Ձեր վստահելի աղբյուրը

«Այսօր մեր գերնպատակն է՝ սրբորեն պահել Եռաբլուրը, որը հիմքն է մեր անկախության, պետականության»,- Եռաբլուրում  լրագրողներին ասաց Երկրապահ կամավորակամն միության նախագահ, ԱԺ «Իմ քայլը» խմբակցության անդամ Սասուն Միքայելյանը։

Նա նշեց, որ Երկրապահը միշտ պատրաստ է լինել Հայաստանի, Արցախի բանակի կողքին որպես ռեզերվ, և դա կա, կլինի ու կմնա։

Աշխարհազորի ստեղծման մասին հարցին  ի պատասխան ԵԿՄ նախագահն ասաց. «Աշխարհազորը Երկրապահի հետ ընդհանրապես կապ չունի։ Աշխարհազորը պետք է լուրջ կառույց լինի։ Երկրապահը 1990-ականների Վազգեն Սարգսյանի գլխավորությամբ ստեղծվել է աշխարհազորի հիման վրա։ Աշխարհազորը երբեք Երկրապահին չի խանգարի, Երկրապահն էլ՝ աշխարհազորին։  Կողմ եմ աշխարհազորի ձևավորմանը, բայց մեծ  քանակությամբ։

Թող մոռանան բոլորը, որ Երկրապահի անունը հանկարծ կփոխվի, որովհետև դա ստեղծել է Վազգեն Սարգսյանը։ Դա անջնջելի է։ Իսկ կից աշխարհազորին, կարող է հետագայում լինի»։

Ս. Միքայելյանն ասաց, որ Հայաստանի պատերազմն այսօր գնում է ոչ միայն Ադրբեջանի, նաև արդեն Թուրքիայի հետ։ Դրա համար, ըստ նրա, պետք է զգույշ լինել, ճիշտ քաղաքականություն վարել, մեծ պետությունների վերադասավորումների մեջ  լինել խելոք։

Ս. Միքայելյանի խոսքով, ՌԴ դարպասն է Հայաստանը, պետք է Ռուսաստանն օգնի Հայաստանին։ 

«Պետության շահը պետք է պահվի։ Շատ զգույշ լինենք, համախմբած»,- ընդգծեց նա։ 

Հարցին՝ պետության շահերի՞ց է բխում, որ «Իմ քայլի» պատգամավորները  թուրք պատմաբանների հետ համատեղ  պատմության գրքեր են կազմում, Ս. Միքայելյանն ասաց. «Ասում եմ՝ դա իմ շահերից չի բխում։ Կարող է այդ պատգամավորի անձնական շահերից, որ բաներ է  բխում, դիվանագիտական քայլեր է անում, չի նշանակում, որ պետք է բերել ու ընդհանրացնել։  Այսօր  մենք պետք է զգույշ լինենք»։

Նա նշեց, որ պատերազմի վտանգ տեսնել է 1990 թվականից մինչ օրս, այսօր էլ է տեսնում. «Մենք պատերազմի մեջ ենք, պատերազմ է, որը դեռ չի ավարտվել, պետք է համախմբված լինենք»։

Հարցին՝ Ադրբեջանի նախագահը հայտարարել է, որ բանակցությունները տապալված են, մեղավորը Հայաստանն է, Ս. Միքայելյանն ասաց. «Երբևէ լսե՞լ եք, որ Ադրբեջանի ղեկավարը բանակցության մասին խոսի,  երբ էր սկսել, որ հիմա էլ տապալվել է։ Իրենք ասում են՝ լրիվ մերն է։ Մենք էլ պետք է պատրաստ լինենք լրիվի դեմն առնենք, մենք էլ գիտակցենք, որ լրիվը մերն է»։

Լրագրողի հարցին՝ պատերազմական իրավիճակում որքանո՞վ է նպատատակահարմար ԱԺ-ում շրջանառության մեջ դրված նախագիծը, ըստ որի՝ 27 տարին լրացած ու բանակից խուսափած անձիք որոշակի գումարի դիմաց ազատվում են քրեական պատասխանատվությունից, Ս. Միքայելյանն ասաց. «Նրանք երբեք չեն գա Հայաստան, լավ չի՞  գումարը վերցվի, տրվի բանակին։  Ճիշտ եմ համարում դա»։

Ըստ նրա, այսօր շատերը, գրեթե 70 տոկոսը  ձգտում են, որ իրենց երեխաները ծառայեն։