Ձեր վստահելի աղբյուրը

Հայաստանում կորոնավիրուսի վարակակիրների թվի ավելացումը եթե շարունակվի, առողջապահական համակարգն ուղղակի չի կարող դիմակայել, իսկ այսօր, այս պահին բժիշկները, հիվանդանոցային մահճակալները զինվորներին են պետք:  Վերջին երկու շաբաթվա ընթաքում ահազանգում են առողջապահական ոլորտի պատասխանատուները:

Panorama.am-ը զրուցել է ՀՀ ԱՆ հիվանդությունների վերահսկման և կանխարգելման ազգային կենտրոնի ներհիվանդանոցային վարակների համաճարակաբանության բաժնի պետ Ռոմելլա Աբովյանի հետ:

Panorama.am-Ինչպե՞ս կգնահատեք այսօր կորոնավիրուսային հիվանդության հետ կապված վիճակը Հայաստանում:

Ռ. Աբովյան-Իրավիճակը ծայրահեղ ծանր է,  այս երկու շաբաթվա ընթացքում նախորդ երկու շաբաթվա համեմատ 148 տոկոս աճ ունենք: Եթե այսպես շարունակվի,  առողջապահական համակարդն ուղղակի չի կարող արդեն դիմակայել:

Եթե բնակչությունը զգոնությունը բարձրացնի, սկսի դիմակներ կրել, պահի անվտանգության կանոնները, հաջորդ 14 օրվա ընթացքում  արդեն պետք է տեղաշարժ լինի դեպի նվազում, եթե ոչ, ապա հակառակը:

Panorama.am - Կարելի՞ է սա համարել վարակի երկրորդ ալիք:

Ռ. Աբովյան-Դժվար է նման բան ասել: Մենք այն վիճակում ենք, որ նպաստեց այս ամեն ինչին:  Ռեալ գնահատել երկրորդ ալիք՝  դժվար է ասել: Կանխատեսումներ կային, որ որոշակի բարձրացում կունենանք, բայց ոչ այսքան: Այս վիճակը բացատրվում է անվտանգության կանոններն ուղղակի չպահպանելով:

Այս պայմաններում միայն մեկ կոչ ունեմ՝ որպեսզի բոլորը սթափվեն, այսպես շարունակվել էլ չի կարող: Յուրաքանչյուր մարդ, որը վարակվում է, դառնում վարակի աղբյուր մյուսների համար, նպաստում է, որ վիրավոր զինծառայողների փոխարեն մահճակալները զբաղեցնեն այն մարդիկ, որոնք կարող էին չվարակվել դիմակ կրելով, ձեռքերն ախտահանելով ու սոցիալական հեռավարություն պահելով:

Սա զենք բռնել չի, սա հրետանիով կրակել չի, ընդամենը շատ պրիմիտիվ կանոնների պահպանում է, յուրաքանչյուր անձ կարող է իրականացնել:

Panorama.am- Հիվանդների տարիքային խմբում փոփոխություններ կա՞ն:

Ռ. Աբովյան- Փոփոխություններ չեն եղել, միջին տարիքը 55 տարեկանից բարձր է: Դեռևս կտրուկ փոփոխություն տարիքային խմբում չկա:

Panorama.am - Հիվանդության նոր ախտանշաններ նկատվո՞ւմ են:

Ռ. Աբովյան- Ոչ, նույնն են՝ ջերմություն, հազ:

Panorama.am- Հիվանդանոցներում բուժող ստացողները մեծ տոկոս են կազմո՞ւմ:

Ռ. Աբովյան- Շատ շատ են:  Հիվանդանցոներն ընդունում են միայն ծանր դեպքերը:  Եթե մարտ, ապրիլ, մայիս ամիսներին ընդունում էինք նաև թեթև ծանրության, մարտին ունեինք նաև անախտանշան դեպքերը, այսօր բուժհիմնարկներն ընդունում են միայն ծանր դեպքերը, մնացածը բոլոր բուժվում են տանը: Սա ահազանգ է, որ, իրոք, բնակչությունը պետք է սթափվի:

Panorama.am-Շնորհակալություն զրույցի համար:

Նշենք, որ այսօր կորոնավիրուսից մահացել էր 16-ամյա աղջիկ: ԱՆ-ից հայտնել են,  որ Հայաստանում համավարակի տարածման սկզբից ի վեր, երեխայի մահվան առաջին դեպքն է արձանագրվել կորոնավիրուսային հիվանդությունից:
Երեկ վիրուսից 49 տարեկան կին և տղամարդ, նախորդ օրերին 43, 45, 46, 47, 50, 51 տարեկան հիվանդներ էին մահացել: Ակնհայտորեն կորոնավիրուսը «երիտասարդացել» է: