Կարծում եմ, որ պատասխանը Հայրապետյանը կզգա ոչ միայն իր շորերի, այլ նաև ողջ մարմնի վրա. ԱԽՔ
Բանակում կան բարեփոխումներ, որոնք տեսանելի են, և կան տեղեր, որտեղ մենք դեռ հաջողություն չենք ունեցել։ Այսօր լրագրողների հետ զրույցում այս մասին նշեց ՀՀ ԱԽՔ Արմեն Գրիգորյանը՝ հավելելով, որ բանակում զինվորների ինքնասպանությունների դեպքերը կառավարության ուշադրության կենտրոնում է։
«Խնդիրը մեր օրակարգում է, և ցանկացած դեպք, նույնիսկ թեթև վնասվածքը մեզ համար ծանր միջադեպ է։ Մարդու կյանքի համար ցանկացած վատ զարգացում մեզ համար ամենավատ սցենարն է։ Մենք փորձում ենք աշխատանքներ կատարել, բանակում գոյություն ունեցող խնդիրների մի մասը նաև ավելի լայն կոնտեքստում հասարակական խնդիրներ են։ Եվ կարող եմ հստակ ասել, որ քրեական մշակույթի դեմ պայքարը նաև նպատակ ունի բանակում բարեփոխումներին նպաստելու։ Մեր ուսումնասիրությունները ցույց են տվել, որ բանակում խնդիրների մի մասը հնարավոր չի լինելու բանակի բարեփոխումներով լուծել։ Եվ այդ է պատճառը, որ կառավարության օրակարգում է քրեական մշակույթի դեմ պայքարը»,- նշեց Գրիգորյանը։
Վերջինիս խոսքով, չկա մեկ քաղաքական փոփոխություն կամ քաղաքականության փոփոխություն, որով հնարավոր կլինի հանրության ուշադրության կենտրոնում հայտնված այդ խնդիրը լուծել.
«Բայց մենք կատարում ենք առավելագույնը նաև ուսումնասիրությունների միջոցով։ Հուսով եմ, որ ընդհանուր բարեփոխումները կարող են ազդել նաև, որ այստեղ ունենանք դրական տեղաշարժ»։
Հարցին, թե արդյոք կոռուպցիոն ռիսկ չկա, որ չի հերքվել՝ ՊԲ հրամանատարի որդին, հակահետախուզության բարձրաստիճան պաշտոնյայի որդին, ԱԱԾ բարձրաստիճան պաշտոնյայի որդին նույն զորամասում են հայտնվել, Գրիգորյանը պատասխանեց՝ խնդիրը բազմաշերտ և խորքային է։
«Մենք գնում ենք լուծումների ճանապարհով, որոնք շուտով տեսանելի կլինեն։ Հաշվի առնելով բանակի առանձնահատկությունը, որոշ դեպքերում փակ կառույց լինելով, դժվար է հրապարակային խոսել։ Վարչապետի օրակարգում է խնդիրները լուծել»,- նշեց Գրիգորյանը։
Անդրադառնալով ՀՖՖ նախկին նախագահ Ռուբեն Հայրապետյանի՝ «ոտքերը իրավապահների վրա» սրբելու մասին հայտարարությանը, Գրիգորյանը նշեց, որ պատասխանը նա կզգա ոչ միայն իր շորերի, այլ նաև ողջ մարմնի վրա։
Գրիգորյանը նշեց, որ ոստիկանությունն այդ խոսքերի համար չի կարող իրեն նույն կերպ դրսևորել, ինչպես Հայրապետյանը, քանի որ ոստիկանությունը սահմանափակված է օրենքով իր գործառույթները կատարելու. «Անպատասխանատու հայտարարություն է, բայց կարծում եմ, որ պատասխանը նա կզգա ոչ միայն իր շորերի, այլ նաև ողջ մարմնի վրա»։
Հարակից հրապարակումներ`
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը