Ձեր վստահելի աղբյուրը

ԱԺ քննարկվել ու ընդունվել է օրենքի նախագիծ, որով նախատեսվում է  մինչև երկու տարեկան երեխայի խնամքի նպաստ հատկացնել նաև գյուղական  բնակավայրում բնակվող ընտանիքներին՝ անկախ ծնողի աշխատելու հանգամանքից։  Այսօր խնամքի նպաստը նշանակվում է այն ծողներին, որոնք  գտնվում են մինչև 3 տարեկան երեխայի խնամքի արձակուրդում, տրվում է  մինչև երեխայի 2 տարին լրանալը։ Սա նշանակում է, որ երեխան ծնվելու պահին կինը պետք է հանդիսանա վարձու աշխատող։  Ասուլիսում աշխատանքի և սոցիալական հարցերի նախարարի տեղակալ Սմբատ Սաիյանն ասաց, որ նոր փոփոխությամբ  գյուղական բնակավայրում բնակվող ծնողին, անկախ երեխայի ծննդյան պահին աշխատելու կամ չաշխատելու հանգամանքից, ևս նշանակվում է խնամքի նպաստ 26 հազար 500 դրամի չափով։ Միևնույն ժամանակ նա հիշեցրեց, որ աշխատող ծնողի  խնամքի նպաստի չափը նույնպես հուլիս 1-ի ավելացել է և կազմելու է 26 հազար 500 դրամ։

«Եթե գյուղական բնակավայրում  ապրող ծնողը հանդիսանում է նաև վարձու աշխատող, ապա նա այս խնամքի նպաստը կստանա կրկնակի՝  մեկ 26 հազար 500 դրամ որպես երեխայի՝ մինչև  երեք տարեկան խնամքի արձակուրդում  գտնվող անձ, ևս  մեկ 25 հազար 500 դրամ, որպես գյուղական բնակավայրում բնակվող ծնող»,- ասաց փոխնախարարը։ 

Նա նշեց, որ նպաստի չափը 18 հազարի 26 հազար 500 դրամ սահմանելու համար լրացուցիչ պետական բյուջեով հատկացել է  շուրջ 1 միլիարդ դրամ, ևս 450 միլիոն դրամ գյուղական բնակավայրերում բնակվող ընտանիքների խնամքի նպաստը նշանակելու համար։  Ս. Սաիյանն ասաց, որ սա ամբողջ ծրագրերի համար անհրաժետ գումարը չէ, օրենքով նախատեսված է, որ գյուղական բնավայրում   բնակվող ծնողին խնամքի նպաստ նշանակվում ու վճարվում է, եթե երեխան  ծնվել է 2020 թվականի  հուլիսի 1-ից հետո։ Հաջորդ  տարի այդ գումարը կավելանա, 4 միլիարդ դրամ անհրաժետ կլինի, 2022-ից՝ արդեն  8 միլիարդ դրամ։ Փոխնախարարն ընդգծեց, որ սա միայն գյուղական բնակավայրում բնակվող երեխաների խնամքի նպաստի համար է։

Հացին՝ հաշվարկ ունե՞ք, թե հուլիսի 1-ից հետո այս ծրագրից օգտվողների թիվը մոտավոր ինչքան կլինի Ս. Սաիյանը պատասխանեց, որ իրենց հաշվարկների համար հիմք են Վիճակագրության պետական կոմիտեի հրապարակած տվյալները. «Կանխատեսել են  առաջիկայում երեխաների ծնունդների թիվը շուրջ 37-38 հազար, նախատեսվում է 1/3 կծնվի  գյուղական բնակավայրերում։ Դա է վկայում վերջին տարիների ցուցանիշները, արդյունքում կանխատեսում ենք գյուղական բնակավայրում տարեկան 13 հազար ծնունդ»։

Փոխնախարարն ընդգծեց, որ գյուղական բնակավայրում ծնողին խնամքի նպաստ նշանակելու համար  հիմք է հանդիսանալու   պեական  ռեգիստրում  առկա տեղեկատվությունը ծնողի հաշվառման վայրի վերաբերյալ և պարտադիր պահանջ է, որպեսզի ծնողն ու երեխան հաշվառված լինեն  գյուղական բնակավայրում և երեխան փաստացի բնակվի գյուղական բնակավայրում։

«Այսինքն այն ծնողները, որոնք հաշվառված են ու բնակվում են այլ բնակության վայրի  հասցեով, ըստ էության, օրենքի դրույթների համաձայն, չունեն այդ նպաստի իրավունքը։ Պարտադիր պայման է՝ հաշվառված լինելը ու փաստացի բնակվելն իրենց հաշվառման վայրի հասցեում»,- մանրամասնեց Ս.Սաիյանը։

Նա նշեց, որ կատարվել են նաև այլ փոփոխություններ, որոնք, նրա գնահատմամբ, կարևոր են։  Ս.Սաիյանի ներկայացմամբ, երբ երեխան ծնվել է  արտերկրում, այս դեպքում գործող օրենսդրությամբ, նախատեսված է մեկ փաստաթուղթ արտերկրում նպաստ չստանալու մասին, իսկ կատարված փոփոխությամբ, հանվում է այդ պահանջը, այսինքն արտերկրում  ծնված երեխայի խնամքի նպաստի համար դիմելու դեպքում այլևս  այլ երկրում կամ իր ծննդյան վայրի երկրում նպաստ չստանալու մասին փաստաթղթի անհրաժեշտությունը պարտադիր չէ։ 

Փոփոխություն է կատարվել երեխայի ծննդյան միանվագ նպաստի նշանակման ու վճարման ժամկետներում։ Գործող օրենսդրությամբ, եթե ծնողը դիմում է նպաստի համար ու նպաստի գումարը փոխանցում է  համապատասխան բանկին, ծնողը մեկ տարի ժամկետ ունի ներկայանալու ու բանկից ստանալու  նպաստի գումարը։ Եթե չի դիմում մեկ տարում, կորցնում է իր նպաստի իրավունքը, այսինք չի ստանում։ Փոխնախարարի խոսքով, համապատասխան փոփոխությամբ սահմանվել է, որ այս դեպքում  միանվագ նպաստը կրկին կվճարվի, եթե ծնողը համաատասխան դիմումը ներկայացնում երեք տարվա ընթացքում։  Ս. Սաիյանն ասաց, որ այս նորմին նաև որոշակիորեն հետադարձ ուժ է տրվում։