Խնդիրը հանքարդյունաբերող ընկերությունների կողմից հանձնաժողովի հարցումների պատասխաններից խուսափելն է եղել. Սերգեյ Բագրատյան
Այսօր ԱԺ-ն քննարկեց Մետաղական հանքարդյունաբերության ոլորտում ներդրումային ծրագրերի շրջանակներում գործադիր իշխանության մարմիններին ներկայացված և նրանց կողմից ընդունված ֆինանսական և այլ հաշվետվությունների օրինականությունը, հիմնավորվածությունը և արժանահավատությունը ուսումնասիրող քննիչ հանձնաժողովի կատարած աշխատանքների վերաբերյալ զեկույց, որը ներկայացրեց հանձնաժողովի նախագահ, անկախ պատգամավոր Սերգեյ Բագրատյանը:
Նա հայտնեց, որ հանձնաժողովը պահանջել և ստացել է քննության առարկա հանդիսացող հարցերի վերաբերյալ հաշվետվություններ, փաստաթղթեր և այլ անհրաժեշտ տեղեկություններ, պատվիրել է փորձաքննություններ և ստացել դրանց արդյունքում կազմված եզրակացությունները: Պատգամավորը հայտնեց, որ հանձնաժողով է հրավիրվել իրավասու պաշտոնատար անձանց, ինչպես նաև այլ անձանց, որոնք ներկայացրել են հանձնաժողովի իրավասության ոլորտին վերաբերող տեղեկություններ:
Սերգեյ Բագրատյանը մասնավորապես նշեց, որ նոյեմբերի 25-ին քննիչ հանձնաժողովը հրավիրած նիստում քննարկել է ոլորտի վերաբերյալ ՀՀ գլխավոր դատախազության և ՀՀ տարածքային կառավարման և ենթակառուցվածքների նախարարության հանձնաժողովին տրամադրված տեղեկատվությունները։
Պատգամավորի ներկայացմամբ, նիստում նշվել է, որ ուսումնասիրություններ կիրականացվեն Թեղուտի, Սոդքի, Ամուլսարի, «Զանգեզուրի պղնձամոլիբդենային կոմբինատ» ՓԲԸ-ի և Մղարթի մետաղական հանքավայրերում։ Նիստում դատախազությունը տեղեկացրել է, որ երկու հանքավայրի նկատմամբ կան հարուցված քրեական գործեր, իսկ հանքավայր շահագործող 27 ընկերություններն ունեն լիցենզիաներ, որոնց ժամկետներն ավարտվում են սկսած 2025-2045 թվականներին։
Հանձնաժողովի նախագահը հայտնեց, որ այդ քննարկման ժամանակ շեշտադրվել է այն փաստը, որ ակտիվ շահագործման փուլում գտնվող հանքավայրերից ոչ մեկը շահութահարկ չի վճարում, այսինքն շահույթով չի աշխատում և առաջարկվել է ուսումնասիրել այդ կազմակերպությունների ներդրումային ծրագրերը, դրանց ծավալները, նպատակները։
«Ընդհանրացնելով բոլոր խնդիրների ծագման աղբյուրը, կարող ենք պնդել, որ դրանք հիմնականում կապված են ոչ թափանցիկ գործունեության հետ»,-գնահատելով հանքշահագործող ընկերությունների գործողությունները՝ հայտնեց քննիչ հանձնաժողովի նախագահը:
Բագրատյանը հայտնեց, որ հիմնական խնդիրներից մեկը, որին բախվել է քննիչ հանձնաժողովը
հանքարդյունահանողների գործունեությունն ուսումնասիրելու ընթացքում կատարված
հարցումներին ոչ ամբողջական պատասխանելն է կամ պատասխաններից խուսափելը, որը
հիմնականում պայմանավորված է եղել նրանով, որ պահանջված տեղեկատվությունները
պարունակել են առևտրային գաղտնիք:
Պատգամավորը մասնավորապես անդրադառնալով Ամուլսարի ոսկեբեր քվարցիտային հանքավայրի շահագործման հարցի դիտարկմանը՝ հայտնեց, որ Վայոց ձորի մարզի Գնդեվազ համայնքի տարածքում կազմվել է 26 վկայագիր, որից 3-ը փորձագիտական հանձնաժողովի որոշմամբ ստացել է մշակույթային հուշարձանի կարգավիճակ և 55 նորահայտ հուշարձաններից փորձագիտական հանձնաժողովի նիստում քննարկվել և հուշարձանի կարգավիճակ է ստացել 22-ը:
Քննիչ հանձնաժողովի նախագահը հայտնեց, որ հիմնվելով հանձնաժողովի կողմից կատարված հարցումների պատասխանների վրա, արձանագրել են, որ տեղական, ազգային կամ միջազգային նշանակության մշակութային հուշարձանների և դրանց բնական միջավայրի ապամոնտաժային ոչնչացումը, դրանց գտնվելու վայրի զննումը կամ այլ գործունեությունը կարող է խախտել Հայաստանի կողմից վավերացված ՅՈՒՆԵՍԿՕ-ի մշակութային կոնվենցիաներով ամրագրված ՀՀ հանձնառությունները
Կատարած աշխատանքի արդյունքում հանձնաժողովը ընդունել է առաջարկություններ, որոնք էլ ընթերցեց Սերգեյ Բագրատյանը.
«1. Կազմակերպել վիդեոկոնֆերանս ՅՈՒՆԵՍԿՕ-Ի համաշխարհային ժառանգության կենտրոնի փորձագետների հետ՝ ոլորտի խնդիրները քննարկելու նպատակով:
2. Շրջակա միջավայրի նախարարության հետ համատեղ կազմակերպել լայնածավալ կրթական և իրազեկման միջոցառումներ մետաղական հանքարդյունաբերության ոլորտի ներկայացուցիչների հետ՝ թափանցիկ աշխատելու և դրա արդյուքում դրական կողմերը արձանագրելու տեսանկյունից։
3. Նախաձեռնել օրենսդրական փոփոխություն, որը թույլ կտա մասնավոր կապիտալի ներգրավումը և նոր ներդրումային միջավայրի ձևավորման հնարավորություն մետաղական հանքարդյունաբերության ոլորտում։
4. Մշակել կարգավորման մեխանիզմ հանքարդյունաբերողների ընթացիկ պարտավորությունների պարտադիր ամենամսյա հրապարակման համար։
5. Արդյունավետ կառավարման ապահովման և ֆինանսական ցուցանիշների վերահսկողության նպատակով բոլոր հնարավոր գործառույթներում անհրաժեշտ է ձևավորել նոր չափորոշիչներ»։
Պատգամավորները իրենց ելույթներում նկատեցին, որ քննիչ հանձնաժողովը որևէ առարկայական արդյունքի չի հասել:
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
