Ավագանու նիստից. «Դուք բանակում նույնիսկ չեք ծառայել, գնացեք բանակում ծառայեք»
Երևանի ավագանու նիստում «Երկրապահ կամավորականների միություն» հասարակական կազմակերպությանն անհատույց օգտագործման իրավունքով գույք տրամադրելու մասին» հարցը բավականին երկար քննարվեց։ Հիշեցնենք, որ նիստի սկզբում ավագանու «Իմ քայլը» խմբակցության անդամ Մեսրոպ Պապիկյանն առաջարկել էր այս հարցը հանել օրակարգից, հաջորդ նիստերին կրկին բերել։ Սակայն ավագանու քվեարկությամբ՝ այն մտավ օրակարգ։
Մեսրոպ Պապիկյանն իր ելույթում ասաց. «Ինձ մոտ տպավորություն է, որ ավագանու որոշ անդամներ, մասնավորապես «Լույս» և ԲՀԿ խմբակցությունից, չեն հասկացել, թե ինչու էի ուզում օրակարգից հանել այս հարցը։ Իմ մոտ համոզմունք կա, որ ցանկացած գործ անելուց պետք է խորը ուսումնասիրել, լուծումներ գտնել։ Ցավով պետք է նշեմ, որ Հայաստանում Արցախյան պատերազմի ազատամարտիկներն առողջական խնդիրներ ունեն, նաև ֆինանսական։ Ես ասում եմ՝ եկեք բովանդակային քննարկենք հետները, լուծումներ գտնենք, համայնքի միջոցով օգնենք մեր ազատամարտիկներին։ Իսկ փաթեթը նման լուծում չի առաջարկում, քվեարկությունը նման լուծում չի առաջարկում։ Օրինակ, հնարավորություն կա այդ տարածքներից մեկն օգտագործելով՝ ԵԿՄ-ի հետ և այլ ՀԿ-ի միջոցով կազմակերպել վետերանների խնամքի կենտրոններ։ Պետք է բովանդակային քննարկում գնա, եթե մենք մտահոգված ենք վետերանների, մասնավորապես ԵԿՄ ապագայով»։
«Իմ քայլը» խմբակցությունց Էռնեստ Ավանեսովն ասաց, որ չի հասկանում, թե որոշ մարդիկ ուր են տանում այս ուղղությունը, բայց չի ստացվելու։
«Չփորձեք այստեղ անվանարկել մեր ասածները։ Ինչպես եղել ենք միասնական խմբակցություն, այդպես էլ կա։ Հարցը տեխնիկական է ու ունի բազմաշերտ բնույթ, ժամանակ է պահանջում։
Ես և իմ շատ ընկերներ, նաև այստեղ նստած 2016 թվականին, երբ չգիտեմ շատերն ուր էին, ինչ էին անում նաև ՀՀԿ-ի հետ, գիտեմ ձեր ՀՀԿ-ի հետ մոտիկությունն ու ընկերությունը։ Ձեզ մնա այդ ամենը ինչը։ Չփորձեք համեմատել»,- նշեց նա։
Դահլիճից հնչեցին բղավոցներ։
Է. Ավանեսովը շարունակելով խոսքն ասաց, որ իրենք ունեն ծրագրային դրույթ՝ հնարավորություն դեպքում մանկապարտեզների տարածքները վերադարձնել համայնքին։
ԲՀԿ խմբակցությունից Հռիփսիմե Առաքելյանն ասաց, որ իր համար անհասկանալի ելույթներ են հնչում այստեղ, բավական է պաթոսից խոսել։
«Մենք այստեղ քննարկում ենք ԵԿՄ-ին տարածքներ տրամադրելու հարցն ու պարզաբանվում է՝ մենք դեմ չենք այս ամեն ինչին, շնորհակալ ենք մեր կռված տղաներին, բայց այստեղ տեխնիկական խնդիրներ կան։ Այս հարցը եթե բերվեր տաս օր առաջ, առանց ավելորդ քննարկումների կողմ կքվեարկեինք ու կանցնեինք առաջ։ Մեզանից խնդրել են մի քանի տարածքներ տանք։ Այդ տարածքների մեծ մասը, ինչպես փոխքաղաքապետն էլ նշեց, կրճատվել են, փոքր հատվածներ են, հիշատակի սենյակներ են դարձել։ Ասում ենք մանակապարտեզի տարածքներ են, բայց այս ու, կարծում եմ, հնգամյա ծրագրում չենք էլ նախատեսել, որ այդ մանկապարտեզները պետք է այնպես սարքենք ու մեր երեխաներն էլ գնան։ Այդպես չէ։ Կարելի է այդ տարածքները տրամարդել մեր երկրի պահապաններին, պաշտպաններին։
Դուք օր չունեք առանց ՀՀԿ-ի անուն տալու։ Առանց դրա չեք կարողանում։ Իսկ այստեղ մենք քաղաքական հա՞րց էինք քննարկում։ Դուք ընկերություն եք անում... Դուք էլ եք անում։ Վերջիվերջո անգամ ՀՀԿ-ականները մեր քաղաքացիներն են։ Ի՞նչ է, սպանենք, հա՞։ Սա ինչ մոտեցում է, այլ կուսակցության ներկայացուցիչները մարդ չե՞ն։ ԲՀԿ-ն, այս դեպքում որ հինգ մանդատ ունի, դուք 57, մենք մարդ չենք, մեզ քվե չեն տվե՞լ»,- ասաց նա։
Հ.Առաքելյանի խոսքով, այստեղ տեխնիկական խնդիրներն առհասարակ որևէ աղերս չունեն։
«Իմ անձնական կարծիքն է՝ եթե մեկ շաբաթ առաջ բերվեր ԵԿՄ-ին համայնքային տարածքները տրամադրելու հարցը, այո, պետք է տայինք։ Ի՞նչ տեխնիկական, ինչի՞ մասին է խոսքը։ Դուք ուզում եք տեխնիկական պատճառաբանության ներքո սղցնել այն ցանկությունները, որը ձեր ներսում կա՝ այ մարդ, լավ դե, Երկրապահին ինչի՞ ենք տարածքներ տալիս։ Սա է իմաստը»,- նշեց նա։
Նրա խոսքով, ԵԿՄ-ն այդ համայնքային գրասենյակներում ռազմահայրենասիրական դաստիարակչություն է իրականացնում, «սակայն, չգիտես ինչու, այսօր շատերին այն ծիծաղելի է դարձել, հայրենիքը սիրելը պաթոս է դարձել։
«Այո, կան այդպիսի մարդիկ, որոնք հայրենիքի ու ազատամարտի նկատմամբ պատասխանատվությունը սարքել են զավեշտ։ Դուք բանակում նույնիսկ չեք ծառայել, գնացեք բանակում ծառայեք»,- ասաց Հ.Առաքելյանը։
Նա խնդրանքով դիմեց քաղաքապետ Հայկ Մարությանին. «Ձեր այն տղաները, որոնք բանակում չեն ծառայել կամ ծառայել են ու ոչինչ չեն հասկացել, թե ինչ է հայրենիքը, եկեք այց կազմակերպենք առաջին գիծ, թող գնան դիրքերում երեք օր կանգնեն ու հետո ասեն՝ մենք համայնքում տեխնիկական խնդիրներ ունենք»։
«Իմ քայլը» խմբակցությունից Աննա Ջավախյանն ասաց, որ ցանկություն է հայտնել հարցը դուրս գա օրակարգից, ինչն ուղղակիորեն կապ ուներ մեկ հանգամանքի հետ։
«Դա որակվեց որպես տեխնիկական մանրուք, սակայն դրա տակ հազարավոր երեխաներ են, ովքեր այսօր սպասում են հերթում։
Այս պահին Երևանում մանկապարտեզ հաճախում է 30 հազար 649 երեխա։ Երկու տարեկան 9317 երեխա սպասում է հերթի մեջ։ Բոլորս քաջ գիտացում ենք, որ ներկայիս տարածքներում այդ հերթի հարցը երբեք չենք լուծելու, իսկ այս երեխաները մեծանում են»,- ասաց նա։
«Լույս» խմբակցությունից Անի Խաչատրյանն իր խոսքն ուղղելով «Իմ քայլի» անդամ Էռենստ Ավանեսովին՝ ասաց. «Պարոն Ավանեսով, ձեր պայքարը ԵԿՄ գրասենյակների դեմ դեռ մեկ տարի առաջ է սկսվել։ Հիշեք իմ ելույթը, երբ ձեզ մեղադրեցի Երկրապահ գրասենյակների վրա ղումար խաղալու մեջ»։
Այնուհետև նա նշեց. «Ի տարբերություն ձեր սիրելի գրանտներ բերող ՀԿ-ների, Երկրապահի այս գրասենյակները սերտ համագործակցում են պաշտպանության նախարարության հետ, այս ամիսներին ԵԿՄ այս գրասենյակների շնորհիվ 3800 մարդ է անդամագրվել, գնալու են պայմանագրային զինծառայության»։
Քվեարկությանը մասնակցեց ավագանու 34 անդամ։ 31 կողմ, 2 դեմ, 1 ձեռնպահ հարաբերակցությամբ որոշումն ընդունվեց։
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
