Ձեր վստահելի աղբյուրը

«Մենք խիստ մտահոգված ենք Երևանով: Դեռ մեկ տարի առաջ մենք այդ մտահոգության մասին բարձրաձայնել էինք, բայց համագործակցության համար մեկնած մեր ձեռքը մնացել է օդի մեջ. ո՛չ մեր քննադատություններին արձագանքող կա, ո՛չ մեր առաջարկությունները լսող»,- այսօր լրագրողների հետ զրույցում ասաց ՀՅԴ Երևանի քաղաքային կոմիտեի անդամ Ժիրայր Պեոճեքյանը՝ անդրադառնալով քաղաքային իշխանությունների գործունեությանը:

Նա տեղեկացրեց, որ Երևանի քաղաքային կոմիտեն և՛ «դեղին քարտերի» ակցիա է իրականացրել, և՛ ֆեյսբուքյան ուղիղ եթերներով է փորձել բարձրաձայնել իր մտահոգությունները, սակայն որևէ արձագանք չի եղել։

Ժիրայր Պեոճեքյանը մի քանի հիմնական խնդիրներ մատնանշեց, որոնք այժմ իրենց մտահոգում են։

Այսպես, ըստ նրա, ՀՀ բնակչության առնվազն 1/3-ը կենտրոնացած է Երևանում, և այսօր Կառավարությունը հայտարարում է, որ Երևանն է դարձել համաճարակի բույնը:

«Հակառակ այս հաստատումների, Երևանի քաղաքային իշխանությունը հեռու է ընդունվող բոլոր որոշումներից, որոնք իրենց ազդեցությունն են թողնելու Երևանի ու երևանցիների վրա։ Եթե համաճարակի բույնը Երևանն է, ապա այդ առողջապահական խնդիրները Երևանի քաղաքապետարանի խնդիրներն են, մինչդեռ կայացվող որոշումների վերաբերյալ քաղաքապետարանից որևէ արձագանք չկա»,- իր մտահոգությունը հայտնեց նա։

Հաջորդ խնդիրը, ըստ նրա,  քաղաքի ախտահանումն է, որը պատշաճ կերպով չի կազմակերպվում.

«Նույնիսկ շենքեր կային, որոնցում կորոնավիրուսով վարակված մարդիկ կային, կամ շենքեր, որոնցում կորոնավիրուսի պատճառով մահեր արձանագրվեցին, չեն ախտահանվել: Եղել են քաղաքացիներ, որոնք 3 օր շարունակ զանգել են քաղաքապետարան, համատիրություններ, բայց որևէ մեկը չի եկել այդ տարածքները ախտահանելու: Երեք օր անց, որ ախտահանում են, քաղաքացին արդեն կարող է վարակված լինել»։  

Երրորդ խնդրի մասին խոսելով՝ Ժիրայր Պեոճեքյանը նշեց, որ Երևանում կան սոցիալապես խոցելի վիճակում գտնվող քաղաքացիներ, որոնց համար համայանքապետարաններն ունեն սոցիալական վարչություններ, սակայն այդ մարդկանց հետ ոչ մի աշխատանք չի տարվել՝ բացի մի անգամ սննդամթերք տրամադրելուց:

«Տարբեր երկրներում քաղաքապետները իրենց վրա վերցրին քաղաքում կորոնավիրուսի խնդիրների լուծման պատասխանատվությունը, մեր պարագայում մեր քաղաքապետը, կարծես, մեծագույն բացական էր քաղաքի առօրյայից և մի տեղ ինքնամեկուսացած, թողել էր, որ Երևանն ու երևանցին իր միջոցներով այս «յուղով տապակվեն»»,- նշեց նա:

Մյուս խնդիրը, ըստ Պեոճեքյանի, Երևանի զարգացման ռազմավարական ծրագրի, տեսլականի բացակայությունն է, քանի որ հայտնի չէ, թե քաղաքապետարանն ինչ պատկերացում ունի քաղաքի կառուցապատման, տարածքների կանաչապատման և մի շարք այլ ոլորտներում կատարվելիք ծրագրերի մասին. «Այս ամենը վարչությունների չաշխատելու կամ վատ աշխատելու հետևանք է»:

«Հաջորդ խնդրահարույց հարցը վերաբերում է գույքահարկի բարձրացմանը, որի գործարկման դեպքում ծանրանալու է քաղաքացու բեռը, և Երևանը նոր սոցիալական բաժանման, շերտավորման խնդրի առջև է կանգնելու: