Բանակը պետք է իր էլիտար բնույթը վերականգնի. Քոչարյան
«Փետրվարը բանակի համար ծանր ամիս էր, սա սև փետրվար էր»,- խորհրդարանում լրագրողների հետ զրույցում ասաց ԱԺ «Իմ քայլը» խմբակցության պատգամավոր Անդրանիկ Քոչարյանը։
Վերջինիս խոսքով, պետք է հասնել նրան, որ զինված ուժերում ընդհանրապես ինքնասպանության դեպքեր չլինեն. «Ինձ համար որևէ վիճակագրություն ընդունելի չէ, որ ասում են՝ այս բանակում ինքնասպանությունների թիվն այսքան է, այն բանակում՝ այնքան։ Մեզ մոտ դա չպետք է լինի, քանի որ մեր զինուժը մեր անվտանգության ամենակարևոր երաշխավորն է»։
Ըստ Քոչարյանի, բանակում ստեղծված մթնոլորտը, որը նաև ինքնասպանությունների է հանգեցնում, կախված է շատ հանգամանքներից։ Նրա կարծիքով, կան բացթողումներ, որոնք պետք է շտկվեն։
«Բանակում առաջացած որոշ խզումներ ինչ-որ չափով կապված են նաև հովանավորչական գործունեության և բանակի նկատմամբ այլ մոտեցումների հետ։ Բանակը պետք է ունենա մեկ՝ արտաքին թշնամի։ Եվ բանակին ներքին խնդիրներից խուսափելուց զատ, բանակը պետք է իր էլիտար բնույթը վերականգնի։ Այն պետք է լինի էլիտար՝ իր զինվորների և սպաների հարաբերություններով, կրթական ցենզով, ինտելեկտով և սպառազինությամբ»,- ասաց Քոչարյանը։
Անդրադառնալով ՊԲ հրամանատարի պաշտոնում Ջալալ Հարությունյանի նշանակմանը՝ Քոչարյանը նշեց, որ վերջինս բավականին խարիզմատիկ կերպար է.«Նա փոխարինել է Կառլեն Աբրահամյանին, ով իր ինտելեկտուալ պոտենցիալով բավականին մեծ անելիքներ պետք է ունենա ՀՀ զինված ուժերում։ Հիմա իր կառավարման ընթացքում եղան մահվան դեպքեր, և Ջալալը արժանի փոխարինող դարձավ այն տրամաբանությանը, որն անհրաժեշտ է մեր երկրին»։
Պատգամավորը նշեց, որ իր համար պատրաստվում է զինվորական ծառայության մեկնող 18 տարեկան տղաների սթրեսոգեն վիճակի մասին ինֆորմացիա, որից հետո ծրագիր կմշակվի և բանակի ղեկավարության հետ կքննարկվի ծառայության բնույթը, էությունը և ծանրությունը։
«Մենք պետք է անենք քայլեր, որ բանակում ինքնասպանությունների դեպքեր չլինեն։ Իսկ եթե զինված ուժեր զորակոչվեն հիվանդ, սահմանափակ առողջական խնդիրներ ունեցող երեխաներ, պետք է հասնենք նրան, որ նրանք բանակից զորացրվեն ավելի առողջ, քան նախքան զորակոչվելը։ Զինված ուժերը պետք է հոգատարությամբ առողջացնեն երեխային։ Նաև զորացրված տղան պետք է ունենա մեկ մակարդակով ավելի բարձր ինտելեկտ, քան ուներ մինչև զորակոչվելը»,- եզրափակեց խոսքը Քոչարյանը։
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին