Հակոբյան. ԱԳՆ-ն ուղղակի կրակն է ընկել Նիկոլ Փաշինյանի ձեռքը
«Արցախյան հիմնախնդրի վերաբերյալ Դուշանբեում ձեռք բերված բանավոր պայմանավորվածությունը կարողացավ ավելի բարձր արժեք ունենալ և տեղ գտնել հայտարարությունում, քան 2016-ի Ապրիլյանից հետո իսկապես ձեռք բերված դիվիդենտները, որոնք ունեցանք Վիեննայում ու Սանկտ Պետերբուրգում»,- «Արցախը մեծ փոփոխությունների նախաշեմին» խորագրով պանելային քննարկման ժամանակ ասաց քաղաքական գործիչ, նախկին պատգամավոր Ռուբեն Հակոբյանը:
Նա նշեց, երբ վարչապետ Նիկոլ Փաշինյանը հայտարարեց, որ պետք է այնպիսի լուծում գտնել, որը բավարարի երեք կողմին, պոպուլիզմ էր Եվրոպային սիրաշահելու համար:
«Եթե բանաձև ես առաջարկվում, պարտավոր ես նաև լուծումն առաջարկել: Վստահ եմ, որ Նիկոլ Փաշինյանը որևէ լուծում չի կարող առաջարկել, բայց այս ձևակերպից օգտվեցին եռանախագահողները, Ադրբեջանը»,- ասաց նա:
Ռ.Հակոբյանի խոսքով, այս բանակցային գործընթացը որոշակիորեն փակուղի մտցվեց Փաշինյանի հակասական, տարբեր ձևակերպումների պատճառով:
«Արտաքին գործերի նախարարությունն ուղղակի կրակն է ընկել Նիկոլ Փաշինյանի ձեռքը, ստիպված է միշտ հայտարարություններով արդարացնել այն, ինչ որ արդարացնել հնարավոր չէ»,- ասաց նա:
Քննարկմանը ներկա իրավապաշտպան Ռուբեն Մելիքյանը խոսեց Արցախի առաջիկա նախագահական ընտրությունների մասին: Նա նշեց, որ ըստ ժամանակացույցի, փետրվարի 5-15-ը կարող են ներկայացվել նախագահի թեկնածուների փաստաթղթերը, այնուհետև սկսվելու է նախընտրական քարոզարշավն ու ավարտվելու է քվեարկությամբ։
«Ես շատ եմ կարևորում, որպեսզի այս գործընթացն իրականացվի պատշաճ դիտորդական առաքելության պայմաններում», - ասաց նա։
Նրա խոսքով, հայաստանյան քաղաքացիական հասարակությունը պետք է մտածի Արցախի ընտրություններում ինչ-որ ձևաչափով դիտորդական առաքելություն իրականացնելու հնարավորություն գտնելու մասին։
«Սա երկու նպատակ է հետապնդում. առաջին՝ Արցախն ունենա իրավական լուրջ հիմքեր, երկրորդ՝ որպեսզի ընտրությունները հայաստանյան ներքաղաքական օրակարգի լույսի ներքո չդառնան քաղաքական շահարկման հարց», - ասաց Ռ. Մելիքյանը։
Հարակից հրապարակումներ`
- Դավիթ Շահնազարյան. Քլունգն առած՝ Փաշինյանը քանդում է Արցախի հասարակության միասնությունը
- Կարեն Բեքարյան. Փաշինյանի կողմից սեփական հանրության նկատմամբ կա հարգանքի լիակատար բացակայություն
- Հրանտ Մելիք-Շահնազարյան. Հայաստանն այդ ծափահարությունների ներքո իջնում, հավասարվում է աշխարհի ամենահետամնաց, ռեժիմներին