Զորակոչն ու զորացրումն իրականացվում է բնականոն ընթացքով. ՊՆ

Քաղաքական 21:13 17/07/2020 Հայաստան

Զորակոչն ու զորացրումն իրականացվում է բնականոն ընթացքով. ՊՆ

«Ամբողջ օրն առաջնագծում օպերատիվ իրավիճակը եղել է համեմատաբար հանգիստ, քիչ են եղել կրակոցները, միայն հրաձգային զենքերից»,- Իջևանում` ճգնաժամային տեղեկատվական կենտրոնում տեղի ունեցած ճեպազրույցում ասաց ՀՀ պաշտպանության նախարարության ներկայացուցիչ Արծրուն Հովհաննիսյանը։

Նա նշեց, որ այսօր այցելել է զորամասերից մեկը, զորքերի և հրամանատարության մարտական ոգին բարձր է, լիովին տիրապետում են իրավիճակին, տեսնում են հակառակորդի բոլոր ոտձգությունների, շարժերի ցանկությունները, որևէ սադրանք կատարելու դեպքում արժանի հակահարված կստանան։

Հարցին՝ այս օրերին տեղի է ունենում զորակոչի, զորացրման գործընթացներ, սահմանին տիրող իրադրության ֆոնին ծնողներին հետաքրքրում է, թե ո՞ր դեպքում կարող է զինվորի զորացրումը հետաձգվել, Ա. Հովհաննիսյանը պատասխանեց. «Հայաստանի Զինված ուժերը զորակոչն ու զորացրումն իրականացնում են բնականոն ընթացքով, պլանային միջոցառումներ են կատարվում, որևէ հետաձգում զորացրման ու զորակոչի չի իրականացվել ու չի իրականացվելու»։

Ա. Հովհաննիսյանը նաև ասաց, որ ՀՀ Զինված ուժերը ռուսական զորքերի հետ, մասնավորապես, 102-րդ բազայի հետ ընթացիք զորավարժությունների շրջանակում ունեն համատեղ միջոցառումներ՝ ինչպես ՀՀ տարածքում, այնպես էլ այլ զորավարժարաններում. «102-րդ ռազմաբազայի հետ այդ մեծ զորավարժությունների ընթացքում ՀՀ Զինված ուժերից կներգրավվեն բավականին մեծ ուժեր, մոտավորապես մեկ գնդին հավասար՝ տանկային, հրետանային, մոտոհրաձգային և այլն»։

Նա նաև նշեց. «Հաստատում եմ իսրայելական ԱԹՍ-ի՝ հայկական կողմում անվնաս հայտնվելու լուրը, սակայն չեմ ուզում բացել փակագծերը, որովհետև մեր ձեռքին շատ հաճախ ադրբեջանական զենք, զինամթերքի, ռազմական տեխնիկայի նմուշները հայտնվում են ամենատարբեր մթոդներով եղանակներով, դրանք մեկնաբանելն ու փակագծերը բացելն այնքան էլ ճիշտ չէ»։

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: