Ինչպե՞ս է աշխատանքի և սոցիալական հարցերի նախարարությունն աջակցում արցախցիներին
«Նախարարությունը հիմնականում համակարգում է արցախցի մեր հայրենակիցների առջև ծառացած սոցիալական բնույթի խնդիրների լուծումը, մասնավորապես՝ կացարանի, հագուստի և սննդի ապահովում»,- այսօր լրագրողների հետ հանդիպմանն ասաց ՀՀ աշխտանքի և սոցիալական հարցերի նախարարի տեղակալ Տաթևիկ Ստեփանյանը՝ ներկայացնելով Հայաստանում ապաստանած արցախցիներին ուղղված սոցիալական աջակցության աշխատանքները։
Նրա խոսքով, այս պահին Հր. Ներսիսյան 14/1 հասցեում (ք. Երևան) ստեղծվել է ժամանակավոր կայանման կետ։ Նպատակն այն է, որ արցախցի մեր հայրենակիցները, որոնք ժամանում են ՀՀ և չունեն հյուրընկալող ընտանիք և կայանելու վայր, կարողանան մոտենալ ժամանակավոր կայանման կետ, որտեղից կվերաուղղորդվեն իրենց ժամանակավոր կացարաններ։
«Նախարարության կողմից ռազմական դրության հայտարարման պահից սկսած գործարկվել է 114 թեժ գիծը, որն այժմ 24-ժամյա ռեժիմով է աշխատում։ Կառավարության կողմից էլ գործարկվել է 117 թեժ գիծը։ Մենք շուրջօրյա աշխատող 36 օպերատորների միջոցով հավաքագրում ենք ինֆորմացիա՝ մի կողմից ապաստան կամ աջակցություն հայցող քաղաքացիների համար, մյուս կողմից՝ մեզ են դիմում քաղաքացիներ, որոնք պատրաստ են աջակցություն տրամադրել։ Նաև իրականացրել ենք Արցախի գիշերօթիկներից և տարեցների խնամքի կենտրոններից շահառուների տեղափոխում և նրանց խնամքի կազմակերպում։
Բացի այդ, արցախցիների կենսաթոշակների և նպաստների վճարումը կկատարվի սահմանված չափով։ Հոկտեմբեր ամսվանից սկսած այդ վճարումները մենք կատարում ենք։ Արցախի քաղաքացիներն իրենց անձը հաստատող փաստաթղթով կարող են մոտենալ ՀՀ-ի իրենց փաստացի կացարանին մոտ գտնվող որևէ «Հայփոստ»-ի բաժանմունք»,- ներկայացրեց փոխնախարարը։
Նա նաև տեղեկացրեց, որ Կառավարությունը պատրաստել է օրենսդրական նախաձեռնություն, համաձայն որի՝ ՀՀ քաղաքացիներն իրենց սոցփաթեթներում կուտակված գումարները կարող են փոխանցել «Հայաստան» համահայկական հիմնադրամին։
«Արցախի Հանրապետության քաղաքացիները կարող են դիմումներ ներկայացնել սոցիալական ապահովման ծառայության իրենց տեղակայման վայրին մոտ որևէ տարածք, որպեսզի սկսվի իրենց թոշակների վերանշանակման կամ փաստացի վճարման գործընթացը»,- նշեց Տաթևիկ Ստեփանյանը։
Փոխնախարարը հավելեց, որ արցախցիներին աջակցելու համար ստեղծված բոլոր ինքնաբուխ խմբերն արդեն համագործակցում են նախարարության հետ.
«Նախարարությունը հիմնականում համակարգում է ժամանակավոր կացարանների տրամադրման գործընթացը, իսկ սննդի և հագուստի համակարգումն իրականացնում են ՏԻՄ-երը»։
Դիտարկմանը, որ հաճախ են սոցցանցերում հայտարարություններ տարածվում, որ արցախցի ընտանիքին բնակարան է պետք, ինչի՞ հետևանք է դա, Տաթևիկ Ստեփանյանն արձագանքեց՝ հիմնականում մեկ հայտարարությունը կրկնվում է տասնյակ անգամներ, և արձագանքումը միանգամից է։
«Նման դեպքերում որևէ սոցիալական ցանցում գրառում անելու փոխարեն կոչ եմ անում ուղակի զանգահարել 117, 114 թեժ գծեր։ Էն հանգամանքը, որ թեժ գիծը կարող է ծանրաբեռնված լինել և զանգից մեկ վայրկյան անց չպատասխանել, նորմալ է։ Զանգից հետո առավելագույնը մեկ ժամի ընթացքում մեր աշխատակիցները արձագանքում են»,- նշեց նա։
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
