Ձեր վստահելի աղբյուրը

Արցախի Հանրապետության նախագահ Արայիկ Հարությունյանն այսօր հանդիպել է Արցախյան առաջին պատերազմի լեգենդար հրամանատարներ Վլադիմիր Բալայանի և Շահեն Մեղրյանի անվան կամավորական ջոկատների ազատամարտիկների հետ:

«Հայոց պատմության այս կարևորագույն շրջափուլում, երբ վտանգված են մեր ժողովրդի անվտանգությունն ու մեր ազգային շահերը, նրանց դերակատարությունն անգնահատելի է, ինչպես և եղել է Վլադիմիր Բալայանի ու Շահեն Մեղրյանի դեպքում: Հայրենի հողի փրկության համար նրանց գործած սխրանքների մասին խոսելու դեռ շատ առիթներ կունենանք, բայց հընթացս պարտավոր ենք հանդիպել, քննարկել իրավիճակը և պարգևատրել»,- ֆեյսբուքյան իր էջում գրել է Արայիկ Հարությունյանը։

Հանդիպման ընթացքում նախագահն ասել է, որ այսօր իր համար ամենակարևոր օրերից մեկն է, քանի որ հանդիպում է լեգենդար զորամիավորման զինվորների հետ։

«Արցախյան առաջին պատերազմի տարիներին ջոկատները անվանակոչվում էին Արաբոյի, Արամոյի անունով, իսկ այսօր՝ Արցախյան պատերազմի հերոսների անուններով։ Այսօր այդ հերոսների սերունդն է պայքարում ամենահզոր սպառազինություն ունեցող բանակի դեմ։ Եվ ոչ միայն պայքարում է, այլ նաև ոչնչացնում է՝ ի լուր աշխարհի։ Մեր դեմ կռվում են Թուրքիան, տարբեր երկրներից ժամանած վարձկանները և իհարկե, Ադրբեջանը։ Այսօր նույն Վլադիմիր Բալայանի անվան զորամիավորման հինգ հոգանոց խմբին հաջողվել է հերթական ապացույցը ձեռք բերել, որ մենք կռվում ենք վարձկանների դեմ։ Իսկ Մեղրյանի անվան խումբը մի քանի օր պայքարում էր ադրբեջանական, թուրքական ամենաէլիտար հատուկ ստորաբաժանումների դեմ՝ Ավետարանոցի հատվածում»,- նշել է Արայիկ Հարությունյանը։

Նախագահ Հարությունյանը տեղեկացրեց, որ իր հրամանագրով «Արիության» մեդալով հետմահու պարգևատրվում է Շահեն Մեղրյանի զինվորական ջոկատի կամավորականներ Գևորգ Կիրակոսյանին,  Մխիթար Գրիգորյանին, Էրիկ Պողոսյանին, Հրայր Ասրյանին և Էդիկ Հայրապետյանին։

Ինչ վերաբերում է «Վլադիմիր Բալայան» կամավորական ջոկատին, ԱՀ նախագահն ասաց. 

«Այսօր ուզում եմ ևս պարգևատրել մեր հինգ հոգանոց խմբի անդամներին, որոնք խախտելով ինձ հետ եղած պայմանավորվածությունը, ռիսկի դիմելով, գնացել և գերել են մեկ վարձկանի։

Պարգևատրել Վլադիմիր Բալայանի անվան կամավորական ջոկատի անդամներ՝ Վլադիմիր Բալայանի որդի Ալեքսեյ Բալայանին «Մարտական խաչ» առաջին աստիճանով։ «Մարտական խաչ» երկրորդ աստիճանի շքանշանով պարգևատրել կամավորներ Արմեն Բաղունցին, Արթուր Մնացականյանին, ով նաև Ներքին Հորաթաղի համայնքի ղեկավարն է, և Հարութ Խաչատրյանին»։

Նախագահը նաև հայտնեց, որ երբ Ալեքսեյ Բալայանը զանգել է իրեն և ասել՝ իրենց առաջ կան այդ վարձկաններից ու ուզում են գնալ, ապացույց բերել, ինքը կատեգորիկ արգելել է և հորդորել՝ ռիսկի չդիմել. «Բայց ահա առավոտյան Ալեքսեյ Բալայանը կապ է հաստատել ու հայտնել՝ մեկին գերել են, էլի հնարավորություն ունեն, սակայն ասել եմ՝ այդ հնարավորությունը չօգտագործեք, որովհետև ձեր կյանքը շատ ավելին է, քան՝ ցանկացած վարձկան գերելը»։