Ձեր վստահելի աղբյուրը

«100 հարց ենք բերում, 24 ժամյա ռեժիմով ամենատարաբնույթ խնդիրները քննարկում: Անհրաժեշտության դեպքում կարող ենք նույն ձևով բերել նաև այս օրենքի նախագիծը քննարկենք, եթե տեխնիկական խնդիրների մասին եք խոսում»,- այսօր ԱԺ-ում հայտարարեց «Բարգավաճ Հայաստան» խմբակցության անդամ Վահե Էնֆիաջյանը՝ հակադարձելով իշխող կուսակցության պատգամավորների այն պնդմանը, որ Հայրենական մեծ պատերազմի վետերանների պատվովճարները սահմանվում է կառավարության որոշմամբ, որպեսզի դրանում փոփոխություններ կատարելու գործընթացն ավելի ճկուն լինի:

«Բարգավաճ Հայաստան» խմբակցության պատգամավորն առաջարկում էր ԱԺ հերթական նստաշրջանի օրակարգ ընդգրկել «Հայրենական մեծ պատերազմի վետերանների մասին» օրենքում փոփոխություններ կատարելու մասին օրենքի նախագիծը, որով հաղթանակի 75-ամյակի առիթով առաջարկում է վետերաններին հատկացվող ամսական պատվովճարը կրկնապատկել՝ 100 հազար դրամից հասցնելով 200 հազար դրամի:

Նկատելով, որ որպես սոցիալական պետություն Հայաստանը պետք է ստանձնի պարտավորություններ՝ Վահե Էնֆիաջյանը ներկայացրեց երկրում ապրող վետերանների վիճակագրությունը. «2017 թվականի մայիսի դրությամբ Հայաստանում բնակվել է Հայրենական մեծ պատերազմի 624 վետերան: Մեկ տարի անց արդեն՝ 472 վետերան էր մնացել: 2019 թվականին բնակվում էր 350 վետերան, իսկ արդեն 2020 թվականին՝ մնացել է 276 պատերազմի մասնակից»:

Պատգամավորը նկատեց, որ մեկ ամիս առաջ իր այս նախաձեռնությունից հետո կառավարությունը նիստ է գումարել և միանվագ պատվովճար սահմանել, բայց ինքը առաջարկում է ամեն ամիս հատկացնել 200 հազար դրամ:

«Իմ քայլը» խմբակցության պատգամավոր Արփինե Դավոյանը գլխադասային հանձնաժողովի բացասական կարծիքը հիմնավորեց նրանով, որ օրենքներով պատվովճարների չափի սահմանումը վերապահված է կառավարությանը:

«Նման պատվովճարը օրենքով սահմանելը սխալ է, այն կառավարության որոշամբ է սահմանվում, որպեսզի ավելի ճկուն լինի դրա փոփոխությունը»,- հայտարարեց պատգամավորը և տեղեկացրեց, որ կառավարության ներկայացուցիչը քննարկման ժամանակ հայտնել է, որ պատվովճար է նախատեսվում նաև այն անձանց, որոնք պատերազմի ժամանակ աշխատել են թիկունքում և ստացել են մեդալներ և նրանց թիվը գերազանցում է 1000-ը:

Վահե Էնֆիաջյանը նկատեց, որ Հայաստանը խորհրդարանական հանրապետություն է, պատգամավորներն էլ բազմիցս պառլամենտարիզմի բաձրացան մասին են հայտարարել և հարցրեց, թե ինչո՞ւ պետք է ԱԺ-ն իրավունք չունենա օրենքով սահմանել պատվովճարները:

Սասուն Միքայելյանն էլ, հիշեցնելով, որ արցախյան ազատամարտի մասնակիցներին թոշակի անցնելուց հետո 5 հազար դրամ հավելավճար է սահմանվել, տեղեկացրեց, որ դրանք շատ մեծ պրոբլեմ են դարձել և կառավարությանն առաջարկեց ուշադրություն դարձնել դրանց:

«Արցախյան ազատամարտի վետերանները ոչ բարվոք վիճակում են, սոցիալական խնդիրներ ունեն: Ոչ թե մենք լացում ենք, այլ հարցեր կան, որ, ըստ արժանավույնս պետք է գնահատվի»,- հայտարարեց Միքայելյանը:

Անդրադառնալով քննարկվող նանխագծին՝ պատգամավորը նկատեց, որ քիչ թվով վետերաններ են մնացել կարելի է ընդունել նախագիծը: «Այս նախագծի ընդունումը՝ մեծ տրագեդիա չէ: Եթե մի քիչ էլ ձգենք, մայիսին էլ մարդ չի մնա, կեսն էլ կթեթևանա, ինձ թվում է՝ կարելի է անել»,- ասաց պատգամավորը:

«Երբ ասվում է, որ այն կառավարության գործառույթն է՝ ոչ թե ԱԺ-ինը, կրկին անգամ զարմացած եմ, որովհետև միամտաբար կարծում եմ, որ ԱԺ-ն բարձրագույն մարմինն է և ունի բոլոր իրավասություններն այսպիսի հարցերը կարգավորելու»,- իր հերթին հայտարարեց Արման Աբովյանը և առաջարկեց օրենքում ճկունության մեխանիզմները սահմանել առաջինից երկրորդ ընթերցման ժամանակ:

ԱԺ-ն քվեարկությամբ մերժեց օրենքի նախագիծը օրակարգ ընդգրկելու նախաձեռնությունը: