Ձեր վստահելի աղբյուրը

Կառավարության այսօրվա նիստի օրակարգում ընդգրկված 40 հարցերից միայն 4-ն էին զեկուցվող, որից երեքի հեղինակը Արդարադատության նախարարությունն էր:

Վարչապետ Նիկոլ Փաշինյանի առաջարկով նախարար Ռուստամ Բադասյանը փաթեթով ներկայացրեց բոլոր երեք հարցերը: Նախագծերով փոփոխություններ և լրացումներ են նախատեսվում 11 գործող օրենքներում և ներկայացվում էր նոր մշակված «ՀՀ պաշտոնական փաստաթղթերը ապոստիլով վավերացնելու մասին» օրենքի նախագիծը: Գործագիրը որոշեց բոլոր նախագծերը  անհետաձգելի ռեժիմով ուղարկել ԱԺ:

Նախարարի խոսքով փոփոխությունները միտված են վարչարարության պարզեցմանը, մատուցվող ծառայությունների ժամկետի կրճատմանը, որակի բարձրացմանը և իրավական հիմք են ստեղծելու հետագա թվայնացման աշխատանքների պարզեցման համար:

Ռուստամ Բադասյանը տեղեկացրեց, որ նոր օրենքով առաջարկվում է Քաղաքացիական կացության ակտերի գրանցման մարմինների front  և back office ձևաչափով նոր համակարգ սահմանել: Դիմումները կընդունվեն սպասարկման կենտրոնների կողմից, որոնք կարող են լինել գործող քաղաքացիական կացության ակտերի գրանցման գործակալության կենտրոնները, միասնական գրասենյակները:

Նրա խոսքով, դիմումներն կարող են ընդունել մասնավոր լիազոր օպերատորների և օտարերկրյա պետություններում հյուպատոսարանների կողմից և գրանցումները կկատարվեն Արդարադատության նախարարության կողմից՝ բացառելով դիմող և որոշում կայացնողների շփումները:

Ըստ Բադասյանի, բոլոր պաշտոնական փաստաթղթերի դեպքում ապոստիլի տրամադրումը միասնական ընթացակարգով կիրականացնի մեկ պետական մարմինը, նաև էլեկտրոնային ձևաչափով:

Նախարարը հավաստիացրեց, որ ծառայությունը մեկ օրում կտրամադրվի, իսկ Էլեկտրոնային դիմումների ներկայացման կարգի սահմանումը հնարավորություն կտա քաղաքացիական կացության ակտերի գրանցման ծառայությունների մատուցումն իրականացնել նաև առցանց հարթակի միջոցով: Առցանց անհատ ձեռնարկատեր հաշվառելու համար կվերացվի նաև 3000 դրամ պետական տուրքը:

Ռուստամ Բադասյանը հայտնեց, որ առաջին անգամ ՀՀ տարածքից դուրս հյուպատոսական հիմնարկներում ՀՀ և օտարերկրյա քաղաքացիների համար Հայաստանում բիզնես հիմնադրելու կամ հայկական ընկերության մասնաբաժին գնելու հնարավորություն կտրվի:

Նախարարը նշեց նաև, որ հանվել է օտարերկրյա պետության կողմից տրված փաստաթղթերի՝ նոտարական կարգով հաստատված թարգմանությունների ներկայացուման պահանջը և դրանք կարող են ներկայացվել որակավորման վկայական ունեցող թարգմանչի ստորագրությամբ հաստատված հայերեն թարգմանությամբ:

Փաթեթում ընդգրկված նախագծերից մեկով կրճատվել է ամուսնության գրանցումների ժամկետները, ներկայիս 10 օրից մինչև 3 ամիս ժամկետի փոխարեն, նոր նախագծով սահմանվել է, որ դիմումը ներկայացնելու հաջորդ օրվանից մինչև 6 ամիս ընկած ժամանակահատվածում դիմողն ինքը կարող է որոշել  իր ամուսնության գրանցման օրը:

Քիչ առաջ՝ ԱՆ-ն ուղարկեց հաղորդագրություն թեմայի վերաբերյալ, ըստ այդմ՝ փոփոխությունների արդյունքում․
• Փաստաթղթերն ապոստիլով կվավերացվեն մեկ պետական մարմնի կողմից միասնական ընթացակարգով, այդ թվում՝ էլեկտրոնային ձևաչափով, ընդ որում ներկա 2 կամ 3 օրվա փոխարեն 1 օրում:
• Կկրճատվեն անվան փոխման գրանցման ժամկետները․ մինչև 5 ամսից դարձել է 15 օր։
• Կկրճատվեն ուղղում,  փոփոխություն և լրացում կատարելու, ինչպես նաև ակտի վերականգնում կատարելու համար մինչև 4 ամիս ժամկետը մինչև 15 աշխատանքային օր:
• Ուղղագրական սխալների փոփոխման համար սահմանված ժամկետը կկրճատվի մինչև 3 օր։

• Կսահմանվի էլեկտրոնային դիմումների ներկայացման կարգ, որի արդյունքում․
- ՔԿԱԳ ծառայությունների մատուցումը կիրականացվեն նաև օնլայն հարթակի միջոցով։
- Կընդլայնվեն պետական ռեգիստրի էլեկտրոնային ծառայությունները։
- Առևտրային կազմակերպությունների  գրանցման ժամկետը կկրճատվի ու կսահմանվի 1 աշխատանքային օր (սրա արդյունքում Հայաստանը Doing Business զեկույցի «Բիզնես սկսելը» ցուցիչով 10-րդ հորիզոնականից կարող է տեղափոխվել 2-րդ հորիզոնական, իսկ եթե օնլայն գրանցումները մեծամասնություն կազմեն՝ անգամ 1-ին տեղ):
- Լիազորված անձի միջոցով անհատ ձեռնարկատեր հաշվառվելու հնարավորություն կընձեռնվի:
- Առաջին անգամ հնարավորություն կտրվի ՀՀ տարածքից դուրս հյուպատոսական հիմնարկների կողմից ընդունել ինչպես ՀՀ քաղաքացիների, այնպես էլ օտարերկրյա քաղաքացիների դիմումներ Հայաստանում բիզնես հիմնադրելու կամ հայկական ընկերության մասնաբաժին գնելու համար, ինչը կարող է նպաստել ներդրումների ներգրավման գործընթացին:
Նախագծերի փաթեթով կբարձրանա նաև մի քանի ծառայությունների պետտուրքերի չափը՝
- Կուսակցությունների գրանցումը կդառա 50 հազար դրամ,
- Իրավաբանական անձի վերակազմակերպումը կդառնա 50 հազար դրամ,
- Անվան փոխման համար պետտուրքը կդառնա 30 հազար դրամ,
- ՔԿԱԳ վկայականի կրկնօրինակի պետտուրքը կդառնա 5 հազար դրամ  և այլն։