Մարալիկցիները փակել են Երևան-Գյումրի ճանապարհը
Շիրակի մարզի Մարալիկ քաղաքում բնակիչներն ու «Մարալիկի առողջության կենտրոն» ՓԲԸ մանկաբարձական ծառայության աշխատակիցները փակել են Երևան-Գյումրի ճանապարհը: Նրանք իրենց դժգոհությունն են հայտնում առողջապահության նախարարի որոշումից, որի համաձայն հունվարի 1-ից ծննդատան ծառայությունների ֆինանսավորումը դադարեցվում է, առողջապահական կենտրոնի ծննդաբերական բաժանմունքը՝ փակվում:
Panorama.am-ի հետ զրույցում Անի համայնքի /կենտրոն ք. Մարալիկ / ղեկավար Արտակ Գևորգյանն ասաց, որ աննախադեպ, դեկտեմբերի 30-ին բանավոր հանձնարարություն էր ստացվել, որ փակվելու է ծննդաբերական բաժանմունքը, երեկ, կարծես թե, ստացվել է արդեն նախարարի որոշումը:
«Առողջապահական կենտրոնները մարզպետարանների ենթակայության տակ են, կարգավորվում են նաև առողջապահության նախարարության կողմից, համայնքը որևէ դերակատարում չունի: Բայց անցյալ տարի, քանի որ առողջապահական հաստատությունը ֆինանսական դեֆիցիտ ուներ, համայնքն ավագանու որոշմամբ 1,5 միլիոն դրամով համաֆինանսավորում կատարեց, որպեսզի փակման խնդիր չառաջանար: Այս տարի, դեռևս տարին չսկսված, միանգամից որոշում է կայացվել փակել բաժանմունքն, ինչն առաջացրել է ազգաբնակչության, կոլեկտիվի վրդովմունքը: Այդ պատճառով նրանք փակել են ճանապարհը, կարծում են այդպես հարցին նոր ուշադրության կդարձվի, հարցի վերաբերյալ նոր որոշում կամ լուծումներ կփորձեն գտնել»,- ասաց համայնքի ղեկավարը:
Ա. Գևորգյանը նշեց, որ այս դեպքում 16 հոգի գործազուրկ է մնում, հղիները պետք է դիմեն մարզկենտրոն Գյումրի:
«Հարցի վերաբերյալ, եթե լիներ ինչ-որ առաջարկություններ, համայնքապետարանն իր ունեցած հնարավորությունների սահմաններում պատրաստակամ էր նորից օգնել, Անի տարածաշրջանում, որը խոշորացված համայնք է, 17 բնակավայր ունի, 80-90 կիլոմետր ձգվածություն, 23 հազար 500 բնակչություն, կարևոր է յուրաքանչյուր կառույցի գոյությունը համայնքի կարիքների, ազգաբնակչության սպասարկման համար»,- ասաց նա:
Անի համայնքի ղեկավարի խոսքով, քիչ առաջ բնակիչները հանդիպել են Շիրակի մարզպետ Տիգրան Պետրոսյանի հետ, բացատրություններ է տվել, սակայն ճանապարհը փակած քաղաքացիները պահանջում են հանդիպում առողջապահության նախարարի հետ կամ հարցի վերաբերյալ նոր մոտեցում:
Առողջապահության նախարարությունից հայտնում են, որ հետևում են Մարալիկում ծավալվով իրադարձություններին, որտեղ ծննդատան և հիվանդանոցի աշխատակիցները փակել են ճանապարհը:
«Ուզում ենք տեղեկացնել, որ առողջապահության նախարարության աշխատանքային խումբը մեկնել է Մարալիկ` հանդիպելու բուժանձնակազմին»,- տեղեկացնում են նախարարությունից:
Նախօրեին Մարալիկի ծննդօգնության ծառայությունների ֆինանսավորման դադարեցման շուրջ առողջապահության նախարարությունը նաև պարզաբանում էր տարածել. «Համաձայն Առողջապահության նախարարի 2018 թվականի հուլիսի 30-ի թիվ 1941- Ա հրամանով հաստատված ծննդօգնության բժշկական կազմակերպությունների գնահատման չափանիշների՝ առաջին մակարդակի ծննդատան գործունեության համար անհրաժեշտ է տարեկան առնվազն 150 ծննդի ապահովում։
Սահմանված թիվը պատահական չէ, քանի որ ավելի պակաս ծնունդների դեպքում ծննդօգնություն իրականացնող կազմակերպության գործունեությունն արդարացված չէ ծախս-արդյունավետության և, թե ինչն առավել կարևոր է՝ մայրական և նորածնային մահացության և հիվանդացության կանխարգելման տեսանկյունից, քանի որ փորձը ցույց է տալիս, որ ծնունդների փոքր թիվը ժամանակի ընթացքում անխուսափելիորեն հանգեցնում է նաև անձնակազմի մասնագիտական որակավորման կորստի։
Մարալիկի առողջության կենտրոնի մանկաբարձական ծառայության պարագայում այդ թիվը 2018 թվականին կազմել է 126, իսկ 2019-ին ծնունդների անկման միտումը շարունակվել և հասել է 105-ի:
Բացի դրանից ծննդօգնության ծառայությունը չունի վիրահատող մանկաբարձ-գինեկոլոգ, անեսթեզիոլոգ-ռեանիմատոլոգ և նեոնատոլոգ, ինչն ինքնին պոտենցիալ վտանգ է ներկայացնում ծննդկանի և նորածնի համար, քանի որ ցանկացած ծննդաբերություն՝ նույնիսկ չբարդացած, կարող է ունենալ անկանխատեսելի ընթացք և պահանջում է համապատասխան որակավորում ունեցող մասնագիտացված բուժանձնակազմի անհապաղ միջամտություն։
Հաշվի առնելով նշվածը՝ բնակչի համար շատ ավելի անվտանգ է ի սկզբանե դիմել կամ շտապօգնության ծառայության միջոցով տեղափոխվել շուրջօրյա հերթապահություն իրականացնող, մասնագիտական ներուժ և սարքավորումային բարձր կարողություն ունեցող մոտակա բուժհաստատություն, ինչը կնպաստի մայրական և նորածնային մահացության նվազեցմանն ուղղված առողջապահության նախարարության քաղաքականությանը։
Հավելենք նաև, որ սա վերաբերում է բոլոր այն ծննդատներին, որոնք չեն բավարարել այս պահանջները, բացառությամբ որոշների՝ պայմանավորված աշխարհագրական դիրքով»։
Նկատենք, որ եթե նախարարությունը առկա խնդիրները լուծում է հիվանդանոցներ փակելով, Հանրապետությունում կարող է թողնել մի 10 հիվանդանոց, դրանք էլ՝ Երևանում։
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
