Ձեր վստահելի աղբյուրը

Ամուլսարի երկրորդ հենակետում «Լիդիան» ընկերության տեղակայած վագոն-տնակը շուտով կտեղափոխվի։ Այս պահին տարածքում են գտնվում Վայոց Ձորի ոստիկանապետը, Ջերմուկի քաղաքապետը։

Հիշեցնենք, որ դեռ երեկ, Ամուլսարի՝ որպես հանք շահագործման դեմ բողոքի ակցիայի ժամանակ Ջերմուկի քաղաքապետ Վարդան Հովհաննիսյանը հայտարարեց, որ «Լիդիան Արմենիա»-ն սխալվել է վագոն-տնակի տեղադրման հարցում, սխալ կետում են տեղադրել, ասել են, որ վաղը կգան և կուղղեն սխալը: Սակայն, քաղաքապետի խոսքը շատ շուտով հերքվեց «Լիդիանի» կողմից։ Ընկերությունը, մասնավորապես, նշել էր.

«Քիչ առաջ մամուլից տեղեկացանք, որ Ջերմուկի քաղաքապետը «Լիդիան Արմենիայի» անունից հանդես է եկել մի շարք հայտարարություններով, այդ թվում, թե իբր «Լիդիանը» համաձայնել է տեղափոխել իր վագոն-տնակները: Հայտնում ենք, որ «Լիդիան Արմենիան» նման պայմանավորվածություն որևէ մեկի հետ ձեռք չի բերել: Վագոն-տնակները գտնվում են ընկերության օրինական տիրապետման տակ գտնվող տարածքում»։

Այնուամենայնիվ, այսօր վաղ առավոտյան տարածքում չափագրումներ էին իրականացվում, և անգամ վերամբարձ կռունկ էր բերվել տարածք, որպեսզի վագոն-տնակները հեռացվեն։

Այդ ընթացքում Ջերմուկ քաղաքի համայնքի հողաշինարար Արման Արսենյանն էլ լրագրողների հետ զրույցում հայտնել էր, որ տնակները տեղակայված են «Լիդիան»-ի վարձակալած տարածքում, բայց այստեղ շինթույլտվություն չկա, հետևաբար, այստեղ չեն կարող տեղակայել ոչ շարժական, և ոչ էլ կոնստրուկտիվ էլեմենտներ։ Նա նշել էր, որ «Լիդիան»-ի կողմից մոտ 10 մետրի խախտում է թույլ տրվել։

Քիչ առաջ էլ Ջերմուկի համայնքապետի խորհրդական Հայկ Դավթյանը նշեց, որ այս գործընթացի հետ կապված արդեն չորս օր է լարված վիճակ է։

«Այս բուդկաներն ապօրինի են տեղադրվել այստեղ։ Այս տարածքը վարձակալության է տրվել «Լիդիանին», և որևէ մեկն իրավունք չուներ առանց համայնքի ղեկավարի թույլտվության այստեղ որևէ բան տեղադրելու։ Հիմա ժամանակին արվել է, շեղումներ եղել են։ Սրանք ոչ թե դիտավորյալ է արել «Լիդիանը», այլ, ինչպես գիտեք, ամբողջ հանրապետությունում հողաչափության մեջ շեղումներ եղել են։ Հիմա, ճշտելուց հետո պարզվել է, որ իրենք իրավունք չունեին այստեղ վագոն-տնակ դնելու։ Վարձակալական տարածքից 10-15 մետր այն կողմ «Լիդիան»-ի սեփական տարածքն է, և այդ վագոն-տնակները տեղափոխվելու են այնտեղ»,- ասաց Հայկ Դավթյանը։

Նա տեղեկացրեց, որ «Լիդիան»-ը համայնքապետարանի կոչը՝ վագոն-տնակները վարձակալության տարածքից դուրս բերելու վերաբերյալ, անօրինական է համարում, ուստի համայնքն իր ուժերով է այդ վագոն-տնակները հեռացնելու.

«Իրենց տեղեկացրել ենք, որ պետք է այդ վագոն-տնակները տեղափոխենք։ Եթե իրենք մեր քայլերը հակաօրինական են համարում, թող դատարան դիմեն»։

Ջերմուկի համայնքապետի խորհրդականը, սակայն, հստակ չգիտեր՝ այս պահին են հեռացնելու վագոն-տնակները, թե՞՝ վաղն առավոտյան։

Հարցին՝ «Լիդիան»-ը վարչական տույժի ենթարկվելո՞ւ է ապօրինության համար, Հայկ Դավթյանը պատասխանեց՝ ոչ. «Գործընկերային հարաբերություններ կան, բան կան, հո մենակ տուգանելով չի»։

Նշենք, որ րոպեներ առաջ վերամբարձ կռունկը մոտեցավ «Լիդիան»-ի վագոն-տնակներին, և սկսվեցին դրանք տեղաոխելու գործողությունները։ Վագոն-տնակներից դեպի երթևեկելի հատված ընկած ճանապարհին ոստիկանները պատ են կազմել՝ հասարակության անվտանգությունը պահպանելու նպատակով։