Ապրիլյան գործողությունների սկզբնական փուլում դիրքերում զինվորները փամփուշտի և ուտելիքի պակաս չեն ունեցել. Քոչարյան
«ԳՇ պետին պետք է տրվի հարցը, թե ինչու է աշխարհազոր ստեղծվում։ Այնուամենայնիվ, այն ստեղծելու առաջարկը մեծ ռիսկ է պարունակում, և պետք է լուրջ ու խորքային քննարկում լինի»,- խորհրդարանում լրագրողների հետ զրույցում ասաց ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով աշխարհազորի ստեղծման հարցին։
Նրա խոսքով, աշխարհազորը պետք է դիտել որպես բանակի ռեզերվ, որն իր դերի հստակ չափաբաժինն է ունենալու։
Անդրադառնալով Ապրիլյան քննիչ հանձնաժողովի աշխատանքներին՝ Անդրանիկ Քոչարյանն ասաց, որ զեկույցն ամփոփվում է արդեն, և այս ամսվա վերջում այն ներկայացվելու է ԱԺ նախագահին։
Նա հստակեցրեց՝ զեկույցն ունի գաղտնի, հույժ գաղտնի և բաց հատվածներ, և «Պետական գաղտնիքի մասին» օրենքը պահպանելով, հնարավորություն կտրվի հասարակությանը՝ ծանոթանալու որոշ դրույթների.
«Բայց մի բան կասեմ՝ անպայման ամեն ինչ անելու եմ, որ զոհվածների հարազատները ամբողջությամբ ծանոթանան նյութերին»։
Հարցին, թե արդյոք հերքվում է այն վարկածը, թե դիզվառելիքի փոխարեն ջուր է եղել, զինվորները փամփուշտ չեն ունեցել, Անդրադնիկ Քոչարյանը պատասխանեց՝ բոլոր հարցերի պատասխանները կան։
«Մենք բոլոր փաստերը համադրելուց հետո պատասխանել ենք հարցին՝ զինվորները փամփուշտ և սննդամթերք ունեցե՞լ են, թե՞՝ ոչ։ Կարեն Կարապետյանին լսելուց հետո, այդ հարցի պատասխանը հստակ է՝ հատկապես դիզվառելիքի մասով»,-նշեց նա։
Դիտարկմանը, որ ՀՀ երրորդ նախագահ Սերժ Սարգսյանն իր ասուլիսում նշել է, որ Կարեն Կարապետյանը դիզվառելիքի մասին խոսելիս վրիպել է, Անդրանիկ Քոչարյանն արձագանքեց՝ ավելի վաղ չկա՞ր հնարավորություն Կարեն Կարապետյանին հարցնելու՝ ինչո՞ւ է վրիպել.
«Ես էլ հարցրել եմ՝ այդ վիրպումը քաղաքական նպատա՞կ է ունեցել։ Շատ չմանրամասնեմ՝ այդ վիրպումը շատ թանկ է նստել բանակի վրա։ Ասեմ հետևյալը, ապրիլյան գործողությունների սկսման սկզբնական փուլում դիրքերում զինվորները փամփուշտի և ուտելիքի պակաս չեն ունեցել։ Եվ այդ ժամանակահատվածն ինչքա՞ն է տևել, այ դա դուք կգտնեք։ Բայց եկել է մի պահ, որ շատ դիրքերում կրակելու հնարավորությունները եղել են սահմանափակ։ Ինչո՞ւ է այդպես եղել, մենք տվել ենք բացատրությունները։ Ո՞ր դիրքերում ուշացան, ինչո՞ւ ուշացան, կարո՞ղ էին չուշանալ..., բանակի կառավարելիության աստիճանն ինչպիսի՞ն էր, բոլոր այս հարցերն ուսումնասիրել ենք և ստացել ենք պատասխաններ։ Բայց ժամանակից շուտ ինձ մի խոսեցրեք»։
Դիտարկմանը, որ ԱԺ աշխատակից Գարիկ Ղազարյանը նշել է, որ իր ձեռքում են հայտնվել արձանագրություններ, որոնք փաստում են, որ փամփուշտի և սննդի պակաս չի եղել դիրքերում, Անդրանիկ Քոչարյանն արձագանքեց՝ ի՞նչ արձանագրություններ. «Ուզում եք, որ ես ասեմ՝ Գարիկ Ղազարյանը ղալլաթ է արե՞լ։ Բոլոր արձանագրությունները գաղտնի չեն, իսկ գաղտնի փաստաթղթերը եթե որևէ մեկի մոտ հայտնվեն, ապա պատասխանատվություն կկրեն անձինք, որոնք պատասխանատու են դրանց գաղտնիությունն ապահովելու համար։ Իսկ ինչ ասել է նա, արձանագրությունից չէ»։
Հարակից հրապարակումներ`
- Ապրիլյան և աշխարհազոր՝ պատասխանում է պաշտպանության նախարարը
- Ինչու մինչ այս Սերժ Սարգսյանը համապարփակ ու հանրայնորեն չի անդրադարձել Ապրիլյանի թեմայով շահարկումներին
- «Հրապարակ». Ապրիլյան քննիչ հանձնաժողովում այսօր տեսակապով կլսեն Բակո Սահակյանին
- ԶՈՒ ԳՇ հետախուզության վարչության նախկին պետը Ապրիլյան քննիչ հանձնաժողովում է
- «Հրապարակ». Ապրիլյան քննիչ հանձնաժողով կհրավիրվի Սեյրան Օհանյանը
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին