Ստիպված եմ արձագանքել Ձեզ. Ջանջուղազյանը՝ Տարոն Սիմոնյանին
«Կրթությունը միակ ռեսուրսն է, որի միջոցով մենք թե՛ պետությունը, և թե՛ տնտեսությունը պետք է զարգացնենք։ Դա պետք է արվի նաև մտավոր սեփականությունը պաշտպանելու միջոցով»,- խորհրդարանում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ դիմելով ֆինանսների նախարար Ատոմ Ջանջուղազյանին։
Նա շեշտեց, որ ֆինանսների նախարարության տարեկան հաշվետվությունում մտավոր սեփականության օբյեկտների պաշտպանության աջակցությանը բավականին քիչ գումար է հատկացված եղել, դա էլ գրեթե 48%-ով թերակատարվել է.
«Ես ուզում եմ հասկանալ՝ պատճառները որոնք են, որ մտավոր սեփականության օբյեկտների պաշտպանության բնագավառում նման սխալ քաղաքականություն է վարվել նախորդ տարի, և դուք ինչպե՞ս եք տեսնում այդ թերություններն ուղղելուն միտված քայլերը։ Այլ կերպ, քան մտավոր սեփականությունը պաշտպանելու միջոցով տնտեսությունը զարգացնելը, ես մեր պարագայում գրեթե չեմ տեսնում»։
Պատասխանելով պատգամավորի հարցին՝ Ա. Ջանջուղազյանն ասաց, որ բերված օրինակի և եզրահանգման միջև եղած կապը պետք է փորձաքննության ենթարկվի, քանի որ բյուջեի մեջ խոսվում է վճարումների մասին, իսկ Տ. Սիմոնյանի եզրակացությունը բովանդակությանն էր վերաբերում։
«Եթե բյուջեում այդ ուղղությամբ արված ծախսերը 100%-ով արվեին, դուք կհամարեիք, որ մտավոր սեփականությունը մեր երկրում այլևս պաշտպանվա՞ծ է, և ԱՄՆ-ից որևէ մեկն իր մտավոր սեփականությունն այստեղ կգրանցի՞։ Համոզված եմ՝ ոչ, չէիք համարի այդպես»,- շեշտեց Ա. Ջանջուղազյանը։
Նա առաջարկեց հնչեցված հարցին անդրադառնալ այն ժամանակ, երբ կոնկրետ ոլորտի պատասխանատուն կներկայացնի միջոցառումների կատարողականը։ Այնուամենայնիվ, ֆինանսների նախարարը չժխտեց, որ հարցը խնդրահարույց է, բայց, առանձին վերցված, փոքր խնդրի մասին է խոսքը։
Արձագանքելով՝ Տ. Սիմոնյանն ասաց, որ պատճառա-հետևանքային կապն ակնհայտ է, քանի որ երբ գրվում է աջակցություն մտավոր սեփականության օբյեկտների պաշտպանությանը, և այդ աջակցությանն ուղղված պետական ծախսերը կիսով չափ թերակատարվում են, նշանակում է, որ այդ աջակցությունը չի իրականացվում կիսով չափ։
«Ինձ հետաքրքրում է՝ ինչո՞ւ են այս բնագավառում թերակատարումներ եղել, որո՞նք են դրանք, և ինչպե՞ս պետք է այդ թերակատարումները շտկվեն։ Սա շղթայական կապով հարվածում է տնտեսության մնացած ճյուղերին։ Իմ հիմնական մտավախությունն այն է, որ դուք բյուջեում գրել եք, որ պետք է կատարեք պաշտպանությանն ուղղված միջոցառումներ, և կիսով չափ այդ ծախսերը չեք կատարել»։
Որպես պատասխան՝ Ա. Ջանջուղազյանն ասաց, որ ամբողջ ընթացքում իր ջանքերն ապարդյուն են եղել՝ առաջարկելու, որ յուրաքանչյուր առանձին միջոցառում քննարկվի այն ժամանակ, երբ դրա համար նախատեսված է այդ քննարկումը։
«Հետևաբար, ստիպված եմ արձագանքել Ձեզ։ Մտավոր սեփականության պաշտպանության աջակցության ծրագրի գծով 2019 թվականի բյուջեի ծախսերը կազմել են 240.2 մլն դրամ, կամ նախատեսվածի 62.4%-ը, ինչպես և նշվեց։ Ծրագրի շրջանակում իրականացվել է 2 միջոցառում։ Իսկ շեղումը պայմանավորված է երկրում մտավոր սեփականության օբյեկտների հետ կապված գրանցման ծախսերով, որոնք կազմել են 208.6 մլն դրամ։ Հնարավո՞ր է հարկադրաբար մտավոր սեփականություն գրանցել, եթե ընդամենը այդքան դիմում է եղել, ինչպե՞ս պետք է դրա դիմաց նախատեսված վճարումն ավելի մեծ լիներ, քան այն, ինչ արձանագրվել է»,- մեկնաբանեց Ա. Ջանջուղազյանը։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
