Մարուքյան. Եթե Ջանջուղազյանը ծրարով փող չի ստացել, կարո՞ղ է տեսել է, թե ով է ստացել
Ազգային Ժողովում կառավարության անդամների հետ հարց ու պատասխանի ժամանակ «Լուսավոր Հայաստան» խմբակցության ղեկավար Էդմոն Մարուքյանը վարչապետ Նիկոլ Փաշինյանին հիշեցրեց նրա հայտարարությունը, ըստ որի, նախկին կառավարության օրոք նախարարներն ու գործադիր մարմնի ներկայացուցիչները ծրարով գումարներ են ստացել։
Ընդդիմադիր պատգամավորը հետաքրքրվեց, արդյոք նախկին կառավարության մաս կազմող, այսօր ֆինանսների նախարարի պաշտոնը զբաղեցնող Ատոմ Ջանջուղազյանից հետաքրքրվել է՝ օրինակ, նա ստացե՞լ է ծրարով գումար, եթե չի ստացել, կարո՞ղ է տեսել է, թե ով է ստացել։
«Ձեր կաբինետում նախկին կառավարությունից մարդիկ կան, Դուք նրանց հարցրե՞լ եք, ծրարով փող ստացե՞լ են»,- հարցրեց Մարուքյանը։
Գործադիր մարմնի ղեկավար Նիկոլ Փաշինյանը շնորհակալություն հայտնեց հարցի համար, ասաց՝ այնպես չէ, որ այդպիսի տեղեկություններ կան միայն նրա մատնանշած անձանց պարագայում։
«Այդպիսի տեղեկություններ կան, չէի ուզում թեման այդքան բացել, բայց, նման տեղեկություններ կան նաև նախկին նախարարների մասին, ովքեր հիմա Ազգային Ժողովի պատգամավոր են։ Եվ ես այդ նախկին նախարարներին չեմ կանչել հարցրել, դա ճի՞շտ է, թե՞ չէ, որովհետև կան մարմիններ, ովքեր կհարցնեն ու այդ պատասխանը կտան»,- ասաց Փաշինյանը՝ ճիշտ չհամարելով բարձրաձայնել օպերատիվ տեղեկությունները վճարված գումարների ու դրանց չափի մասին։
Նա հայտարարեց, երբ կառավարությունից պահանջում են թափանցիկ լինել, կառավարությունը խոստանում է լինել այդպիսին, միաժամանակ հայտարարում է, որ թափանցիկ պետք է աշխատեն նաև լրատվամիջոցները, հասարակական կազմակերպությունները։
«Մեզ ասում են՝ ո՞նց, ո՞նց, էդ ո՞նց։ Հենց ըտենց»,- հայտարարեց Փաշինյանն ու ավելացրեց, հարցը վերաբերում է նաև նրանց, ովքեր հեղափոխությունից հետո են եղել կառավարության անդամ, նաև նրանց, ովքեր հեղափոխությունից հետո եղել են կառավարության անդամ, հիմա կառավարության անդամ չեն։
«Նրանց էլ է վերաբերում, նրանց մասին էլ տեղեկություններ կան օպերատիվ բնույթի տեղեկություններ, բայց դա չի նշանակում, որ էդ տեղեկություններն անպայման հաստատվելու են։ Ես էլ ունեմ նման տեղեկություններ։ Ո՞նց եմ իմացել։ Բանավոր խոսակցությունների տրամաբանության մեջ կամ գուցե մի քիչ ավելի»,- ասաց վարչապետը։
Նա պատգամավորին վստահեցրեց՝ կառուպցիայի դեմ պայքարին իր անձնական նվիրվածությունը 100 տոկոս է։
Մարուքյանն ասաց՝ ստորագրում է ՀԿ-ների, կառավարության, ԶԼՄ-ների թափանցիկության անհրաժեշտության խոսքերի տակ, միաժամանակ մանրամասնեց, եթե օրինակ իր կուսակցությունից Մանե Թանդիլյանը նախարար եղած ժամանակ ծրարով գումար ստանար, դա ստանալու էր Փաշինյանից, նախկին իշխանության անդամները՝ Սերժ Սարգսյանից։
«Սա է հարցը, երբ նախարար էիք նշանակում էդ մարդկանց, էդ հարցը տվեցի՞ք։ Սա քաղաքական հարց է, դուք տանում եք օպերատիվ դաշտ, նման հարց չի քննարկվում»,- ասաց Մարուքյանը։
Ի պատասխան Փաշինյանն արձագանքեց. «Շնորհակալ եմ, բայց ո՞վ ասեց, որ ես պիտի տայի էդ փողը։ Հիմա ներկա նախարարներից որևէ մեկը ինձնից ծրարով ու այլ ձևով փող չի ստանում։ Հիմա ինձ հարցնելու փոխարեն, հերթագրվեք, նրանց հարցրեք։ Հիմա եթե ասեմ՝ հա հարցրել եմ, կասեք, բա ի՞նչ ասեց։ Հերթով նախարարներին հարց տվեք, ինձնից ի՞նչ եք ուզում։ Հիմա ես հանձնարարում եմ իրավապզհ մարմիններին, որ պարզեն այդ հարցը»։