվերածվի մոնոպոլ դիրքեր ունեցող հրեշի»,- ասաց նա:
Էդմոն Մարուքյանը նշեց, որ իրենց երկարաժամկետ նպատակն է ժողովրդավարական ընտրությունների միջոցով իշխանության ստանձնումը, այս առումով ունեն լուրջ անելիքներ, առաջին հերթին քաղաքական նոր մշակույթի ձևավորման և լուսավորական գաղափարների տարածման տեսանկյունից:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան
