Ձեր վստահելի աղբյուրը

Մեկնարկել են ԱԺ ճեպազրույցները։ «Իմ քայլը» խմբակցության պատգամավորներ Բաբկեն Թունյանն ու Համազասպ Դանիելյանը պատասխանում են լրագրողների հարցերին։ Ստորև ներկայացնում ենք հնչած հարցերն ու պատասխանները։

Հարց. Ընդդիմությունը, տարբեր հասարակական կառույցներ, ՀՀ չորս նախագահները, եկեղեցին, հազարավոր քաղաքացիներ պահանջում են վարչապետ Նիկոլ Փաշինյանի հրաժարականը, բայց իշխանական որոշ պատգամավորներ կարծիք են հայտնում, որ այդ պահանջը ժողովրդինը չէ, այսինքն՝ Փաշինյանի հրաժարականը պահանջող եկեղեցին, օրինակ, ժողովուրդը չէ։ Ըստ Ձեզ, ո՞վ է ժողովուրդը, ո՞վ պետք է պահանջի Փաշինյանի հրաժարականը։

Բ. Թունյան.  Իմ կարծիքով, Նիկոլ Փաշինյանի հրաժարականը պահանջող քաղաքացիները ժողովրդի մի մասն են։

Հ. Դանիելյան. Ժողովրդի տարբեր մասեր կարող են միաժամանակ տարբեր բաներ պահանջել։ Դա ստուգելու միակ ձևը ընտրություններ անցկացնելն է։

Հարց. Հիմա դուք համարո՞ւմ եք, որ կա հանրային պահանջ՝ Նիկոլ Փաշինյանի հրաժարականի վերաբերյալ։

Հ. Դանիելյան. Ինձ համար արժեքավոր է ՀՀ յուրաքանչյուր քաղաքացու պահանջը, ակնկալիքն ու զգացումը։ Հատկապես,  երբ խոսում ենք այն քաղաքացիների մասին, որոնք հիմնավոր, թե անհիմն, բայց պահանջներ են ներկայացնում՝ հենց իրենցով, և ոչ թե հանգամանքներով պայմանավորված։

Հարց. Էրդողանը երեկ բացահայտեց, որ ստեղծվելու է համագործակցության հարթակ, որին մասնակից են դառնալու նաև Ռուսաստանը, Վրաստանն ու Իրանը։ Եվ եթե Հայաստանն ուզի, ապա կարող է ևս մասնակից դառնալ այդ հարթակին։ Միևնույն ժամանակ, իմքայլական պատգամավոր Անդրանիկ Քոչարյանը վերջերս հայ-ադրբեջանական դիվանագիտական հարաբերությունների կայացումից էր խոսում, արդյո՞ք սա կարող է այդ հարաբերությունների կայացման հարթակ լինել, և արդյո՞ք խմբակցությունը կիսում է Անդրանիկ Քոչարյանի հնչեցրած այդ միտքը։

Բ. Թունյան. Ճիշտ կլիներ հարցն ուղղել ֆռակցիայի ղեկավարին, կամ Անդրանիկ Քոչարյանին։ Բայց, եթե ընդհանուր նայենք, ապա պետք է հիշեցնեմ, որ Հայաստանը երկար տարիներ մասնակցում է, օրինակ «Սևծովյան տնտեսական համագործակցության» կազմակերպությանը, որտեղ մասնակցում են նաև Թուրքիան, Ադրբեջանը, Վրաստանը, Ուկրաինան և Ռուսաստանը։ Եթե գլոբալ վերցնենք, ապա Հայաստանը պետք է սեփական շահերն առաջնորդի, և եթե այդ շահերից բխում է ինչ-որ պլատֆորմին մասնակցելը, ապա պետք է մասնակցի։

Հարց. Իշխանական խմբակցության պատգամավորները չեն բացառում արտահերթ խորհրդարանական ընտրությունների անցկացումը։ Այս համատեքստում «Ընտրական օրենսգրքի» ընդունման հետ կապված ի՞նչ քայլեր են իրականացվում։ Հնարավո՞ր է՝ առաջիկայում նախագծի քննարկումը լինի։

Հ. Դանիելյան. «Ընտրական օրենսգրքի» փոփոխություն ՀՀ-ում տեղի ունեցել է արդեն։ Ասվածը վերաբերում է միայն ՏԻՄ-ին։ Մենք ժամանակացույց ունենք, թե ինչ հերթականությամբ ենք փոփոխություններ իրականացնելու։ Հիմա մենք աշխատանքների ամփոփման փուլում ենք, և փորձելու ենք առաջիկա մեկ ամսվա ընթացքում նախագիծ ստեղծել և շրջանառել։ 2021 թվականի սկզբում կունենանք արդեն «Ընտրական օրենսգրքի» նախագիծ, և դրան հաջորդող 2 ամիսներին արդեն կլինի նախագծի քննակում և ընդունում։