Ձեր վստահելի աղբյուրը

Արցախի նախագահի թեկնածու, Արցախի հերոս Վիտալի Բալասանյանի փետրվարի 28-ի հանդիպել է ընտրողների հետ Դադիվանք, Եղեգնուտ, Նոր Էրքեջ, Նոր Ղարաչինար, Նոր Խարխափուտ, Չարեքտար, Քնարավան համայնքներում։

Ամեն համայնքում Բալասանյանն անդրադարձել է այն հստակ խնդիրներին, որոնք ունեն տվյալ գյուղի բնակիչները և ներկայացրել իր թիմի լուծումները։
Տների և հողակտորների սեփականաշնորհումը պետք է լինի պարտադիր պայման: Լուրջ խնդիր է նաև ջրագծերի բացակայությունը։ Ու եթե Չարեքտարում այս ուղղությամբ աշխատանքն արդեն սկսվել է, մյուս համայնքներում մարդիկ դեռ սպասման մեջ են։

«Հողը մերն է, մեր գյուղացունն է , մենք այն մեր արյան գնով ենք ձեռք բերել։ Դա նշանակում է, որ այն մեր մարմնի մասնիկն է ու մենք պետք է արարենք դրա վրա, երկիրը զարգացնենք»,- ասել է  Բալասանյանը։

Արցախի Հանրապետությունում բնակչության կենսամակարդակի բարձրացման գործընթացների արգելակման հիմնական պատճառներից մեկն էլ կոռուպցիան է՝ ամենատարբեր դրսևորումներով:

«Առաջին հերթին պայքարելու ենք պետական ունեցվածքի հափշտակության, բյուջեի մսխման և քիրվայության դեմ: Սյս ամենի արդյունքում է, որ մեր գյուղական համայնքներում առայսօր լուծված չեն կենսական նշանակության խնդիրները, որոնցից ամենագլխավորներից մեկն են ջրագծերը»,- ընդգծել է նախագահի թեկնածուն։

Ինչպես Արցախի շատ համայնքներում, այս գյուղերում էլ առաջնային են նաև փողոցային լուսավորության, մշակութային կենտրոնների՝ ակումբների և զբաղվածության խնդիրները։

«Ամոթ է, որ մեր գյուղացին երեկոյան չի զբոսնում լուսավորված փողոցներով, հյուր չի գնում, տանից դուրս չի գալիս լուսավորության բացակայության պատճառով: Փողոցները պիտի լուսավորվեն արևային էներգիայից սնվող լապտերներով, ինչը չի ծանրաբեռնի համայնքային ծախսերը:
Առաջին հերթին անհրաժեշտ է բոլոր համայնքներում հիմնել նաեւ ազգային և ժամանակակից արվեստի խմբակներ։ Պիտի ստեղծենք մշակութային կրթության նոր համակարգ, քանզի մշակույթը ազգային արժեհամակարգի հիմքն է, պիտի ապահովենք մշակութային կրթություն իրականացնող հաստատությունների համակարգված գործունեություն՝ ստեղծագործական ներուժի բացահայտման ու զարգացման նպատակով»,- նշել է Բալասանյանը։