Ձեր վստահելի աղբյուրը

«Մյուս թևի առաջարկը եղել է այն, որ ռեֆորմն այս պահին պետք չէր անել, իսկ մենք գնտնում ենք, որ այս ռեֆորմը մի բան էլ ուշացած էր»,-Հայկական միասնական տեղեկատվական հարթակում հրավիրված ասուլիսում հայտարարեց  ՀՀ ԱԺ Տնտեսական հարցերի մշտական հանձնաժողովի նախագահ Բաբկեն Թունյանը՝ պատասխանելով գույքահարկի փոփոխության նախագծի վերաբերյալ ստացած առաջարկների հարցին:

Պատգամավորը պնդեց, որ եղել են նաև բազմաթիվ առաջարկներ, բայց ոչ թե մեղմացման այլ խստացման ուղղությամբ:

«Առաջարկվել է մարդկանց գույքերը դիտարկել ոչ թե առանձին, այլ նայել, թե այդ անձը քանի գույք ունի, դրանց արժեքները գումարել և ամբողջական հարկել, ինչի հետևանքով, բնականաբար, գույքահարկի շեմն ավելի բարձր կլիներ և ավելի շատ հարկ կվճարեր»,- հայտնեց  Թունյանը և հավելեց, որ այդ առաջարկը չեն ընդունել, քանի որ դրա տեխնիկական իրականացումը մեծ խնդիրների առաջ էր կանգնեցնելու:

Լրագրողը «Իմ քայլը» խմբակցության պատգամավորին հիշեցրեց, որ ԱԺ-ում  նա հայտարարել էր, որ կենտրոնի թոշակառուները կարող են գույքահարկը չվճարել, այլ այն կարող են նրանց ժառանգները անեն, կամ այն գնորդը, որն այդ բնակարանը կգնի և հետաքրքրվեց, թե կան հաշվարկներ թե քանի նման բնակարան կա:

Բաբկեն Թունյանը պնդեց, որ անհնար է պրակտիկորեն հաշվել, թե քանի մարդ նման վիճակում կլինի, որովհետև պետք է հստակ իմանալ, թե քաղաքացիենրից քանիսն են բնակվում թանկարժեք բնակարաններում, նրանց գույքահարկը ինչքան  է լինելու հետո  այն համադրեն նրանց իրական եկամուտների հետ:

Նրա խոսքով Հայաստանում կա ընդամենը 9500 բնակարան, կամ ընդանուր բնակարանների 2.5 տոկոսը, որոնց գույքահարկը տարեկան 64 հազար դրամից  բարձր է լինելու:

«Եթե 9500-ի մեջ կլինեն բոլորը թոշակառուներ, ինչը խիստ անհավանական է, եթե իրապես մարդու եկամուտի միակ աղբյուրը թոշակն է, ապա այդ թոշակը օրենքով արգելանքի տակ դրվելու ենթակա չէ, բացի այդ, համայնքի ավագանին ունի իր գույքի եկամուտների  մինչև 10 տոկոսի չափով ֆոնդ, որով կարող է արտոնություններ տալ այդ մարդկանց, կամ չեղարկել գույքահարկը, հետաձգել, զեղչել այն»,- հայտնեց հանձնաժողովի նախագահը և հավաստիացրեց, որ 10 տոկոսը միանգամայն բավարար է մարդկանց հարցերը լուծելու համար, բայց համայքապետերը պետք է զգույշ լինեն, քանի որ նրանց փոխարինողները կարող են իրենց մեղադրել հարազատներին գույքահարկի զեղչեր անելու մեջ:

Լրագրողի հարցեին, թե վերջինս չի՞ կարծում, որ գույքահարկի ավելացումը լրացուցիչ բեռ կլինի գործարարների համար, որոնք կենտրոնում մեծ տարածքներ ունեն, Բաբկեն Թունյանը հայտնեց, որ ինքը հակառակի մեջ է համոզված:

«Բիզնեսի վրա սա կարող է խթանող ազդեցություն ունենալ»,- հայտնեց պատգամավորը, և բացատրեց, որ մարդիկ  որոնք ժամանակին փոքր գումարներով գույք էին սեփականաշնորհել և չէին օգտագործում, հիմա ստիպված կլինի այն օգտագործել, վարձով տալ կամ վաճառել այն մարդկանց որոնք ցանկություն ունեն դրանք օգտագործելու:

Պատասխանելով հնչող քննադատություններին, որ 500 հազար  գույքային միավորներ սկսում են հարկվել, որովհետև նախկինում նրանց կադաստրային արժեքը մինչև 3 միլիոն էր՝ Բաբկեն Թունյանը բերեց թվային տվյալներ: Ըստ նրա, ներկայում 276500 բնակարան կա, որոնց կադաստրային արժեքն այս պահին 3 մլն դրամից ցածր է: Գույքահարկի փաթեթի ուժի մեջ մտնելուց հետո դրանցից 8000-ը տարեկան վճարելու են մինչև 1000 դրամ, իսկ  94 հազարը 3-5 հազար դրամ:
Բերված մեկ այլ վիճակագրությամբ, նման 240000 բնակելի տներից 86000-ը տարեկան վճարելու է մինչև 1000 դրամ, 92000-ը՝ 1000-3000 դրամ և 28 000 վճարելու են 3-5 հազար դրամ:
Մեր կողմից հավելենք, որ պատգամավորի ներկայացրած թվերով ցածր հարկման դաշտում են հայտնվում 516500 գույքային միավորից 308 հազարը, իսկ մնացա 208500-ի մոտ կարձանագրվեն էական բարձրացումներ: