Ձեր վստահելի աղբյուրը

Օգոստոսի 21-ին «Հայրենիք» կուսակցության խորհրդի անդամ Արա Սահակյանը հյուրընկալեց մի խումբ սիրիահայերի։ Այս մասին հայտնում են կուսակցության մամուլի ծառայությունից։ 

Ողջունելով հյուրերին և ընդգծելով, որ «Հայրենիք»-ի համար կարևոր է յուրաքանչյուր հայի ապահովությունն ու բարեկեցությունը հատկապես հայրենիքում՝ Արա Սահակյանը ներկայացրել է քաղաքական ուժի հիմնական սկզբունքներն ու մոտեցումները, որոնց առանցքում ազգային մշակույթն է, լեզուն, եկեղեցին և ընտանիքը։

«Մենք այժմ ականատեսն ենք անհանգստացնող երևույթների․ մեզ մտահոգում են եկեղեցու, հայոց լեզվի, հայոց պատմության և հայ ընտանիքի նկատմամբ այսօրվա կառավարության մոտեցումները»,-նշել է Ա․ Սահակյանը։

Կիսելով «Հայրենիք»-ի արժեքները և համաձայնելով, որ դրանք պետք է պաշտպանել ցանկացած ոտնձգությունից՝ հյուրերը ներկայացրել են իրենց մտահոգություններն ու առաջնային խնդիրները։

Բոլորը միաբերան նշել են, որ ամենացավոտը կեցության խնդիրն է․ Սիրիայից հայրենիք տեղափոխված հայերի գերակշիռ մասը, ըստ նրանց, վարձով է բնակվում։

«Պատերազմի ժամանակ 20-25 000 սիրիահայ եկավ հայրենիք, բայց Հայաստանի իշխանություններն ինչպես հարկն է ուշադրություն չդարձրեցին, և կեսից ավելին հետ դարձավ Սիրիա կամ մեկ ուրիշ երկիր մեկնեց։ Եթե իշխանությունը մի քիչ կարևորություն տա սիրիահայերին, մարդիկ չեն գնա այստեղից»,-ասել է Պետրոս Բերբերյանը։

Վարդան Թոքաթլյանը պատմել է, որ հատկապես համավարակի ընթացքում շատ սիրիահայեր մնացին առանց տանիքի։

«Շատերին տներից հանեցին վարձավճարի պատճառով։ Շատերի հոսանքն ու գազը կտրեցին այս օրերին։ Իսկ Սիրիայում պատահում էր, որ ամիսներով վարձ չէինք տալիս, բայց մեր հոսանքն ու գազը չէին կտրում, իսկ այստեղ մի ժամ հետո կտրում են»,-ասել է Թոքաթլյանը։

Ռազմիկ Տեր-Դավիդյանը կիսաթանկարժեք քարեր է մշակում ու վաճառում։ Համավարակի ընթացքում եկամուտը կտրուկ նվազել է։

«Ես այդ քարերը պիտի Հայաստանից դուրս ուղարկեմ, բայց չեմ կարողանում․ պաշտոնյաները ֆուտբոլի գնդակի նման տեղետեղ են ուղարկում՝ այս փաստաթուղթը բերելու, այն փաստաթուղթը բերելու, հետո էլ ասում՝ արդեն ուշացար»,-պատմել է վարպետ Ռազմիկը՝ ավելացնելով, որ եթե այսպես շարունակվի, սահմանը բացվելուն պես կհեռանա Հայաստանից։

Ավետիս Սարգսյանն էլ իր հերթին ասաց, որ կառավարությունից բնակարան չի ակնկալում։ «Չեմ ասում՝ անվճար տան։ Թող գոնե բանկով տուն ձեռք բերելու հնարավորություն ստեղծեն։ Կամ թեկուզ հող տան, որի վրա մենք տուն կկառուցենք»,-ասել է նա։

Հյուրերը նաև պատմել են, որ սիրիահայերին տրամադրվող հումանիտար օգնությունը համաչափ չի բաշխվում, ինչն ընդհանուր դժգոհություն է հարուցում։

«Հայրենիք»-ի խորհրդի անդամ Արա Սահակյանը, լսելով սիրիահայ հայրենակիցների խնդիրները, պատրաստակամություն է հայտնել կուսակցության հնարավորությունների սահմանում օժանդակել թե՛ խնդիրների բարձրաձայնմանը և թե՛ լուծմանը։

Հանդիպման մասնակիցները եկել են ընդհանուր եզրակացության, որ հաջողության կհասնեն, եթե կառավարության առջև հանդես գան որպես կազմակերպված, միասնական ուժ։

«Հայրենիք»-ի ներկայացուցիչների և սիրիահայերի հանդիպումները շարունակական կլինեն։