Ձեր վստահելի աղբյուրը

«Կորոնավիրուսային համաճարակային իրավիճակն ողջ աշխարհում շարունակում է մնալ լարված: Հայաստանում ամանորյա տոներին ու դրանից առաջ, հետո մեզ մոտ նկատվում է  համաճարակային իրավիճակի համեմատաբար կայունացում, դեպքայնության նվազում»,- ասուլիսում ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը:

Նա համեմատության համար նշեց, որ վարակի վերարտադրման ցուցանիշը նախորդ 14 օրերին 0,84  էր, դրան նախորդող 14 օրվա ցուցանիշը՝ 1,43:

«Բայց չպետք է մոռանանք, որ Ամանորի տոներին բազմատեսակ շփումներ ենք ունեցել, թեպետ   հակահամաճարակային միջոցառումները, սահմանակափակումները շարունակվում էին: Կանխատեսվում է, որ առաջիկայում մի փոքր աշխուժացում կունենանք, արդեն իսկ այդ միտումը դիտում ենք»,- ասաց ԱՆ ներկայացուցիչը:

Նրա խոսքով, Հայաստանը թեստերի  բավարար քանակություն ունի, թեստավորումները շարունակվում են, ուղղակի դեպքերի նվազման ֆոնի վրա դիմելիությունն է պակասել:  Օրական կտրվածքով, հանձնած թեստերի միջինը 16-16,5 տոկոսն է դրական լինում:

Գ. Սահակյանը նշեց, որ կորոնավիրուսային հիվանդությամբ այս պահին փաստացի բուժում է ստանում մոտ 8300 հիվանդ: Դեպքերն առավ շատ գրանցում են 55-60 և 30-35 տարեկանների շրջանում, 0-5  և 15-20 տարեկանի միջակայքում:

Նա տեղեկացրեց նաև, որ վերջին ամիսներին, ինչպես և համավարակի սկզբում, մահվան դեպքերը գրանցվում են հիմնականում տարեցների՝ 70-ից բարձր ու ուղեկցող քրոնիկական հիվանդություն ունեցող  հիվանդների շրջանում, ավելի երիտասարդների շրջանում միտում չկա:

Ինչ վերաբերում է կրկնավարակի դեպքերին, Գ. Սահակյանն ասաց, որ դեռևս նույնիսկ ԱՀԿ չունի հստակ սահմանում, թե որն է կրկնավարակը, քանի որ կոնկրետ այս վիրուսը նոր է, դեռ լավ ուսումանսիրված չէ. «Հստակ ասել, թե Հայաստանում ինչքան կրկնավարակի դեպք ունենք, որևէ մեկը չի կարող: Մի շարք գործոններից է կախված, պետք է համոզված լինենք, թե կոնկրետ վիրուսի մուտացիա եղել է, թե ոչ, կոնկրետ առաջին վարակի ժամանակ որ շտամով է վարակված եղել, հետագայում նորից փաստը գրանցվելու դեպքում նույն շտամն է գրացվել, թե տարբեր շտամով է վարակվել»:

Կոլետիվ իմունիտետի հետ կապված մասնագետն ասաց, որ նախկին վարակիչ հիվանդությունների դեպքում ընդհանուր բնակչության առնվազն 70-80 տոկոսը պետք է վարակվեին և միայն այդ դեպքում կարող են ասել որ ունեն որոշակի իմունշերտ և վիրուսի հետագա տարածման տեսանկյունից կարող են խոչընդտոներ առաջանալ: Գ. Սահակյանի խոսքով, Հայաստանում այդ շեմը, իհարկե, հաղթահարված չէ, հետևաբար կանխատեսում են վարակի հնարավոր աշխուժացում: 

Ասուլիսին ներկա Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցն ասաց, որ եթե նույնիսկ նոր՝ բրիտանական շտամ չգրանցվի Հայաստանում, էլի կարող ենք ունենալ դեպքերի ավելացում: Միևնույն ժամանակ նշեց, որ բրիտանական շտամն ավելի արագ է վարակում մարդկանց, սակայն կանխարգելման, բուժման ընթացքը, նույնիսկ պատվաստանյութը, ոչնչով չեն տարբերվում արդեն գրանցված տեսակից, մարդը նույն ձևով է հիվանդանում:

Հարցին՝ նշվեց, որ նոր շտամի հայտնաբերման, հետազոտության համակարգի ներդրումը ընթացքի մեջ է, ի՞նչ ժամկետում կլինի, Նունե Բակունցն ասաց, որ խոսքը վերաբերում է այն հետազոտությանը, թե շտամներից որն է առկա մարդու մոտ, իսկ այդ գործընթացը բավականին նուրբ է, կոնկրետ ժամկետը դժվարացավ նշել, բայց ամեն ինչ անում են այդ ուղղությամբ:

Խոսելով վարակված և ապաքինված մարդկանց մոտ հակամարմինների գոյության ժամկետի մասին, մասնագետները նշեցին, որ վեց ամսվա մասին է խոսքը: