Ձեր վստահելի աղբյուրը

Արտակարգ իրավիճակների նախարարությունում օպտիմալացումներ կլինեն, սակայն կրճատումներ, որպես այդպիսին, շատ չեն լինի։Այս մասին այսօր լրագրողների հետ զրույցում նշեց ՀՀ ԱԻ նախարար Ֆելիքս Ցոլակյանը։

Նախարարը նշեց, որ կադրային օպտիմալացումն ընթացքի մեջ է, և ՊՈԱԿ-ները այլևս չեն գործելու։

Վերջինիս խոսքով, փրկարար ծառայությունում հաստիքների կրճատում ընդհանրապես չի լինելու, այլ լինելու է պաշտոնների կրճատում. «Արդյունքում՝ կենտրոնական ապարատում եղած շատ հաստիքներ գնացել են դեպի ներքևի օղակներ։ Օպտիմալացման արդյունքում փորձել ենք ուժեղացնել այն ստորաբաժանումները, որոնք անմիջական աշխատանքի և բնակչության հետ շփման մեջ են»։

Անդրադառնալով արտակարգ իրավիճակների թվին՝ Ցոլակյանը նշեց, որ 2019 թվականին դեպքերը աննախադեպ շատ էին։

«2018 թվականի համեմատ 2019 թվականին հրդեհների թիվն աճել է 55.2%-ով։ 2019 թվականին գրանցվել է  10237 հրդեհ, 3643-ով ավելի, քան 2018 թվականին։ Բոլոր մյուս ուղղություններով, որոնք համարվում են արտակարգ դեպքեր, եղել է աճ։ Դրանք վերաբերում են պայթյուններին, փլուզումներին, քարաթափումներին, ՃՏՊ-ներին»,- նշեց Ցոլակյանը։

Նախարարի խոսքով,  հրդեհների ժամանակ եղել են դեպքեր, երբ տեխնիկական հագեցվածություն չի եղել, և ամեն ինչ մնացել է հրշեջ-փրկարարների անձնական ընդունակությունների վրա. «Ցավոք, մենք նախորդ տարի ունեցանք մեկ զոհ և մեկ ծանր վիրավոր։ Էս տարի մենք մրցանակաբաշխություն էինք անցկացնում, և վիրավոր հրշեջը ճանաչվեց տարվա լավագույն հրշեջ»։

2018 թվականին ԱԻՆ փրկարար ծառայությունում դրամական  խրախուսում է ստացել 618 մարդ, իսկ 2019-ին՝ 3400։

«Հավասարաչափ է բաշխվել խրախուսման ֆոնդը, բայց հենց հիմա մեր մոտ մշակվում է բալային համակարգ, որպեսզի մենք տանք դրամական խրախուսում այնպես, որ լավ աշխատողը ստանա շատ, վատ աշխատողը քիչ ստանա, կամ չստանա» ,- նշեց Ցոլակյանը։

Ըստ նախարարի, ԱԻ նպատակը արտակարգ իրավիճակների կանխարգելումն է, այլ ոչ՝ դեպքի հետքերով գնալը։

«Կանխարգելման դեպքում մենք ունենում ենք վնասների շատ քիչ քանակ, և կարողանում ենք զերծ մնալ այն մեծ աղետներից, որոնք կարող են լինել էն դեպքում, երբ մենք կարողանում ենք կազմակերպել ռիսկի նվազեցում։ Էստեղ մենք շատ խնդիրներ ունենք։ 2019 թվականին մենք ականատես եղանք շատ մեծ քանակությամբ անտառային հրդեհների։ Բայց քանի որ գործ ունենք մարդկային գործոնի հետ, մենք չենք կարողանում կանխատեսել՝ որտեղ կլինի նման դեպք։ Այս տարի սկսել ենք աշխատանքներ, քանի որ ուենք նախորդ տարվա դառը փորձ։ Անտառներում մենք չունենք ճանապարհներ, չունենք պայմաններ, որ չլինի խոտ, որի վառվելով ամբողջ անտառն է վառվում։ Հենց հիմա Տավուշում մեր տղաները հրդեհ են հանգցնում։ Այնտեղ, որտեղ խոտը ցածր է, խոնավոթյան պատճառով հրդեհներ չեն լինում, իսկ որտեղ բարձր է, որտեղ անասունները չեն արածել, վառվում է խոտը և հրդեհը հասնում է անտառ»,- նշեց  Ցոլակյանը։

Նախարարը հավելեց, որ ձմռան ընթացքում գրանցվել են մեծաքանակ հրդեհներ։ Դրանք հիմնականում եղել են Լոռու և Տավուշի մարզերում։ Պատճառը երկու մազրերում էլ ձնածածկույթի բացակայությունն է։