Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանն  այսօրվա դատական նիստում անդրադարձավ իր միջնորդության դեմ ներկայացրած մեղադրող կողմի հակափաստարկներին ու առարկություններին։

Հիշեցնենք, որ օգոստոսի 4-ի նիստում ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը միջնորդել էր  դադարեցնել սահմանադրական կարգի ենթադրյալ տապալման գործով տուժող և նրանց իրավահաջորդ անձանց դատավարական կարգավիճակը և նրանց հարցաքննել վկայի կարգավիճակով։

«Առաջին տպավորությամբ շատ ուժեղ հակափաստարկներ են, մեղադրողներն ասում են, եթե քրեական գործի անջատված մասով  տուժողներ ներգրավեին մարդիկ, բա ո՞նց է, որ մեղադրյալներին նորից մեղադրանք չի առաջադրվել անջատված մասով։ Ասում են, եթե մեղադրյալներին նորից մեղադրանք առաջադրելու կարիք չկա, հետևաբար կարիք չկա նաև տուժողներին նորից տուժող ճանաչելու»,-դատախազների խոսքը նախ հիշեցրեց պաշտպանը։
Ալումյանը նկատեց, առաջին տպավորությունը սակայն խաբուսիկ է, վկայակոչեց Քրեական դատավարության օրենսգրքի 25 հոդվածի 2-րդ մասը, ըստ որի քրգործից մասն անջատվում է մեկ կամ մի քանի անձանց նկատմամբ։

«Եթե այդ մասն անջատվել է այստեղ գտնվող չորս անձանց նկատմամբ, ինքնաբերաբար իրենք այս մասով մեղադրյալի կարգավիճակը պահպանում են։ Եվ հենց այստեղ կերևա հարգելի մեղադրողների փաստարկի լուրջ քննությունը։ Եթե իրենց տրամաբանությամբ վերցնենք, ապա այս գործոց մեղադրյալները պիտի նաև այն գործով, որը հիմա գտնվում է Հատուկ քննչական ծառայությունում»,-ասաց Ալումյանը։

Փաստաբանը նկատեց, եթե քրգործով բոլոր մասնակիցները պահպանում են իրենց դատավարական կարգավիճակը և անջատված, և չանջատված մասով, ապա այս գործով մեղադրյալ են հանդիսանում նաև այն յոթ հոգին, ովքեր դատվել են «Յոթի գործով»։
«Իրենց գործն անջատվել է, դատավարությունն ավարտվել է, բայց այդ տրամաբանությամբ, իրենք, այդ թվում պարոն Փաշինյանը մնացել է մեղադրյալ։ Իսկ դրանոց մտնում ենք փակուղի, այսինքն մեղադրող կողմի ներկայացրած առարկությունները ոչ թե մեր ասածի հերքումն է, այլ հաստատումը»,-ասաց փաստաբանը։

Նա հիշեցրեց, ՀՔԾ-ում քննվող գործով տուժող է ճանաչվել 228 հոգի, դատախազների տրամաբանությամբ, այդ բոլոր մարդիկ պետք է դատակոչվեին ու հրավիրվեին այս նիստին։

«Բայց նրանք դատակոչի ցուցակում անհասկանալի չափանիշով ներառել են 102-ին։ Բացարձակապես անհասկանալի է, թե ինչ չափորոշիչներով են մի մասը դատակոչվել, մի մասը՝ ոչ»,-ասաց Ալումյանը։

Դատական նիստը  ընդմիջվեց, դատավոր Աննա Դանիբեկյանն ասաց, տեխնիկական խնդիր է առաջացել։