«Ճանկռելով, քաշելով... ու բավականին բիրտ ձևով են ցրել ԱԺ շենքի դիմաց գնդակ խաղացողներին»
«Համակարգային որևէ փոփոխություն իրավապահ համակարգում չեմ տեսել, կարող եմ արձանագրել վատթարացման միտումներ»,- այսօր «Մեդիա կենտրոնում» անցկացված «Պետք չէ ասել Ամուլսարը սար է, ոստիկանները դա սարսափելի չեն սիրում» թեմայով քննարկման ժամանակ ասաց իրավապաշտպան Զառա Հովհաննիսյանը՝ անդրադառնալով երեկ ԱԺ-ի մոտից իր և մի շարք ակտիվիստների ակցիային, որի ընթացքում նրանք վանկարկում էին՝ «Ամուլսարը սար է»։
Նրա խոսքով, ինքը հաճախ է բերման ենթարկվել, բայց այս անգամ նկատելի է եղել, որ ոստիկանության մի քանի շերտով խնդիրներն ավելի են շատացել։
«Մեզ բերման ենթարկելու փաստն անօրինական է, սկսած նրանից, որ մեր իրականացրածն ակցիա չէր։ Մոտ 10-12 մարդ, իրարից մեկ մետրից ավելի հեռավորության վրա, ակցիա չէին իրականացնում։ Նրանք խաղում էին գնդակ։ Եթե գնդակը գցելիս բղավում էին՝ Ամուլսարը սար է, դա ամենևին չէր նշանակում, որ կոչեր էին իրականացվում։ Նրանք նախ պետք է ապացուցեին, որ դա ակցիա է, և դրա համար են մեզ բերման ենթարկում։ Ուղղակի բղավելուց հետո մի քանի ոստիկաններ, նյարդային շարժումներով մոտեցան մեզ և հարձակվեցին։ Ճանկռելով, քաշելով, պոկելով ու բավականին բիրտ ձևով իրենք ցրեցին «ակցիան»։ Նրանք մեզ նետեցին մեքենաների մեջ, բավականին ուժեղ, տղաներից ոմանց ակնոցներն անգամ կոտրվեցին։ Իսկ իմ ձեռքերի վրա, օրինակ, ճանկռված տեղեր կան»,- նշեց Զառա Հովհաննիսյանը։
Ներկայացնելով, թե ինչ է կատարվել իրենց բերման ենթարկվելուց հետո՝ իրավապաշտպան Արա Ղարագյոզյանը նշեց.
«Մալաթիայի ոստիկանական բաժանմունքում խայտառակ վիճակ էր, մեզ մեկ բաժակ ջուր չէին կարողանում տալ, մեզնից մեկը վատ ինքնազգացողություն ուներ, նույնիսկ շտապ օգնություն չկարողացան կանչել, ես անձամբ եմ կանչել»։
Իրավապաշտպանը տեղեկացրեց, որ ոստիկանն ասել է՝ իմ դեմքը լավ նայիր, տես քեզ ինչ օրի եմ գցելու։
«Ու դա ասում էր փաստաբանին, պատկերացրեք ինչպես են վերաբերում սովորական քաղաքացիներին։ 2.5 տարի անց նույն ապօրինություններով շարունակում է գործել մեր ոստիկանական համակարգը»,- ցավով նշեց Արա Ղարագյոզյանը։
Իրավապաշտպան Նինա Կարապետյանցն էլ ասաց, որ ինքը մեկ հարց ունի իշխանություններին։
«Արդեն երկու տարի է անցել հեղափոխությունից, և մենք երկու տարի է՝ սպասում ենք իշխանության գնահատականին։ Ներկայիս իշխանությունը ևս ժամանակին եղել է ոստիկանության «զոհը»։ Մեր հետ միասին հեղափոխություն անցած իշխանությունը լռում է և անարձագանք է, և գուցե իրենց ձեռնտու է ունենալ նման ոստիկաններ, դատավորներ, որոնք արդեն փորձ ունեն մարդու իրավունքները խախտելու։ Մեծ ցավով եմ սա ասում»,- շեշտեց իրավապաշտպանը։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին