Ձեր վստահելի աղբյուրը

Սահմանադրական փոփոխությունները խիստ անհրաժեշտ են։ Այսօր լրագրողների հետ հանդիպման ժամանակ ասաց ԳԽ նախկին պատգամավոր Ազատ Արշակյանը։

«Մենք անընդհատ չենք կարող իշխանափոխություն իրականացնել հեղափոխությունների միջոցով։ Ճանապարհները փակելու և այլ զանգվածային անհնազանդությունների միջոցով չպետք է լինեն փոփոխություններ։ Պետք է Սահմանադրությունն ապահովի երկրում խաղաղ համագործակցության մթնոլորտ և գործընթացներ, սակայն այն դա չի արել։ Ուրեմն միանշանակ այն պետք է սկզբունքորեն փոխվի»,- նշեց Ազատ Արշակյանը։

Ըստ նրա, անհրաժեշտ է հնարավոր բոլոր՝ նախ և առաջ քաղաքական բիրտ միջոցներով հասնել այդ փոփոխություններին. «Հեղափոխությունները դեմ են օրենքին։ Լյուդովիկոս 16-ը օրինական թագավոր էր, ժառանգություն էր ստացել բուրբոններից։ Ռոմանով Նիկոլայն երկրորդը նույնպես օրինական էր, բայց հեղափոխություններ եղան։ Այսինքն՝ օրենքի դեմ էր այդ։ Եթե օրենքը չի ապահովում, լավը չի, հարկավոր է գնալ այլ ճանապարհով, պետք է գնալ հանրաքվեով օրենքը փոխելու ճանապարհով»։

Արշակյանը նշեց, որ նաև պետք է հաշվի առնել Վենետիկի հանձնաժողովի կարծիքը, քանի որ Հայաստանը ստորագրել է պայմանագիր, որի դրույթները վերաբերում են նաև իրեն։ Իսկ այս դեպքում, հաշվի չառնելով Վենետիկի հանձնաժողովի կարծիքը, Հայաստանը հաշվի չի առնում իր օրենքը։

«ՀՀ Սահմանադրությունը հասարակական-քաղաքական գործիչների կողմից խոտանվել է ընդունման հենց առաջին օրը։ Դրա վերաբերյալ 1995 թվականից վեճ կա, կա անվստահություն։ Մեր  Սահմանադրությունը հենց առաջին օրից լեգիտիմության խնդիր ունի»,- ասաց նա։ 

Նրա խոսքով, ՀՀ առաջին Սահմանադրության ընդունումից հետո անցկացված բոլոր ընտրությունների վերաբերյալ միջազգային դիտորդները ներկայացրել են իրենց դիտարկումները՝ եղել է ընտրախախտում.

«1995-ից հետո անցկացված բոլոր ընտրությունների արդյունքները անվստահություն են առաջացրել, դրանց վերաբերյալ հավատ չի եղել։ ՍԴ-ն համարժեք պատասխան չի տվել։ Նա ոչ միայն չի լուծել այդ հարցը, հենց առաջին բողոքներով երբ գնացել են մեր քաղաքացիները, ՍԴ-ն քողարկել է կեղծիքը։ Մեր բոլոր Սահմանադրություններն իրենց ընդունմամբ պարտադրվել են մեզ, բայց ՍԴ-ն բոլոր ընտրությունների վերաբերյալ անհամարժեք վճիռներ է կայացրել։ Մոնոպոլիաների վերաբերյալ նույնպես անհամարժեք վճիռներ է կայացրել ՍԴ-ն, ոչ այն պատճառով, որ իրենց շահառուներ են և ներգրավված են եղել այդ տնտեսական մոնոպոլիաներում, այլ նաև օրենքը իրենցից պատասխան չի պահանջում։ ՍԴ-ն գերագույն դատարան է, դա ամենաարդարը պետք է լիներ»։

Ըստ Արշակյանի, պետք է փոխվի Սահմանադրության քաղաքական բովանդակությունը, քանի որ ՀՀ Սահմանադրությունն, իր խոսքով, սուպերխորհրդային է։

Նա նշում է, որ միայն խորհրդարանն ունի մանդատ, իսկ վարչապետը լեգիոներ է. նրան դրսից հրավիրել, նշանակել են, երբ ուզենան կհանեն։

«Չկա որևէ մարմին, որ ԱԺ-ին հետ կանչի։ ՀՀ-ն սուպերսովետական է, բայց քանի որ մեր դեպքում ՀՀ վարչապետը անհատական հեղինակություն ունի, մենք պետք է ասենք սուպեհեղինակության և սուպերխորհրդարանական համակարգ է։ Մենք պետք է փոխենք, խոտանենք մեր Սահմանադրությունը։  Դատարանն իրեն չի կարող դատել, բայց որպեսզի մենք ՍԴ մասին կարծիք հայտնենք, պետք է այն ուղարկենք ՍԴ»,- ասաց Արշակյանը։

Նա մեջբերեց Գոգոլի ստեղծագործությունից մի հատված, որտեղ ծեծված այրին դիմում է դատարան, իսկ դատավորը որոշում է՝ այրին ինքն է ծեծել իրեն, և այնպես, որ վերջինս չի կարողանում նստել. «Մեր ՍԴ-ն էլ է այդպիսի որոշումներ ընդունել։ Այս մի օրինակի համար հարկավոր է մեր Սահմանադրությունն ընդհանրապես խոտանել»։