Ձեր վստահելի աղբյուրը

«Ապրիլի 6-ի դրությամբ ՀՀ ոստիկանության կողմից իրականացվել է Իրանից ՀՀ մուտք գործող բեռնափոխադրում իրականացնող թվով 515 տրանսպորտային միջոցի ուղեկցում, որին ներգրավված են եղել ոստիկանության 477 կարգախմբեր»,- լրագրողների հետ զրույցում ասաց ՀՀ փոխոստիկանապետ Հայկ Մհրյանն՝ անդրադառնալով ոստիկանության՝ կորոնավիրուսը կանխելուն միտված գործողություններին։

Փոխոստիկանապետը նշեց, որ ուղեկցման ընթացքում սահմանափակվել են տրանսպորտային միջոցների վարորդների և նրանց փոխարինող անձանց՝ երթուղուց դուրս տեղաշարժը՝ բացառելով բնակչության համար առողջապահական վտանգ ներկայացնող շփումները։

Բացի այդ, Մհրյանի խոսքով, ՃՈ ծառայողների կողմից կատարվել են նաև 69 այլ տրանսպորտային միջոցների ուղեկցումներ։

«Նոր կորոնավիրուսի տարածումը կանխարգելելու նպատակով ՃՈ կողմից շարունակվում է դեպի Արցախի Հանրապետություն տանող ճանապարհների, Սոթք-Քարվաճառ ավտոճանապարհի, Տեղ և Սյունիք գյուղերից դեպի Արցախ ճանապարհի հատվածում ծառայությունը, որի ընթացքում ժամանակավորապես արգելվում է քաղաքացիների մուտքը դեպի Արցախ։ Ապրիլի 6-ի դրությամբ, թույլատրվել  է 1908 տրանսպորտային միջոցի մուտք դեպի Արցախ, 575 տրանսպորտային միջոցների մուտքն արգելվել է»,- տեղեկացրեց Մհրյանը։

Նա նշեց, որ հնարավոր վարակակիր անձանց հետ շփումները բացառելու նպատակով ոստիկանության ստորաբաժանումների կողմից կայուն պահակակետեր են տեղակայվել թվով 27 մեկուսացված վայերում։ Այս հատվածներում 24-ժամյա ծառայություն են իրականացնում օրական 137 ոստիկաններ։

«Ոստիկանության ուժերը շարունակում են տնտեսական գործունեություն ծավալող մի շարք սուբյեկտների իրազեկման գործընթացը՝ սահմանափակումների և դրանք խախտելու դեպքում նախատեսվող պատասխանատվության մասին։ Տրամադրվել է թվով 2138 իրազեկում, և դադարեցվել է 2164 օբյեկտների տնտեսական գործունեությունը, իսկ 36-ի նկատմամբ կազմվել են վարչական իրավախախտման վերաբերյալ արձանագրություններ։ Նաև շարունակվում են վարչական տարածքներում անձանց տեղաշարժը սահմանափակելու և մեկուսացման ռեժիմը պահպանելու նպատակով իրազեկման գործընթացները»,- ասաց Մհրյանը։

Փոխոստիկանապետը նաև ներկայացրեց, որ ապրիլի 6-ի դրությամբ կազմվել է վարչական իրավախախտման վերաբերյալ 6667 արձանագրություն, որից 1735- ով արդեն իսկ կայացվել են վարչական պատասխանատվության ենթարկելու մասին որոշումներ։

ՃՈ կարգախմբերի կողմից 2858 անձնական տրանսպորտային միջոցներից իջեցվել են երրորդ և ավելի ուղևոր հանդիսացող անձինք, իսկ 69 ուղևորափոխադրում իրականացնող միջոցների նկատմամբ կազմվել են վարչական իրավախախտումների վերաբերյալ արձանագրություններ՝ ուղևորափոխադրման կանոնները խախտելու համար.

«Հարկ է նշել, որ ՀՀ ողջ տարածքում նշանակված են թվով 69 հատուկ անցակետեր՝ ՀՀ մարզերի միջև և դեպի Երևան ազատ տեղաշարժը սահմանափակելու համար։ Այս ծառայության մեջ ներգրավված են ոստիկանության, ԱԱԾ-ի, ռազմական ոստիկանության և առողջապահական մարմինների աշխատակիցներ։ Մինչ օրս արգելվել է թվով 3007 տրանսպորտային միջոցների մուտքը մի վարչական տարածքից դեպի մյուս վարչական տարածք»։

Ոստիկանության ծառայակիցների կողմից հեռախոսազանգեր են իրականացվում նաև մեկուսացման մեջ գտնվող անձանց հետ, որոնց ընթացքում հարցումների միջոցով պարզվում է նրանց ինքնազգացողությունը, վերջիններս նախազգուշացվում են՝ սահմանափակել իրենց տեղաշարժը և շփումներն այլ անձանց հետ։ «Ներկայումս սույն կարգի անձանց թիվը 5802 է»,- ասաց Մհրյանը։

Նա նշեց, որ ապրիլի 6-ի դրությամբ՝ ոստիկանության կողմից հսկողություն է սահմանվել ՀՀ տարածքում անցկացված 870 հոգեհանգստի և հուղարկավորության արարողության և 10 այլ միջոցառումների նկատմամբ։

Փոխոստիկանապետի խոսքով, ՀՀ ոստիկանության հոսպիտալն այս պահին գործում է որպես ինֆեկցիոն հիվանդանոց, այնտեղ բուժում է ստանում 83 վարակակիր։