Մեղավորի օրագիր գրելու փոխարեն պիտի զինվորների զորանոցի հարցը լուծի. Մարուքյան
«Ամենայն անկեղծությամբ չեմ ընթերցել, արձագանքներն եմ տեսել։ Ես կարծում եմ, որ արդարանալու փոխարեն, օրինակ, պետք է լուծել զինվորների զորանոցի հարցը, պետք է դաշտային, վրանային զորանոցներ հիմնել, ինչը թանկ հաճույք չէ»,- այսօր խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով վարչապետ Նիկոլ Փաշինյանի վերջին գրառումներին։
Նրա խոսքով, այդ հոդվածները գրելու և արդարանալու փոխարեն պետք է գործ անել, մի բան անել.
«Զինվորների ծնողները Կառավարության շենքի առաջ պահանջում են իրենց երեխաներին հետ բերել, հարց ես տալիս՝ ինչու, պատասխանում են՝ մեկը հիվանդ է, մյուսի համար պայման չկա։ Պարզ է՝ զորանոցներ չկան, պայթեցվել են, և այդ մարդիկ անտառային պայմաններում են տեղակայված։ Բայց այդ պայմաններում էլ կարելի է նորմալ գնումներ կատարել ու վրանային ճամբարներ ստեղծել։ Դա մի քանի ժամվա մեջ կազմակեպվող հարց է։ Հիմա ի՞նչ դժվար է այս խնդիրը կարգավորել, դիմացը ձմեռ է, կորոնավիրուսն էլ ընկել է մեջները։ Հիմա հոդված գրելու ժամանա՞կն է։ Դժվա՞ր է այդ գնումներն անելը, դա՞ էլ ընդդիմությունն անի»։
Պատգամավորը նկատեց՝ հասարակությունն իրենց է մեղադրում, որ ոչինչ չեն անում, սակայն այդ նույն հասարակությունը պետք է նաև հասկանա՝ ումից ինչ է պետք սպասել ու պահանջել։ Դա, ըստ նրա, նույնն է, ինչ մեկի տան գազն անջատեն, բայց ինքը գնա ջրմուղ և ասի՝ գազս անջատել են։
«Պետք է մեր ժողովուրդն էլ էլի հասկանա՝ ումից ինչ է ուզում։ Փոխանակ վարչապետից պահանջեն, որ աշխատի, մեկն ինձ գրում է՝ ինչո՞ւ դուք չեք տանում այդ վրանները։ Մեծ սիրով կանեի, եթե նման հնարավորություն լիներ։ Վերջին հաշվով ամեն մարդ պետք է իր գործով զբաղվի՞, թե՞՝ չէ։ Ուզում եմ հասկանալ, պարտության մեջ ո՞նց է, որ միայն նախկիններն ու ընդդիմադիրներն են մեղավոր, բա ո՞վ էր երկրի գերագույն գլխավոր հրամանատարը, կարո՞ղ է մեր ֆրակցիայից մեկն էր, բայց մենք չգիտեինք»,- ընդգծեց Էդմոն Մարուքյանը։
Նա տեղեկացրեց, որ հոկտեմբերի 11-ի ԱԽ նիստի ընթացքում Նիկոլ Փաշինյանն ասել է՝ մենք պարտվում ենք։ Բայց վարչապետի առաջարկած լուծումն այն է եղել, որ պետք է կարճաժամկետ հրադադար լինի, որից հետո շարունակվելու է պատերազմը.
«Ես ասել եմ՝ գնա Ռուսաստան, դիմի նրան, թող արագ դադարեցնեն։ Երբ ինքն ասում է, որ մենք շատ լավ իմացել ենք, այդ շատ լավ իմանալուց հետո ասել ենք՝ դադարեցրեք պատերազմը։ Եվ այսօր որ ինքը մեղավորի օրագիր է գրում, չի հերքում, որ իրեն ՌԴ-ի կողմից առաջարկվել է Շուշին թողնել ՀՀ վերահսկողության տակ՝ այնտեղ փախստականների վերադարձի պայմանով, իսկ ինքը մերժել է։ Այսինքն՝ հնարավոր է եղել կռիվը մի 20 օր շուտ դադարեցնել, բայց չի դադարեցվել։ Ինչո՞ւ՝ չգիտեմ»։
Էդմոն Մարուքյանը նշեց, որ ինքը հարցրել է Փաշինյանին, թե ո՞րն է գերագույն գլխավոր հրամանատարի պլանը, բայց նախքան պատասխանը նաև ասել է՝ միայն ռացիոնալ պլանի մասին է խոսքը, որին ի պատասխան ՀՀ վարչապետն ասել է. «Է, ռացիոնալ բան չկա, միայն իռացիոնալ է»։
Ըստ ընդդիմադիր պատգամավորի, հիմա պետք է այս քննարկումներից դուրս գալ, որոնք Նիկոլ Փաշինյանն է առաջ բերել՝ այլ հարցերից խուսափելու համար։
«Այս ամենում կա մի մեղավոր, այդ մարդու անունը Նիկոլ Վովայի Փաշինյան է։ Եթե մեկը կասկածում է, թող ԱԽ նիստի ձայնագրությունները հրապարակի։ Ես այդ հարցերի մեջ չեմ մտնելու, քանի որ դա արդեն ավարտված էտապ է, դա հետո քննիչները կքննեն։ Հիմա պետք է արագ ռեժիմով խնդիրներ լուծենք։ Զոհված զինծառայողների և հաշմանդամություն ունեցողների աջակցության հիմնադրամը դատարկվում է, այդ խնդիրն ունենք լուծելու, զինվորները գետնին են քնում..., այս խնդիրները լուծելու փոխարեն ամեն օր արդարանում է՝ այսինչը զանգեց այնինչին, այ ցավդ տանեմ, բա դրա ժամանա՞կն է»,- ասաց Էդմոն Մարուքյանը։
Հարակից հրապարակումներ`
- Զինծառայողների շրջանում բարոյահոգեբանական վիճակը ծանր է, նրանց հետ հոգեբաններ չեն աշխատում. զինվորի մայր
- Մենք չգիտենք՝ Ադրբեջանն ինչ է ասում՝ գերիներին տալի՞ս է, չի՞ տալիս..., քանի՞ գերի կա. Մարուքյան
- Զինվորի հայր. Փաշինյանն ինձ ասում է՝ երկու տեղանի կռավա՞տ ես ուզում տանենք այնտեղ զինվորի համար