Ձեր վստահելի աղբյուրը

«Ցավոք մենք երկրորդ եռամսյակի սկզբից կունենանք նվազ տնտեսական ցուցանիշներ և հույս ունենք, որ երրորդ եռամսյակից նորից վերականգնումը կսկսվի»,- այսօր կառավարության մամուլի սրահում հայտարարեց էկոնոմիկայի նախարար Տիգրան Խաչատրյանը:

Ըստ նախարարի, կառավարությունը գիտակցում է, որ մեծ ջանքեր պետք է գործադրվի, որպեսզի ընկերությունները վերագտնեն իրենց գործունեության բնականոն եղանակը և այն անցյալի կրկնությունը չի լինի, այլ համաճարակով պայմանավորված նոր իրավիճակ է լինելու:

Տիգրան Խաչատրյանը, անդրադառնալով ճգնաժամի հետևանքները մեղմելու նպատակով կառավարության ընդունած ծրագրերի ընթացքին, նշեց, որ առաջին ծրագրի շրջանակներում օժանդակություն է ստացել 284 կազմակերպություն՝ 24.6 մլրդ դրամի շրջանակներում: Երկրորդ ծրագրի շահառուների թիվը գերազանցել է 6000-ը, որից 5.5 հազարը այն շահառուներն են, որոնք դիմել են մինչև 1 մլն դրամ վարկավորման համար:

Ըստ Տիգրան Խաչատրյանի ներկայացրած վիճակագրության, երրորդ ծրագրի շրջանակներում շահառու են հանդիսացել 549 կազմակերպություն՝ 6.3 մլրդ դրամի վարկային օժանդակությամբ, իսկ հինգերորդ ծրագրով, որը նախատեսում էր խրախուսում այն կազմակերպություններին, որոնք այս տարվա երրորդ ամսվա դրությամբ շարունակում էին աշխատողներին պահել աշխատանքի մեջ, արդեն հատկացվել է 1.9 մլրդ դրամ:

Էկոնոմիկայի նախարարը նշեց, որ 500 մլն-ից ավելի վարկեր ստանալու ծրագրից օգտված ընկերությունների 80 տոկոսը մայրաքաղաքում են գրանցված և օժանդակության գումարներն օգտագործել են հիմնականում պարտքերը և հարկերը վճարելու համար:

Նախարարը պատասխանեց լրագրողների կողմից առցանց ներկայացված հարցերին:

Հարց. «Բազմաթիվ ձեռնարկատերեր հայտարարել են, որ համապատասխանում են օժանդակություն ստանալու առաջադրված չափանիշներին, բայց դեռևս մերժվում են և կանգնած են փակման վտանգի առաջ»:

Տ. Խաչատրյան. «Գործնականում բացառվում է, որ եթե ընկերությունը համապատասխանում է չափանիշներին, ապա մերժվի: Մենք, իհարկե, ունեցել ենք մերժումներ: Մեկ ամսվա ընթացքում հայտերի գրեթե 60 տոկոսը բավարարվել են և 40 տոկոսը մերժվել, որովհետև չեն համապատասխանել ոլորտային գործունեության թիրախային տեսակներին, որոնք կառավարությունը հայտարարել էր: Հնարավոր է նաև դրանք այն ընկերություններն են, որոնք գտնում են՝ իրենց վարկային պատմությունը լավ է եղել, բայց պարզվել է, որ այդպես չէ: Եթե կան նման փաստեր, թող ուղարկեն մեզ, մեր աշխատակիցները դրանք կդիտարկեն, նման դիմումներ ամեն օր էլ ստանում ենք»:

Հարց. «Ինչ է արվում գյուղմթերքի մթերմանն աջակցելու համար»:

Տ. Խաչատրյան. «Դեռ վաղ է մթերման մասին խոսելը, բայց արդեն քննարկում ենք և կառավարության աջակցություններից մեկը մթերող կազմակերպություններին է վերաբերում: Այն ուղղվում է ոչ միայն մթերող ընկերություններին, այլև ֆերմերային տնտեսություններին: Յուրաքանչյուր ընկերության հատկացվում է 1.8 մլրդ դրամի վարկ: Ստացած առաջարկությունների արդյունքում այն կընդլայնվի՝ նաև պահածոյացման համար գումարներ հատկացնելու միջոցով: Հայաստանում մթերող տնտեսությունները շուրջ երկու տասնյակ են, որոնց հետ մենք կապի մեջ ենք»:

Հարց. «Եթե Ֆիզիկական և իրավաբանական անձինք ապրիլ ամսին օգտվել են աջակցության ծրագրերից, ապա կարո՞ղ են օգտվել նաև մայիսին»:

Տ. Խաչատրյան. « Մեր ծրագրերը հիմնականում միանվագ են: Հավանական է, որ դրանք 5-րդ աշխատակցի աշխատավարձի վճարման ծրագրին է վերաբերում: Այն նույնպես մեկանգամյա է, բայց կքննարկվի հետագայում աջակցություն ցուցաբերելու հնարավորությունները»:

Հարց. «Մարտի տնտեսական ցուցանիշը 4.9 տոկոսով անկում է ապրել: Անկում է գրանցվել բոլոր ոլորտներում, բայց, ըստ պաշտոնական վիճակագրության՝ միջին անվանական աշխատավարձը նախորդ տարվա համեմատ 8.6 տոկոսով աճել է: Ինչպե՞ս է դա հնարավոր»:

Տ. Խաչատրյան. «Ճիշտ չի արձանագրված, անկում չի եղել: Առաջին եռամսյակի դրությամբ արձանագրվել է դրական տնտեսական ակտիվություն: Արտահանումը զրոյից մի փոքր բարձր է եղել, ներմուծումը 6, 2 տոկոսով կրճատվել է նախորդ տարվա առաջին եռամսյակի համեմատ: Բայց պետք է արձանագրել, որ առաջին եռամսյակի երրորդ ամսվա երկու շաբաթն է կրել կորոնավիրուսի բացասական ազդեցությունը, ինչը նշանակում է, որ աճն առաջին երկու ամիսների բարձր տնտեսական ակտիվության հետևանքն էր, ինչն իր հերթին շարունակությունն էր 2019 թվականի բարձր տնտեսական ակտիվության»: