Ձեր վստահելի աղբյուրը

Երևանի Ծարավ Աղբյուր թաղամասի 1500 բնակարանի բնակիչների ներկայացուցիչները լրագրողների հետ հանդիպմանը բարձրաձայնեցին իրենց անհանգստացնող մի քանի հարցեր, մասնավորապես, նրանք դեմ են թաղամասում նոր բազմաբնակարան շենքի կառուցմանը, առաջարկում են դրա փոխարեն կառուցել մանկապարտեզ ու դպրոց։

Համատիրության ներկայացուցիչն ասաց, որ թաղամասը հագեցած է բնակարաններով, բետոնեպատ տարածքներով, թաղամասը չունի կանաչապատ տարածքներ։

«Հիմա ևս մեկ բազմաբանական շենք է նախատեսվում կառուցել, որի համար այս պահին քաղաքապետարանի կողմից կա նախագծման թույլտվություն, շինթույլտվություն դեռ չկա։ Բնակիչները սուր են վերաբերվում այդ հարցին, ոչ մի կերպ չեն համակերպվում այն մտքի հետ, որ ևս մեկ բազմաբնակարան շենք պետք է կառուցվի»,- նշեց նա։

Համատիրության ներկայացուցչի խոսքով, թաղամասը կառուցվել է շինարարական նորմերի խախտումներով, պետական դպրոց ու մանկապարտեզ չկա ամբողջ թաղամասում։

«Փորձում ենք բանակցությունների միջոցով հասնել նրան, որ  բազմաբնակարան շենքը չկառուցվի, հնարավորություն դեպքում կառուցել դպրոց ու մանկապարտեզ։ Համատիրությունը գրավոր դիմել է քաղաքապետին, գլխավոր ճարտարապետին, որպեսզի այդ հարցում գան ընդհանուր հայտարարի, թաղամասի բնակիչների խնդիրը լուծեն փուլ առ փուլ։ Պետք չէ վաղվանից սկսեն դպրոցի շինարարությունը»,- ասաց նա։

Նրա խոսքով, բնակիչների ներկայացուցիչները հանդիպել են Երևանի գլխավոր ճարտարապետի հետ, առաջարկվել է քննարկել բնակիչներով, թե ինչ են ուզում  ու գրավոր ներկայացնեն։ Մայիսի 5-ին բնակիչները գրավոր ներկայացրել են իրենց առաջարկ-պահանջը՝ տարածքում կառուցել դպրոց, սպասում են պատասխանին։

Բնակիչները նաև հանդիպել են կառուցապատողի հետ, որն, իրենց պատկերացմամբ, պատրաստ է գնալ կոմպրոմիսների։

«Այլ հնարավորություն չենք ունենա, քանի որ այլ տարածք չկա թաղամասում»,- ասաց համատիրության ներկայացուցիչը։

Բնակիչների խոսքերով, երբ որ կառուցում էին թաղամասը, իրենց տարածքով ցույց է տրվել, թե որտեղ պետք է լինի դպրոց, որտեղ մանկապարտեզ, սակայն այսօր թաղամասում միայն վճարովի մանկապարտեզ ու դպրոց է գործում։

Թաղամասի բնակիչ Լիաննա Աբովյանն ասաց, որ թաղամասին ամենամոտ դպրոցը գտնվում է 2 կմ հեռավորության վրա, իսկ հանրային տրանսպորտը դեռ հասանելի չէ թաղամասին։ Միջին հաշվարկով, ստացվում է, որ թաղամասում բնակվող 2000 երեխա չունի դպրոց, 500 երեխա՝ մանկապարտեզ։

Նա նշեց, որ վճարովի դպրոցի տարեկան վարձը 1 միլիոն 500 հազար դրամ է, մանկապարտեզի ամսական վարձը՝ 160 հազար դրամ, իսկ երիտասարդ ընտանիքները հնարավորութություն չունեն այդքան վճար տալ։

«Մենք չենք կարող թույլ տալ և կորցնել դպրոց ու մանկապարտեզ ունենալու վերջին հնարավորությունը, ծանրաբեռնել առանց այդ էլ ծանրաբեռնված մեր թաղամասը»,- ասաց Լ. Աբովյանը։

Նրա խոսքով, իրենց ցանկությունն է, որ տարածքը դառնա հանրային, հանձնվի համայնքին, իսկ կառուցապատողին տրամադրվի այլ հողատարածք։

Համատիրության իրավաբանական, փաստաբանական սպասարկում իրականացնող փաստաբանը հիշեցրեց՝ ՀՀ Սահմանադրության մեր նշված է, որ Հայաստանը ժողովրդավարական պետություն է, Քաղաքացիական օրենսգրքի 12-րդ հոդվածում նշվում է՝ արգելվում է քաղաքացիական իրավունքների իրականացումն այլոց իրավունքներին ու պարտավորություններին վնաս պատճառելու պայմանով։

«Պետությունն է քաղաքացու համար, ոչ թե քաղաքացին պետության համար, առաջնայինը քաղաքացին է ու քաղաքացու շահը։ Եթե քաղաքացու շահը պահանջում է, որպեսզի լինի դպրոցական ու նախադպրոցական հիմնարկներ, ուրեմն պետք է լինեն։ Պատկան մարմինները թող զբաղվեն, իրենց պրոբլեմն է, թե ինչպես իրենք կորոշեն»,- նշեց փաստաբանը։

Նա չբացառեց, որ հնարավոր է դատական պրոցես սկսեն, սակայն սպասում են նամակի պատասխանին։

«Պատրաստ եմ ձեռնարկելու օրենսդրությամբ սահմանված բոլոր միջոցներն այս խնդիրը լուծելու համար»,- ասաց փաստաբանը։