Ձեր վստահելի աղբյուրը

«Գնացեք, ժողովրդին հարցրեք, ինքն իր տեսակետն ու մոտեցումը կասի»,-այսօր լրագրողների հետ զրույցում ասաց ԱԺ «Բարգավաճ Հայաստան» խմբակցության ղեկավար Գագիկ Ծառուկյանը՝ պատասխանելով հարիցին, թե արդյոք սահմանադրական փոփոխություններին քաղաքացին կասի այո։

Ծառուկյանը նշեց, որ ԲՀԿ-ն քաղխորհրդի նիստ է հրավիրելու՝ որոշելու «այո»-ի ճամբարում է լինելու, թե «ոչ»-ի. «Մենք կքննարկենք,  մեզ մոտ միաձայն չէ, որ ասեմ՝ էսպես ա, մեր տեսակետը կհայտնենք, դուք կիմանաք մեր որոշումը՝ այո՞, թե՞ ոչ»։

Հարցին՝ հնարավո՞ր է, արդյոք, որ «Բարգավաճ Հայաստան» խմբակցությունը միանա «Լուսվոր Հայաստանին» և դիմի ՍԴ, որպեսզի վիճարկի հանրաքվե անցկացնելու որոշումը, Ծառուկյանը պատասխանեց՝ քանի որ ՍԴ-ն շահագրգիռ կողմ է, իրենք ձեռնպահ են մնացել դիմելուց։

Ծառուկյանը նշեց, որ  սահմանադրական փոփոխությունների հանրաքվեի հարցով չի հանդիպել ՀՀ վարչապետ Նիկոլ Փաշինյանի հետ՝ ոչ առաջարկ է եղել, ոչ էլ հանդիպել է։

Պատգամավորն անդրադարձավ նաև գյուղատնտեսական խնդիրներին։ Նա նշեց, որ գյուղատնտեսությունը ժողովրդի հիմնական կերակրողն է։  

«Այսօր գյուղատնտեսության զարգացման, փոքր ու միջին բիզնեսի համար  հարկավոր է բանկային համակարգը փոխել։ Աշխարհում ընդունված է՝ գյուղատնտեսության համար, փոքր ու միջին բիզնեսի համար կա վարկ՝ 0.25 տոկոսանոց, որից պետք է օգտվեն գյուղացիները, որ կարողանան ոտքի կանգնել։ Որ գյուղացին ունենա 3 կով, կարողանա ֆերմեր դառնա։ Ամենակարևորն այն է, որ գուղացիներից, փոքր ու միջին ֆերմերներից իրավունք չունեն հենց առաջին ամսվանից տոկոսները պահելու։

Ինքնըստինքյան նա սնանկանալու է։ Ասենք՝ հիմա գյուղացին 2 մլն վարկ է վերցրել և 20 հատ հորթ է գնել, պետք է այդ հորթերին պահի, մեծացնի, բտման տակ դնի, դնում հենց առաջին ամսվանից ասում են՝ պիտի բերես փակես։ Ժամանակավորապես պետք է 1 տոկոսով վարկ դնել, իսկ 3 տարի հետո նոր մայր գումարը փակել տալ»,- նշեց Ծառուկյանը։

Վերջինիս խոսքով, պետք է ուժեղ լինել և ժողովրդի կարգավիճակը բարելավել։

«Մենք ունենք 650 հազար ընտանիք, առաջ միլիոն ու կես վարկառու կար, հիմա միլիոն 600 հազար։ Ամեն ընտանիքից 2-3 մարդ վարկի տակ ա, բանկին դիմելով  մարդն  իր կյանքը չի  բարելավում։ Պետք է այդ խնդիրները քննարկվեն և մարդկանց ձեռքից բռնել, հնարավորություն տալ, պայման ստեղծել...»,- ասաց Ծառուկյանը։

Դիտարկմանը, որ Ծառուկյանի ստեղծած «Օլիմպավանը»  սկսել է գույքահարկ վճարել 2018 թվականից, ԲՀԿ ղեկավարը արձագանքեց, որ երբ բացվել է «Օլիմպավանը», այնտեղ մի մարդ մուտք  է գործել, այդ օրվանից գույքահարկ վճարվել է։

«Բարգավաճ Հայաստան» խմբակցության ղեկավարն անդրադարձավ նաև վարորդների տուգանման բալային համակարգին։ Նա նշեց, որ իրենք դեմ են եղել, քանի որ եթե գործում է բալային համակարգ, պետք է լիարժեք պայմաններ ստեղծել, ճանապարհները լայնացնել, կայանատեղիներ ստեղծել։

«Էդ օրենք ստեղծողը թող մի օր փորձի, տեսնի երթուղային վարելով 5000 դրամ կարո՞ղ է աշխատել։ Երթուղայինի վարորդի համար պետք է ուրիշ բալային համակարգ լինի, մյուս վարորդների համար՝ ուրիշ։ Բացի այդ պիտի ոչ թե լինի 9 բալ, այլ 100 բալ»,- նշեց Ծառուկյանը։