Ձեր վստահելի աղբյուրը

«Արտակարգ դրությունը և արտակարգ ռեժիմի տրամաբանության մեջ մտնող քայլեր իրականացնելը տարբեր բաներ են»,- այս մասին լրագրողների հետ զրույցում ասաց «Ռեֆորմիստներ» կուսակցության նախագահ Վահան Բաբայանը։

Նրա խոսքով, «անունով» արտակարգ դրություն է, և հարց է առաջանում՝ ինչու են կանգնեցրել «BTR»-ները, եթե ռազմական հեղաշրջման, մասսայական անկարգությունների, սահմանադրական կարգի տապալման խնդիր չկա։

«Համաճարակ է, մարդկանց կոչ է արվել տնից դուրս չգալ, շատ չշփվել։ Որոշ բաներ սահմանափակել են, իհարկե, դա պետք է արվեր ավելի շուտ։ Երբ մենք ասում էինք դադարեցրեք քարոզարշավը, Նիկոլ Փաշինյանը, ընկած դռնեդուռ, քաղաքում պտտվում էր, մարդկանց բուկլետներ բաժանում։ Հետո, էս խստացումից ժամեր առաջ իր տիկինն էր ընկած բուկլետ բաժանում։ Հասկանո՞ւմ եք՝ ուշացած քայլերի մեխանիզմ է այստեղ»,- նշեց Բաբայանը։

Ըստ  նրա, դեռ շատ բաներ են լինելու. «Ես չեմ ուզի չարախնդալ և ուրիշ բաներ ասել, բայց, համենայնդեպս, Հայաստանի իշխանությունը պետք է ի զորու լիներ հակաճգնաժամային այս գործընթացները կառավարելու։ Ես էլի եմ ասում՝ «BTR»-ները ինչո՞ւ են հանում քաղաքում կանգնեցնում։ Մարդիկ նայում են, ասում են՝ մենք սթրեսի ենք ենթարկվում էս «BTR»-ներից։ Իմաստը ո՞րն է, «BTR»-ներո՞վ  են պայքարելու վիրուսի դեմ։ Կամ եթե մարդը երկու երեխա ունի, և իր մեքենայով գնում է կարևոր ինչ-որ տեղ, ի՞նչ, երեխաներից մեկին իջեցնի՞ ավտոյից։

Նոր էսօր երեխաների հետ կապված պարետը որոշում է ընդունել։ Այսինքն՝ որոշումներ են ընդունում, իրենք չեն մտածում՝ էդ ինչ է, հետո նորից փոփոխում են։ Արտակարգ դրություն էին սահմանել, մոլերը փակվել էին, տոնավաճառները գործում էին։ Հասկանո՞ւմ եք։ Էս կիսատ-պռատ գործողությունների մեջ, հակաճգնաժամային կառավարման փորձ չունեցող մարդկանց վստահելով, ի՞նչ էիք ուզում, որ լիներ»,- ասաց նա։

Բաբայանը հարց հնչեցրեց՝ Տիգրան Ավինյանը մի հակաճգնաժամային «խանութ» ղեկավարե՞լ է, մի հակաճգնաժամային միջոցառման մասնակից եղե՞լ է, որ մի ամբողջ երկրի հակաճգնաժամային միջոցառումները ղեկավարեր։

Բանախոսի կարծիքով, հակաճգնաժամային գործառույթները պարտավոր էին ստանձնել ուժային կառույցների գեներալները, ովքեր տեսել են և պատկերացնում են՝ ինչ է արտակարգ ռեժիմը։

«Առնվազն գեներալներ պետք է լինեին, որ գիտեն՝ դա ինչ է։ Հասկացանք, որ այս երկիրն ամբողջությամբ փոխվել է, ճիշտը դարձել է սխալ, սխալն էլ՝ ճիշտ։ Բայց գեներալ մարդ չունեի՞նք մեր երկրում, որ արտակարգ իրավիճակներին, անվտանգությանը տիրապետում է։ ԱԱԾ-ում  մարդ չունենք, ոստիկանությունում չունենք, ԱԻՆ-ում չունենք, հա՞։ Այս կիսատ-պռատ որոշումներով Հայաստանի վիճա՞կ եք ուզում գնահատել։ Շատ էլ չենք խոսում, չենք ասում՝ հասկանալով, որ դրա ժամանակը չի»,- շեշտեց Բաբայանը։

Հարցին՝ ինչպես է խնդրի լուծումը տեսնում, երբ արդեն վիրուսը բանակ է մտել, Բաբայանը պատասխանեց՝ բանակը առանձին մարմին չէ, հասարակության մաս է, որի դռները հնարավոր չէ ամբողջությամբ փակել, կան սպաներ, ովքեր գնում են տուն և գալիս զորամաս։

«Բանակը պետք է ժամանակից շուտ անցներ զինանոցային իրավիճակի, «կազարմեննի» պետք է հայտարարվեր, որպեսզի մարդիկ չգնային տուն, դրսում չշփվեին այլ անձանց հետ։ Դա միայն հնարավոր կլիներ անել «կազարմեննի» հայտարարելու դեպքում։ Հիմա արդեն դրա մասին խոսելն անիմաստ է։ Մեր բախտը բերում է, որ փոքր երկիր ենք, նաև բախտներս բերել է, որ Նիկոլի «տուրիստական բումը» չի եղել այստեղ, որովհետև եթե դա լիներ, հետևանքներն ավելի ծանր կլինեին։

Հիմա շոուներ անելու, PR անելու ժամանակը չի։ Էսօր ինքը օրինակ է բերում փետրվարի տնտեսական աճի տվյալները, բայց փետրվարին դեռ կորոնավիրուսը Հայաստանում տարածված չէր, ի՞նչ պիտի այստեղ լիներ։ Հին տվյալները բերում են, որ PR անեն։ Կամ իր տիկնոջ տուգանքն են դնում, էդ ի՞նչ բեմադրություններ են՝ ժողովրդին PR-ներով կերակրելու սովորություն։ Դա որևէ արդյունք չի ունենալու։ Բացի այդ, մենք ասում ենք բաներ, իրենք անում են, բայց ուշացումով։ Հիմա եթե անում են ուշացումով, լա՞վ չի լինի՝ լսեն մարդիկ ինչ են ասում, ժամանակին անեն։ Իրենք չեն սիրում լսել, պատրաստակամություն չունեն մարդկանց լսելու, քանի որ ստացել են մարդկանց ձայները, որոնք այսօր չունեն»,- եզրափակեց Բաբայանը։