Ձեր վստահելի աղբյուրը

«Միայն 2020 թվականին գյուղական բնակավայրերից միջինը 3000 բնակիչ տեղափոխվել է տարբեր քաղաքներ, իսկ ավելի քան 6000 քաղաքացի տեղափոխվել է Երևան»,- ԱԺ հայտարարությունների ժամանակ հայտնեց «Լուսավոր Հայաստան» խմբակցության պատգամավոր Սրբուհի Գրիգորյանը և այն բացատրեց գործադիրի կողմից ծրագրերի ոչ ճիշտ ընտրությամբ:

Ըստ պատգամավորի, եթե նման ձևով շարունակվի, ապա10 տարի հետո քաղաքացիները իրենց հարցնելու են, թե ինչո՞վ են պատգամավորները ժամանակին զբաղված եղել:

Գրիգորյանը դրական համարեց Աշխատանքի և սոցիալական հարցերի նախարարությանը հատկացված բյուջեի բարձրացումը, բայց պնդեց, որ այն պետք է նպատակային ծախսվի:

Պատգամավորն այն համոզման է, որ նախարարության աշխատանքի չափելու միջոցներից մեկը դեպոպուլացիայի երևույթի կանխումը պետք է լինի:

«Այն օրը, որ մենք կանգնեցնենք դեպոպուլացիան՝ վստահ կարող ենք ասել, որ ճիշտ ուղու վրա ենք»,- հայտնեց պատգամավորը:

Նրա խոսքով, Երևանը գյուղաբնակներին ձգում է այստեղ շատ բնակելի տներ կառուցվելու պատճառով:

Սրբուհի Գրիգորյանը նկատեց, որ Երևանում վթարային շենքերի բնակիչները միանգամից բնակարանի բանալի են ստանում, մինչդեռ մարզերում պետությունը գնում է փոխհատուցման և աջակցության ծրագրերով, ասում է՝ վերցրու փողը ու գնա ուր ուզում ես:

«Լուսավոր Հայաստան» խմբակցության պատգամավորը շեշտեց, որ մեկ ամսում անապահով երկու ընտանիքներում ողբերգական դեպքեր տեղի ունեցան, բայց  չիմացան թե ո՞վ է դրա համար պատասխանատու:
«Ո՞ւր էին սոցաշխատողները, ինչո՞ւ չեն վեր հանում նման ընտանիքները, թե կյանքի հատակում հայտնված ընտանիքները մեզ հետաքրքիր չեն»,- հայտարարեց պատգամավորը՝ անդրադառնալով Խաշտարակի ընտանիքի դեպքին:

Դրանից հետո, պատգամավորի տեղեկացմամբ, Սյունիքի մարզի Դաստակերտ փոքր գյուղում տեղի է ունեցել մեկ այլ ողբերգություն՝ բազմազավակ մայրն  էր իրեն կախել: Դեպքի առիթոց պատգամավորը գրություն  է ուղարկել Աշխատանքի և սոցիալական հարցերի նախարարին, փոխվարչապետ Տիգրան Ավինյանին և մինչ օրս ոչ մի արձագանք չի ստացել կառավարությունից, մինչդեռ 5 անչափահաս երեխա հայտնվել են անորոշության մեջ, հայր էլ չունեն:

Պատգամավորը հայտարարեց, որ գործադիրի անտարբերությունը իր համար ահազանգ է, որ նման դեպքերը շարունակվելու են, մինչդեռ նախարարը այդ ընթացքում գնացել է արձակուրդ:

«Լուսավոր Հայաստան» խմբակցության պատգամավորը նկատեց, որ այսօր քաղաքացիներ կան, որ առաջին գծում առողջություն են քայքայել և տարեկան երկու անգամ  750 հազար դրամի դեղորայք են ընդունում, իսկ պետությունը չի ուզում աջակցել նրանց:

«Թե զինվորներին մեր գնահատականը վերջանում է զինվորական հագուստ հագնել՝ նկարվելով»,- եզրափակեց Սրբուհի Գրիգորյանը: